ଅଗଷ୍ଟ ୧୫ ତାରିଖରେ କାବୁଲ ଉପରେ ତାଲିବାନର କବଜା ସହିତ ପୁରା ଦୁନିଆ ଚମକି ପଡିଥିଲା । ଆଫଗାନିସ୍ତାନ ଉପରେ ତାଲିବାନର କବଜାକୁ ନେଇ ଦୁନିଆ ଯେତିକି ତାଜୁବ ନଥିଲା ତା’ଠାରୁ ଅଧିକ ତାଜୁବ ହୋଇଥିଲା ଯେଉଁ ଢଙ୍ଗରେ ଆମେରିକା ତା’ର ଆଧୁନିକ ବିମାନ ସବୁକୁ ତାଲିବାନ ପାଇଁ ଛାଡି ଯାଇଥିଲା । ୬ ଲକ୍ଷ ଛୋଟ ଅସ୍ତ୍ର ବାଦ ଆମେରିକା ଲଢୁଆ ବିମାନ ହେଲିକପ୍ଟରକୁ ଛାଡି ପଳାଇ ଯାଇଥିଲା । ଆମେରିକା ସେନାର ୟୁନିଫର୍ମ ବୁଲେଟ୍ ପ୍ରୁଫ୍ ଜ୍ୟାକେଟ୍ ସହିତ ନାଇଟ୍ ଭିଜନ କ୍ୟାମେରା ପିନ୍ଧା ତାଲିବାନୀ ଆତଙ୍କବାଦୀଙ୍କ ଫଟୋ ମିଡିଆରେ ପ୍ରସାରିତ ହୋଇଥିଲା । ଯାହାକୁ ଦେଖି ଦୁନିଆ କହୁଥିଲା ଆମେରିକା ଗୋଟିଏ ଆତଙ୍କବାଦୀ ସଂଗଠନକୁ ଅତ୍ୟାଧୁନିକ ଅସ୍ତ୍ରରେ ସଜ୍ଜିତ କରି ଫେରିଛି । ତାଲିବାନ ମଧ୍ୟ ଏହି ମାଗଣା ଅସ୍ତ୍ର ଭଣ୍ଡାର ପାଇ ବେସ ଖୁସୀ ହେଉଥିଲା । କିନ୍ତୁ ଏବେ ପ୍ରାୟ ଦୁଇ ସପ୍ତାହ ପରେ ସତ ସାମ୍ନାକୁ ଆସିଛି । ତାଲିବାନ କହୁଛି , ଆମେରିକା ଆମକୁ ଠକିଦେଲା । ଯେଉଁ ସବୁ ବିମାନ ଓ ହେଲିକପ୍ଟର ଛାଡିଛି ତାହା ଅକାମୀ । ତାହା କେବେ ମଧ୍ୟ ଆକାଶରେ ଉଡ଼ି ପାରିବ ନାହିଁ ।
ଅଲ୍ ଜଜିରାର ଏକ ରିପୋର୍ଟ ମୁତାବକ, ତାଲିବାନକୁ ଲାଗୁଛି ଯେ ଏହି ମାମଲାରେ ତାଙ୍କ ସହ ‘ଧୋକା’ ହୋଇଛି । ଅଲ ଜଜ୍ଜିରା ରିପୋର୍ଟ ଅନୁସାରେ ତାଲିବାନ କହୁଛି ଯେ, ଆମେରିକା ସେମାନଙ୍କୁ ଓ ଆଫଗାନିସ୍ତାନକୁ ଧୋକା ଦେଇଛି । କାରଣ ଆମେରିକା ସୈନ୍ୟ କାବୁଲ ଛାଡ଼ିବା ପୂର୍ବରୁ ସେନା ହେଲିକପ୍ଟର ଏବଂ ବିମାନ ଗୁଡ଼ିକୁ ଅଚଳ କରିଦେଇଛି । କାବୁଲରେ ପଡ଼ିରହିଥିବା ଏୟାରକ୍ରାଫ୍ଟ ଏବେ କୌଣସି କାମରେ ଲାଗିପାରିବ ନାହିଁ । ତାଲିବାନ ଆଶା କରିଥିଲା ଯେ, ଏହି ସୈନ୍ୟ ବିମାନସବୁ ନିଜ ପାଇଁ ବ୍ୟବହାର କରିବେ କିନ୍ତୁ ସେପରି ହୋଇପାରିନାହିଁ ।
ତାଲିବାନର ଜଣେ ମୁଖପାତ୍ର କହିଛନ୍ତି ଯେ, ଆମେରିକା ସେନା ଛାଡିଥିବା ସାମରିକ ଅସ୍ତ୍ରଶସ୍ତ୍ର ଜାତୀୟ ସମ୍ପତ୍ତି ଅଟେ ଏବଂ ତାଲିବାନ ବର୍ତ୍ତମାନ ଦେଶକୁ ଶାସନ କରୁଛି, ତେଣୁ ସେ ସମସ୍ତ ସାମରିକ ଅସ୍ତ୍ରଶସ୍ତ୍ର ଦେଶର ଥିଲା । ଆମେରିକା ଏପରି କରି ଠିକ୍ କରି ନାହିଁ । ଏହା ଆମ ସହ ଧୋକା । ସୂଚନା ଅନୁଯାୟୀ ତାଲିବାନ ପାଖରେ ଏବେ ୪୮ଟି ବିମାନ ରହିଛି । ତେବେ ଏହି ବିମାନଗୁଡ଼ିକ ମଧ୍ୟରୁ କେତୋଟି ଭଲ ଅବସ୍ଥାରେ ଅଛି ସେ ସମ୍ପର୍କରେ କୌଣସି ସୂଚନା ନାହିଁ ।
ସୂଚନା ଅନୁଯାୟୀ, ଅଗଷ୍ଟ ୩୧ ତାରିଖ ସକାଳେ କାବୁଲ ବିମାନବନ୍ଦରର କିଛି ଅଞ୍ଚଳରେ ପରିସ୍ଥିତି ଅତ୍ୟନ୍ତ ବିଶୃଙ୍ଖଳିତ ହୋଇଉଠିଥିଲା । ଟର୍ମିନାଲ୍ ଭିତରେ ଜିନିଷପତ୍ର ଏବଂ ଡକ୍ୟୁମେଣ୍ଟ୍ ଗୁଡ଼ିକ ଛିନଛତ୍ର ହୋଇ ପଡ଼ିରହିଥିଲା । ଆମେରିକାର ସୈନ୍ୟବାହିନୀ ଦ୍ୱାରା ବ୍ୟବହୃତ CH-46 ହେଲିକପ୍ଟର ମଧ୍ୟ ପାର୍କିଂ ହୋଇଥିବା ଦେଖିବାକୁ ମିଳିଥିଲା । ଆମେରିକାର ସୈନ୍ୟବାହିନୀ କହିଛନ୍ତି ଯେ କାବୁଲ ବିମାନବନ୍ଦର ଛାଡିବା ପୂର୍ବରୁ ସେମାନେ ୨୭ଟି ହମ୍ଭି ଏବଂ ୭୩ଟି ବିମାନକୁ ଅକ୍ଷମ କରିଛନ୍ତି ।
