ଆଲାଦ୍ଦିନଙ୍କ ପରି କୁହୁକ ଗାଲିଚାରେ ବୁଲିଲେ ଯୁବକ

ନୂଆଦିଲ୍ଲୀ : ଆଲାଦ୍ଦିନଙ୍କ ଯାଦୁକରୀ କୁହୁକ ଗାଲିଚା ବିଷୟରେ ପ୍ରାୟ ସମସ୍ତେ ଶୁଣିଥିବେ । ଆଉ ତାହା ଉପରେ ଯାତ୍ରା କରିବାର ସ୍ୱପ୍ନ ବି ଅନେକ ଦେଖନ୍ତି । ଏବେ ଏହି କୁକୁକ ଗାଲିଚାର ଏକ ଭିଡ଼ିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି, ଯେଉଁଥିରେ ଗୁରୁଗ୍ରାମର ଜଣେ ଯୁବକ ଆଲାଦ୍ଦିନ ପରି ପୋଷାକ ପରିଧାନ କରି କୁହୁକ ଗାଲିଚାରେ ରାସ୍ତାରେ ବୁଲୁଥିବାର ନଜର ଆସିଛନ୍ତି । ଯୁବକଙ୍କ ଏହି ଭିଡ଼ିଓକୁ ଦେଖି ଲୋକେ ଖୁବ୍ ପସନ୍ଦ କରୁଛନ୍ତି । ସେ ରାସ୍ତାରେ ବୁଲୁଥିବାବେଳେ ଛୋଟ ଛୋଟ ପିଲାମାନେ ଦେଖି ଖୁସି ହୋଇଥିବା ଦେଖିବାକୁ ମିଳିଛି ।

ଗୁରୁଗ୍ରାମରେ ଆଲାଦ୍ଦିନ ପ୍ରେଙ୍କ

ଏହି ଭିଡିଓ ସୋସିଆଲ ମିଡିଆ ପ୍ଲାଟଫର୍ମ ରେଡ୍ଡିଟରେ ଉକ୍ତ ବ୍ୟକ୍ତିଙ୍କ ଭିଡିଓ ସେୟାର କରାଯାଇଛି, ଯାହା ପୋଷ୍ଟ ହେବା ପରେ ଭାଇରାଲ ହୋଇଛି । ଏହି ଭିଡିଓଟି ମୂଳତଃ ବିଷୟବସ୍ତୁ ନିର୍ମାତା କେଭିନ କୌଲ ଦ୍ୱାରା ନିର୍ମିତ । ଭିଡିଓରେ କୌଲ ଆଲାଦ୍ଦିନ ପରି ପୋଷାକ ପିନ୍ଧି ଏକ କୁହୁକ ଗାଲିଚାରେ ଉପରେ ବୁଲୁଥିବାର ଦେଖାଯାଉଛି । ସେ ତାଙ୍କର କୁହୁକ ଗାଲିଚାରେ ଯାଉଥିବାର ଦେଖି ଲୋକମାନେ ଚକିତ ହୋଇ ଯାଇଛନ୍ତି । ସେମାନେ ଆଶ୍ଚର୍ଯ୍ୟ ହୋଇ ତାଙ୍କ ଆଡକୁ ବୁଲି ବୁଲି ଚାହୁଁଛନ୍ତି । ପୋଷ୍ଟର କ୍ୟାପସନରେ କେଭିନ କୌଲ ଲେଖିଛନ୍ତି, ‘ଗୁରୁଗ୍ରାମରେ ଆଲାଦ୍ଦିନ ପ୍ରେଙ୍କ’ ।

ଲୋକଙ୍କ ସହ ହାତ ମିଳାଇଥିଲେ

ଭିଡିଓରେ କେଭିନ କୌଲ ରାସ୍ତାରେ ଚାଲୁଥିବା ଗାଡିଗୁଡ଼ିକ ମଧ୍ୟରେ ଏକ କୁହୁକ ଗାଲିଚାରେ ଯାତ୍ରା କରୁଥିବା ଦେଖିବାକୁ ମିଳୁଛି । ଗୋଟିଏ ସ୍ଥାନରେ, ସେ ରାସ୍ତାରେ ହାତ ଅଙ୍ଗଭଙ୍ଗୀ ସହିତ କୁହୁକ ଗାଲିଚାକୁ ପଛକୁ ଘୁଞ୍ଚାଇଥିବାର ମଧ୍ୟ ଦେଖାଯାଉଛି । ଏହି ସମୟରେ, କୌଲ ମ୍ୟାକଡୋନାଲ୍ଡ ରେଷ୍ଟୁରାଣ୍ଟରେ ଆଇସକ୍ରିମ ଖାଇଥିଲେ ଏବଂ ଲୋକଙ୍କ ସହ ହାତ ମିଳାଇଥିଲେ । ତାଙ୍କର ଏହି ଭିଡିଓ ଉପରେ ଲୋକମାନେ ବିଭିନ୍ନ ପ୍ରକାରର ମନ୍ତବ୍ୟ ଦେଉଛନ୍ତି ।