ଭାରତର ଅଟୋ ମୋବାଇଲ ବଜାର ଦିନକୁ ଦିନ ବଢି ଚାଲିଛି । ପେଟ୍ରୋଲ କାର ପରେ ଏବେ ଇଭି’ କାରର ଡିମାଣ୍ଡ୍ ଅଧିକ । ଦେଶରେ ଅଟୋ ମୋବାଇଲ ଇଣ୍ଡଷ୍ଟ୍ରୀର ଗ୍ରୋଥ୍ ରେଟ୍ ୫୬ ପ୍ରତିଶତ ରହିଛି । ବିଦେଶୀ କାର କମ୍ପାନୀ ନିଜ କାର ପାଇଁ ଭାରତକୁ ବଡ଼ ବଜାର ଭାବେ ଦେଖୁଥିବା ବେଳେ ଦେଶୀ କମ୍ପାନୀ ମଧ୍ୟ ପଛରେ ନାହାନ୍ତି । ମାରୁତି ଯଦି ଦେଶର ସବୁଠାରୁ ବଡ଼ କାର କମ୍ପାନୀ ତେବେ ମହିନ୍ଦ୍ରା ଓ ଟାଟା ମଧ୍ୟ ପଛରେ ନାହାନ୍ତି । ଏଣେ ରିନଲ୍ଟ ଓ ସିଟ୍ରୋନ୍ ଭଳି କମ୍ପାନୀ ମଧ୍ୟ ନିଜ ପାଇଁ ସ୍ଥାନ ବନାଇ ସାରିଲେଣି । ଦେଶରେ କାର ବଜାରକୁ ଦେଖିବା ବେଳେ କେବେ ନା କେବେ ଆପଣଙ୍କ ମନକୁ ପ୍ରଶ୍ନ ଆସିଥିବ ଯେ, ସେହି ବ୍ୟକ୍ତି କିଏ ଯିଏ ଦେଶର ପ୍ରଥମ କାର କିଣିଥିଲେ ? ଆସନ୍ତୁ ଆଜି ଜାଣିବା କିଏ ସେହି ବ୍ୟକ୍ତି ଯିଏ ଦେଶର ପ୍ରଥମ କାର କିଣିଥିଲେ ।
ଦେଶର ପ୍ରଥମ କାର ଜଣେ ବିଦେଶୀ କିଣିଥିଲେ ନା ଟାଟା ?
କାର ବଜାରକୁ ଆସିବା ସହିତ ଫୋର୍ଡ୍ ଓ ଡେଡିୟୋନ କମ୍ପାନୀ ମଧ୍ୟରେ କମ୍ପିଟିସନ୍ ଆରମ୍ଭ ହୋଇଥିଲା । ସେତେବେଳେ ଭାରତର ରାଜଧାନୀ ଥିଲା କୋଲକୋତା । କୋଲକୋତା ବା କଲିକତା କେବଳ ରାଜଧାନୀ ନଥିଲା ଏହା ମଧ୍ୟ ଥିଲା ଦେଶର ବଡ଼ବଡ଼ ଧନୀଙ୍କ ଘର । ଫୋର୍ଡ୍ ଓ ଡେଡିୟୋନ୍ କୋଲକତାରୁ ନିଜ ମାର୍କେଟିଂ ଯୁଦ୍ଧ ଆରମ୍ଭ କରିଥିଲେ । ଡେଡିୟୋନ୍ କୋଲକତାର ଖବରକାଗଜରେ କାର ବିଜ୍ଞାପନ ଦେଇଥିଲା । ଏହି ବିଜ୍ଞାପନ ପ୍ରକାଶିତ ହେବା ସହିତ କୋଲକତାରେ ରହୁଥିବା ବ୍ୟବସାୟୀ,ଜମିଦାର ଓ ରାଜା ମହାରାଜାଙ୍କ ମଧ୍ୟରେ କାର କିଣିବା ନେଇ ଉତ୍ସୁକତା ପ୍ରକାଶ ପାଇଥିଲା । ରାଜା ଓ ଜମିଦାରଙ୍କ ମଧ୍ୟରେ କାର କିଣିବା ପାଇଁ ପ୍ରତିଯୋଗିତା ଆରମ୍ଭ ହୋଇଥିଲା । କିନ୍ତୁ ବାଜି ମାରିଥିଲେ କୋଲକତାର ଜଣେ ଇଂରେଜ୍ ବ୍ୟକ୍ତି ଫୋଷ୍ଟର । ସେ କ୍ରମ୍ପଟନ୍ ଗ୍ରିଭସ କମ୍ପାନୀ ସହିତ ଜଡିତ ଥିଲେ । ସେ ପରାଧିନ ଭାରତର ପ୍ରଥମ କାର କିଣିଥିଲେ । କିନ୍ତୁ ସେ ଭାରତୀୟ ହୋଇନଥିବାରୁ ତାଙ୍କୁ ଭାରତର ପ୍ରଥମ କାର କିଣିଥିବା ବ୍ୟକ୍ତି ବୋଲି କୁହାଯାଇ ପାରିବ ନାହିଁ
୧୮୯୮ରେ ମୁମ୍ବାଇରେ ୪ ଜଣ ପାର୍ସି ବ୍ୟବସାୟୀ କାର ବୁକିଂ କରିଥିଲେ । ଏହି ୪ ଜଣ ବ୍ୟକ୍ତି ମଧ୍ୟ ଡେଡିୟୋନ୍ କାର ବୁକ୍ କରାଇଥିଲେ । ସେମାନଙ୍କ ମଧ୍ୟରୁ ଜଣେ ଥିଲେ ଜମସେଦଜୀ ଟାଟା । ଟାଟା ଗ୍ରୁପର ପ୍ରତିଷ୍ଠାତା । ସେହି ଟାଟା ଗ୍ରୁପର କାର ଏବେ ଭାରତୀୟ ବଜାରରେ ବିକ୍ରିର ନୂଆ ରେକର୍ଡ୍ ତିଆରି କରୁଛି । କୁହାଯାଏ ଯେ, ଜମସେଦଜୀ ଟାଟାଙ୍କୁ ପ୍ରଥମେ କାର ଡେଲିଭରି ହୋଇଥିଲା । ତେଣୁ ସେ ଭାରତର ପ୍ରଥମ କାର କିଣିଥିବା ବ୍ୟକ୍ତି । କିନ୍ତୁ ସତ ହେଉଛି ଯେ, କାର ବୁକ୍ କରିଥିବା ୪ ଜଣ ପାର୍ସୀ ବ୍ୟବସାୟୀଙ୍କ ମଧ୍ୟରୁ କାହାକୁ ଆଗ କମ୍ପାନୀ କାର ଦେଇଥିଲା ସେବାବଦରେ କିଛି ତଥ୍ୟ ନାହିଁ ।
