ଗୋଟିଏ ବର୍ଷରେ କରୋନା ଟିକା କିନ୍ତୁ 40 ବର୍ଷ ପରେ ବି HIV ଟିକା ତିଆରି କରିବାରେ କାହିଁକି ବିଫଳ ବୈଜ୍ଞାନିକ ?

551

ଏଚ୍ଆଇଭି / ଏଡସ୍ ଟିକା : 40 ବର୍ଷ ପରେ ଆମ ପାଖରେ କାହିଁକି ନାହିଁ ?

2019ର ଶେଷ ବେଳକୁ ଚୀନରେ ଦେଖା ଦେଇଥିଲା କରୋନା । 2020 ମାର୍ଚ୍ଚ ବେଳକୁ ଏହା ବାକି ଦେଶରେ ଆତଙ୍କ ସୃଷ୍ଟି କରିଥିଲା । କରୋନାର କୌଣସି ଚିକିତ୍ସା ନଥିଲା କି ଟିକା । କିନ୍ତୁ ଜାନୁଆରୀ 2021 ବେଳକୁ ଭାରତ ଭଳି ଦେଶରେ ଟିକାକରଣ ଆରମ୍ଭ ହୋଇ ସାରିଥିଲା । ଗୋଟିଏ ବର୍ଷରୁ କମ ସମୟ ମଧ୍ୟରେ ଟିକା ତିଆରି କରିବାରେ ବୈଜ୍ଞାନିକ ସଫଳ ହୋଇଥିଲେ । ଏତେ କମ ସମୟରେ ଟିକା ଆବିଷ୍କାର ହେବା ନିଶ୍ଚୟ ପୃଥିବୀ ଓ ମାନବ ପ୍ରଜାତି ପାଇଁ ବରଦାନ ଥିଲା । କରୋନା ଟିକା ଯେତେବେଳେ ବିକାଶର ପ୍ରାରମ୍ଭିକ ପର୍ଯ୍ୟାୟରେ ଥିଲା ସେତେବେଳେ ଅନେକ ଆଶଙ୍କା କରୁଥିଲେ ଯେ ଏଡସ ଟିକା ଖୋଜା ଭଳି ଏହାର ମଧ୍ୟ ଅବସ୍ଥା ହେବ । 40 ବର୍ଷରୁ ଅଧିକ ସମୟ ଧରି ଏଡସ ଟିକା ଉପରେ କାମ ଚାଲିଛି କିନ୍ତୁ ଏଯାଁଏ ସଫଳତା ମିଳିନାହିଁ । ତେଣୁ କରୋନା ଟିକା ଗୋଟିଏ ବର୍ଷରେ ଆବିଷ୍କୃତ ହୋଇଯିବ ବୋଲି ଭାବିବା ଭୁଲ । କିନ୍ତୁ ସୌଭାଗ୍ୟକୁ ସବୁ ଆଶଙ୍କା ମିଥ୍ୟା ପ୍ରମାଣିତ ହୋଇଥିଲା । ତେବେ ପ୍ରଶ୍ନ ଉଠୁଛି ଯଦି ଗୋଟିଏ ବର୍ଷରୁ କମ ସମୟରେ କରୋନା ଟିକା ଆବିଷ୍କୃତ ହୋଇ ପାରିଲା ତେବେ 40 ବର୍ଷ ଭିତରେ ଏଚଆଇଭି ଟିକା କାହିଁକି ଆବିଷ୍କାର ହୋଇ ପାରିନି

ଦୁନିଆରେ କେତେ ଏଡସ୍ ରୋଗୀ ?

ପ୍ରଥମ ଏଡସ ରୋଗୀ ସାମ୍ନାକୁ ଆସିବାର ଏହା ଭିତରେ 40 ବର୍ଷ ବିତିଗଲାଣି । ଗୋଟିଏ ସମୟରେ ଏଡସର ଅର୍ଥ ଥିଲା ମୃତ୍ୟୁ । ଅବଶ୍ୟ ଏବେ ଏହି ରୋଗକୁ ବୈଜ୍ଞାନିକ ‘ମ୍ୟାନେଜବୁଲ’ ସ୍ତରକୁ ଆଣି ସାରିଲେଣି । ଅର୍ଥାତ କିଛି ଔଷଧ ଏଡସ ରୋଗୀଙ୍କୁ ଅଧିକ ଦିନ ବଂଚାଇ ପାରୁଛି । ତଥାପି ଏହି ରୋଗରେ ଏବେ ଆକ୍ରାନ୍ତଙ୍କ ସଂଖ୍ୟା ହେଉଛି 3 କୋଟିରୁ ଅଧିକ । 3 କୋଟି 80 ଲକ୍ଷ ରୋଗୀ ଏବେ ମଧ୍ୟ ଟିକାକୁ ଅପେକ୍ଷା କରିଛନ୍ତି ।

ଏଡସର ଚିକିତ୍ସା କ’ଣ ?

ଚିକିତ୍ସା ଦୁନିଆରେ ଏବେ ଲୋକଙ୍କ ପାଖରେ ଏକ ବିଶେଷ ପ୍ରକାରର ପଦ୍ଧତି ରହିଛି । ଯାହାକୁ ଆଣ୍ଟିରିଟ୍ରୋଭାଇରାଲ ଥେରାପି ବା ଏଆରଟି କୁହାଯାଏ । ଏହାକୁ ନେବା ଦ୍ୱାରା ରୋଗୀଙ୍କ ଶରିରରେ ଏଡସ ଭାଇରସର ମାତ୍ରା କମ ହୋଇଯାଏ । ଫଳରେ ରୋଗୀ ସୁସ୍ଥ ରୁହେ । ଏହା ସହିତ ରୋଗୀଠାରୁ ଏହା ତାର ସାଥିକୁ ସଂକ୍ରମିତ ହୁଏ ନାହିଁ । ଏହା ବ୍ୟତିତ ଯେଉଁମାନେ ସଂକ୍ରମିତ ହେବାର ଅଧିକ ଆଶଙ୍କା ରହିଛି ସେମାନେ ପ୍ରି ଏକ୍ସପୋଜର ପୋଫିଲିକ୍ସିସ ବା ପ୍ରେପ୍ ମଧ୍ୟ ନେଇ ପାରନ୍ତି । ଏହି ଔଷଧ ଦୈନିକ ନେବା ଦ୍ୱାରା ସଂକ୍ରମଣର ସମ୍ଭାବନା 99 ପ୍ରତିଶତ କମିଥାଏ

ତେବେ ଟିକାର ଆବଶ୍ୟକତା କ’ଣ ପାଇଁ ?

ପ୍ରଥମ ତଥା ବଡ କାରଣ ହେଉଛି ଯେ, ଚିକିତ୍ସାର ଏହି ପଦ୍ଧତି ଦୁନିଆର ସମସ୍ତଙ୍କ ପାଖରେ ପହଞ୍ଚି ପାରିନାହିଁ । ବିଶ୍ୱର ଗରିବ ରାଷ୍ଟ୍ରଙ୍କ ପାଇଁ ଏହି ଚିକିତ୍ସା ବ୍ୟୟବହୁଳ । ଏପରିକି ଧନୀ ରାଷ୍ଟ୍ର ମଧ୍ୟ ଏହା ଅନୁଭବ କରୁଛନ୍ତି ଯେ, ଟିକା ହିଁ ଏଡସ ରୋକିବାର ସବୁଠାରୁ ଉପଯୁକ୍ତ ମାଧ୍ୟମ । ବର୍ତ୍ତମାନ ଜନସନ୍ ଆଣ୍ଡ୍ ଜନସନ୍ କମ୍ପାନି ଏଚଆଇଭି ଟିକାର ଦୁଇଟି ମାନବୀୟ ପରୀକ୍ଷଣ କରୁଛି । ଗୋଟିକର ପ୍ରାରମ୍ଭିକ ଫଳାଫଳ ଚଳିତ ବର୍ଷ ଶେଷ ବେଳକୁ ଆସିବାର ସମ୍ଭାବନା ରହିଛି ।

କେତେ ଚ୍ୟାଲେଞ୍ଜି ଏଚଆଇଭି ଟିକା ?

କୋଭିଡ୍ ଟିକା ଏତେ ଶୀଘ୍ର ଆସିବାର ଗୋଟିଏ କାରଣ ହେଉଛି ଟିକା ବିକଶିତ କରୁଥିବା ସଂସ୍ଥାଙ୍କୁ ପୁରା ଦୁନିଆର ସମର୍ଥନ ଓ ସହଯୋଗ ମିଳିଥିଲା । ଏହା ସହିତ ଏଡସ ଟିକା ବିକଶିତ କରିବା ଦିଗରେ ଯେଉଁ ଗବେଷଣା ହୋଇଥିଲା ତାହା ମଧ୍ୟ କୋଭିଡ୍ ଟିକା ବିକାଶରେ କାମରେ ଆସିଥିଲା । ଆଉ ଗୋଟିଏ ବଡ କାରଣ ହେଉଛି ଏଚଆଇଭି ଓ କୋଭିଡ୍ ମଧ୍ୟରେ ବିରାଟ ପ୍ରଭେଦ ରହିଛି । ତାହା ହେଉଛି ମାନବ ଶରିରର ପ୍ରତିରକ୍ଷା ପ୍ରଣାଳୀ ଏଚଆଇଭି ବିରୋଧରେ ନିଜେ ଲଢିବାକୁ ସକ୍ଷମ ନୁହେଁ । ଅପରପକ୍ଷରେ ମାନବ ଶରିରରେ ଥିବା ରୋଗ ପ୍ରତିରୋଧକ କ୍ଷମତା କୋଭିଡ୍ ବିରୋଧରେ ନିଜେ ଲଢିବାରେ ସକ୍ଷମ । କୋଭିଡ୍ ଟିକାର ଆଣ୍ଟିବଡିକୁ ଭାଇରସର ସ୍ପାଇକ୍ ପ୍ରୋଟିନ୍ ସହ ବାନ୍ଧିବା ପାଇଁ ଏହା ପ୍ରସ୍ତୁତ କରିଥାଏ । ଫଳରେ ମାନବୀୟ କୋଷିକା ସଂକ୍ରମିତ ହେବାରୁ ରକ୍ଷା ପାଇଥାଏ ।

କିନ୍ତୁ ଏଚଆଇଭି ଭିନ୍ନ…

ଏଚଆଇଭିରେ ମଧ୍ୟ ସ୍ପାଇକ୍ ଆକାରର ଏକ ପ୍ରୋଟିନ୍ ରହିଥାଏ । ଯାହା ଆଧାରରେ ଏଚଆଇଭି ଟିକା ବିକାଶ କରିବା ଉଦ୍ୟମ ଚାଲିଛି । ତେବେ ସମସ୍ୟା ହେଉଛି କୋଭିଡର ମାତ୍ର କେଇଟି ଭ୍ୟାରିଆଣ୍ଟ୍ ଦୁନିଆରେ ଦେଖିବାକୁ ମିଳିଛି । ଅନ୍ୟପକ୍ଷରେ ଏଚଆଇଭି କ୍ଷେତ୍ରରେ ଏହା ଅଲଗା । ଜଣେ ଏଚଆଇଭି ସଂକ୍ରମିତଙ୍କ ଶରିରରେ ହିଁ ହଜାରରୁ ଅଧିକ ଭ୍ୟାରିଆଣ୍ଟ ମିଳିଯିବେ । ଯେହେତୁ ଏହା ଏକ ରେଟ୍ରୋ ଭାଇରସ ତେଣୁ ଏହା ଖୁବଶୀଘ୍ର ବ୍ୟକ୍ତିର ଡିଏନଏ ସହିତ ନିଜକୁ ଯୋଡି ଦେଇଥାଏ । ତେଣୁ ସଫଳ ଟିକାକୁ ଭାଇରସକୁ ଶେଷ କରିବା ସହିତ ବ୍ୟକ୍ତି ଶରିରରେ ସବୁବେଳ ପାଇଁ ରହିବାକୁ ପଡିବ ।

ଟିକା ଟ୍ରାଏଲ ରିଜଲ୍ଟ କ’ଣ ?

ଏଚଆଇଭି ଟିକା ବିକଶିତ କରିବା ପାଇଁ ଅନେକ ପ୍ରୟାସ ହୋଇଛି । କିନ୍ତୁ ସବୁ ବିଫଳ ହୋଇଛି । ଜନସନ୍ ଆଣ୍ଡ୍ ଜନସନ ଟିକାର ମାନବୀୟ ପରୀକ୍ଷଣ ଏବେ ଆଫ୍ରିକାରେ ଚାଲିଛି । ଏହାର ଫଳାଫଳ ଆଗାମୀ କିଛି ମାସ ମଧ୍ୟରେ ଆସିବ । ଅନ୍ୟପକ୍ଷରେ ଆମେରିକା, ୟୁରୋପ ଓ ଦକ୍ଷୀଣ ଆଫ୍ରିକାରେ ଚାଲିଥିବା ଟ୍ରାଏଲର ତଥ୍ୟ 2024 ସୁଧା ଆସିବ । ତେବେ ଆଶା କରାଯାଉଛଇ ଯେ, m RNA ଟେକନିକ୍ କିଛି ଭଲ ଫଳାଫଳ ଦେବ । ସୂଚନାଯୋଗ୍ୟ ଯେ, ଏହି ଟେକିନିକରେ ହିଁ କୋଭିଡ୍ ଟିକା ତିଆରି ହୋଇଛି ।

Leave A Reply

Your email address will not be published.

Close Bitnami banner
Bitnami