ଗୋଟିଏ ସମୟରେ ୪୦ ଦେଶରେ ପ୍ରକୃତିର ରୌଦ୍ର ରୂପ, କ’ଣ ସତ ହେଉଛି ଜଳବାୟୁ ପରିବର୍ତ୍ତନ ଆଶଙ୍କା ?

କରୋନା ଭୂତାଣୁ ଆକ୍ରମଣ ଭିତରେ ପୃଥିବୀ ଆଉ ଗୋଟିଏ ବିପଦ ସହ ମୁହାଁମୁହିଁ ହୋଇଛି । ଏବେ ବିଶ୍ୱର ବିଭିନ୍ନ ଦେଶଙ୍କୁ ପ୍ରକୃତିର ରୌଦ୍ରରୂପର ସମ୍ମୁଖୀନ ହେବାକୁ ପଡୁଛି । କରୋନାକୁ ଟିକା ହୁଏତ ନିପାତ କରିପାରେ କିନ୍ତୁ ପାଣିପାଗ ବିଜ୍ଞାନୀ ଏବେ ଜଳବାୟୁ ପରିବର୍ତ୍ତନକୁ ନେଇ ଚିନ୍ତିତ ଅଛନ୍ତି । ଏସିଆ, ୟୁରୋପ, ଆମେରିକା ଓ ଆଫ୍ରିକାରେ ଜଳବାୟୁର ରୌଦ୍ରରୂପ ବୈଜ୍ଞାନିକଙ୍କୁ ଚକିତ କରିଦେଇଛି । କେଉଁଠି ମରୁଡି, କେଉଁଠି ଭୀଷଣ ବର୍ଷାରୁ ବନ୍ୟା ପୁଣି ବରଫାବୃତ ଅଂଚଳରେ ଭୀଷଣ ଗରମ । ଏସବୁ ଆଗକୁ ଆସୁଥିବା ବିପଦ ଆଡକୁ ଅଙ୍ଗୁଳୀ ନିର୍ଦ୍ଦେଶ କରୁଛି । ଯେଉଁମାନେ ଜଳବାୟୁ ପରିବର୍ତ୍ତନକୁ ଭବିଷ୍ୟତର ବିପଦ ବୋଲି ମନେ କରୁଥିଲେ ସେମାନେ ଏବେ ଦିନକୁ ଦିନ ପାଣିପାଗର ପରିବର୍ତ୍ତିତ ରୂପକୁ ଦେଖି ଚକିତ ହେଉଛନ୍ତି । ଜଳବାୟୁ ପରିବର୍ତ୍ତନ ଆର୍କଟିକ ପର୍ଯ୍ୟନ୍ତ ପହଂଚି ସାରିଛି । ଯେଉଁଠାରେ ମେରୁ ଭାଲୁକୁ ବରଫ ତରଳିବା ପରେ ବାହାରକୁ ବାହାରୁଥିବା ଦେଖିବାକୁ ମିଳୁଛି ।

ଗୋଟିଏ ଦିନରେ ୪ଟି ଦେଶରେ ଆସିଲା ବିପଦ

ଦୁନିଆର ଅନେକ ଦେଶରେ ଗତ କେଇ ସପ୍ତାହ ଧରି ପାଣିପାଗରେ ଆଶ୍ଚର୍ଯ୍ୟଜନକ ପରିବର୍ତ୍ତନ ଦେଖିବାକୁ ମିଳିଛି । ଏହି ପରିବର୍ତ୍ତନ କେବଳ ଗୋଟିଏ ମହାଦେଶରେ ସୀମିତ ନାହିଁ । ଏସିଆରୁ ୟୁରୋପ ପୁଣି ଉତ୍ତର ଆମେରିକା, ସବୁଠି ଏହି ବିପଦ ଦେଖିବାକୁ ମିଳିଛି । କେଉଁଠି ପ୍ରବଳ ବର୍ଷା ହେଉଛି ତ କେଉଁଠି ବୁନ୍ଦାଏ ପାଣି ପାଇଁ ଆକାଶକୁ ଉଣ୍ଡିଛନ୍ତି ଚାଷୀ । ଋଷରେ ହିଟ୍ ୱେଭ୍ ଦେଖିବାକୁ ମିଳିଛି । ଜର୍ମାନୀରେ ଭୀଷଣ ବନ୍ୟା । ସେହିଭଳି ଚୀନରେ ବର୍ଷା ତା’ର ପୁରୁଣା ରେକର୍ଡ୍ ଭାଙ୍ଗି ପ୍ରଳୟଙ୍କାରୀ ବନ୍ୟା ଆଣିଛି । ମଙ୍ଗଳବାର ଦିନ ଏକା ସମୟରେ ବିଶ୍ୱର ଚାରିଟି ଦେଶରେ ପାଣିପାଗର ଅଲଗା ରୂପ ଦେଖିବାକୁ ମିଳିଥିଲା । ଋଷ, ଚୀନ୍, ଆମେରିକା ଓ ନ୍ୟୁଜଲାଣ୍ଡରେ ଲୋକ ଗରମ, ବନ୍ୟା ଓ ଜଙ୍ଗଲ ନିଆଁକୁ ନେଇ ଅସ୍ତବ୍ୟସ୍ତ ହୋଇଛନ୍ତି ।

ବର୍ଷା ନେଲା ୧୮୮ ଜୀବନ

ପଶ୍ଚିମ ୟୁରୋପରେ ବର୍ଷା ପାଇଁ ୧୮୮ ଜଣ ପ୍ରାଣ ହରାଇଛନ୍ତି । କୁହାଯାଉଛି ଗତ ଶହେ ବର୍ଷ ଭିତରେ ୟୁରୋପ ଏଭଲି ବନ୍ୟା ଦେଖିନଥିଲା । ବେଲଜିୟମ, ଲଗଜମବର୍ଗ, ଜର୍ମାନୀ ଓ ନେଦରଲ୍ୟାଣ୍ଡରେ ଦୁଇ ଦିନରେ ସେତିକି ବର୍ଷା ହୋଇଥିଲା ଯେତିକି ଦୁଇ ମାସରେ ହେବା କଥା । ୧୪ ଓ ୧୫ ଜୁଲାଇରେ ହୋଇଥିବା ଏହି ବର୍ଷା ପଶ୍ଚିମ ୟୁରୋପର ପ୍ରାୟ ସବୁ ଦେଶ ପ୍ରଭାବିତ ହୋଇଛନ୍ତି । ଅନ୍ୟପକ୍ଷରେ ଉତ୍ତର ୟୁରୋପର ଫିନଲ୍ୟାଣ୍ଡରେ ପାଣିପାଗର ଅଲଗା ମିଜାଜ୍ ଦେଖିବାକୁ ମିଳିଛି । ଫିନଲ୍ୟାଣ୍ଡରେ କେବେ ମଧ୍ୟ ଗରମ ହୁଏନାହିଁ । କିନ୍ତୁ ଚଳିତ ବର୍ଷ ଫିନଲ୍ୟାଣ୍ଡର ବାସିନ୍ଦା ଝାଳ ପୋଛିବାକୁ ବାଧ୍ୟ ହୋଇଛନ୍ତି । ଦେଶ ଅନେକ ସ୍ଥାନରେ ତାପମାତ୍ରା ୨୫ ଡିଗ୍ରୀ ସେଲସିୟସରୁ ଅଧିକ ରହିଥିଲା । ଫିନଲାଣ୍ଡ୍ ପାଣିପାଗ ବିଭାଗ ଆଗକୁ ଆହୁରି ଗରମ ହେବ ବୋଲି ସତର୍କ କରାଇ ଦେଇଛି ।

ସାଇବେରିଆରେ ତାପମାତ୍ରା ବଢିଲା

ଋଷର ସାଇବେରିଆ ଏମିତି ଗୋଟିଏ ସ୍ଥାନ, ଯେଉଁଠାରେ ଗରମ ଶବ୍ଦ କ’ଣ କେହି ଜାଣିନଥିଲେ । କିନ୍ତୁ ଚଳିତ ବର୍ଷ ସେଠାକାର ବାସିନ୍ଦା ଗରମରେ ସିଝିଛନ୍ତି । ସେଠାରେ ତାପମାତ୍ରା ଏତେ ବଢିଗଲା ଯେ, ଜଙ୍ଗଲରେ ନିଆଁ ଲାଗିଲା । ମେ ୨୦୨୧ରେ ସରକାରଙ୍କ ପକ୍ଷରୁ ଜାରି ତଥ୍ୟାରେ କୁହାଯାଇଛି ଯେ, ଗରମ କାରଣରୁ ସାଇବେରିଆର ଅନେକ ଜଙ୍ଗଲରେ ନିଆଁ ଲାଗିଛି । ଏବେ ମଧ୍ୟ ସାଇବେରିଆର ୨୧୬ରୁ ଅଧିକ ଜଙ୍ଗଲ ନିଆଁରେ ଜଳୁଛି ।

ଏସିଆର ଅନେକ ଦେଶ ମଧ୍ୟ ପ୍ରଭାବିତ

World Meteorological Organization (WMO) ତରଫରୁ କୁହାଯାଇଛି ଯେ, ହିଟ୍ ୱେଭ୍ କାରଣରୁ ଏସିଆର ଜଙ୍ଗଲ ପ୍ରତି ବିପଦ ସୃଷ୍ଟି ହୋଇଛି । ଭାରତ, ଚୀନ ଓ ଇଣ୍ଡୋନେସିଆର କିଛି ଅଚଂଳରେ ଅଦିନିଆ ବନ୍ୟା ପରିସ୍ଥିତି ସୃଷ୍ଟି ହୋଇଥିବା ବେଳେ ମୌସୁମୀ ଆସି ସାରିଥିଲେ ମଧ୍ୟ ବର୍ଷା ଦେଖିବାକୁ ମିଳୁନି । ସେହିଭଳି ଆମେରିକାର କାର୍ଲିଫର୍ଣ୍ଣିଆ, ଉଟା ଓ ପଶ୍ଚିମ କାନାଡାରେ ସର୍ବାଧିକ ତାପମାତ୍ରା ରେକର୍ଡ କରାଯାଇଛି । କାର୍ଲିଫର୍ଣ୍ଣିଆର ଡେଥ୍ ଭ୍ୟାଲିରେ ତାପମାତ୍ରା ୫୪.୪ ଡିଗ୍ରୀରେ ପହଂଚିଥିଲା ।