ପିଲାଠାରୁ ବୁଢା ସମସ୍ତଙ୍କ ମନରେ ମୃତ୍ୟୁକୁ ନେଇ ରହିଥାଏ ଅନେକ ପ୍ରଶ୍ନ । ଯେମିତି ମୃତ୍ୟୁ ପରର ଜୀବନ କ’ଣ ? ମରିବାକୁ ଯାଉଥିବା ଜଣେ ବ୍ୟକ୍ତି ମନରେ କ’ଣ ସବୁ ଚାଲିଥାଏ ? ମୃତ୍ୟୁ ସମୟରେ ମଣିଷକୁ କ’ଣ ଦେଖାଯାଏ ? ଶରୀରରୁ ଆତ୍ମା କେମିତି ଅଲଗା ହୁଏ ? ଏମିତି ଅନେକ ପ୍ରଶ୍ନ ମନକୁ ଆସିଥାଏ । କିନ୍ତୁ ଗୋଟିଏ କଥା ହେଉଛି ଧୃବସତ୍ୟ ଓ ତାହା ହେଉଛି ଯେ, ଯିଏ ଜନ୍ମ ନେଇଛି ସେ ମରିବ ନିଶ୍ଚିତ । ଜନ୍ନରୁ ମୃତ୍ୟୁର ଯାତ୍ରା ଆରମ୍ଭ ହୋଇଥାଏ । ଆଉ ଏହି ଦୁଇ ବିନ୍ଦୁ ମଧ୍ୟରେ କିନ୍ତୁ –ପରନ୍ତୁର ପ୍ରଶ୍ନ ହିଁ ନଥାଏ ।ତେବେ ଏହା ଅଲଗା କଥା ଯେ, ମୃତ୍ୟୁର ପ୍ରକାରଭେଦ ରହିଛି । କିଏ ଦୁର୍ଘଟଣାରେ ମରେ ତ’ କିଏ ରୋଗରେ କିମ୍ବା କିଏ ପ୍ରାକୃତିକ ମୃତ୍ୟୁ ।
ମୃତ୍ୟୁକୁ ଡ଼ର କାହିଁକି ?
ଦି ସନ’ର ରିପୋର୍ଟ ଅନୁସାରେ ବୈଜ୍ଞାନିକ ତଥା ୱିଥ୍ ଦି ଏଣ୍ଡ୍ ଇନ୍ ମାଇଣ୍ଡ୍ ଲେଖିକା କ୍ୟାଥରିନ୍ ମୋନିକସଙ୍କ ଅନୁସାରେ ଆମ ସମସ୍ତଙ୍କ ମନରେ ମୃତ୍ୟୁକୁ ନେଇ ଭୟ ଥାଏ । ଏଥିପାଇଁ ଯେ, ଆମେ ଜାଣିନେ ଆମ ମୃତ୍ୟୁ କେମିତି ହେବ । ତେବେ ତାଙ୍କ ଅନୁସାରେ ମୃତ୍ୟୁ ଏତେ ମଧ୍ୟ ଭୟାବହ ନୁହେଁ । ଆମକୁ ବାସ ଏହି କଥା ବୁଝିବାର ଅଛି ଯେ, ଜନ୍ମ ସହିତ ମୃତ୍ୟୁ ମଧ୍ୟ ଆସିବ । ଯିଏ ଜନ୍ମ ହୋଇଛି ସେ ନିଶ୍ଚିତ ଭାବେ ମୃତ୍ୟୁ ବରଣ କରିବ ।
ସେ କୁହନ୍ତି ଯେ, ମୃତ୍ୟୁ ଏତେ ମଧ୍ୟ ଭୟଙ୍କର ନୁହେଁ । ଜନ୍ମ ସହିତ ମୃତ୍ୟୁର ପ୍ରକ୍ରିୟା ଆରମ୍ଭ ହୁଏ । ଯେମିତି ହାଲିଆ ହେବା ପରେ ଆମେ ୭ ରୁ ୮ ଘଣ୍ଟା ଶୋଇପଡୁ ସେମିତି ଶରିର ଅଧିକ ଥକି ଯିବା ପରେ ସବୁଦିନ ପାଇଁ ଶୋଇଯାଏ ।
ମୃତ୍ୟୁ ମୁଖରୁ ଫେରି ଆସିଥିବା ଲୋକ କ’ଣ କୁହନ୍ତି ?
ଉପରେ ଯେଉଁ ସବୁ ପ୍ରଶ୍ନ ଅଛି ତାହାର ଉତ୍ତର ଜାଣିବାକୁ ଦୁର୍ଘଟଣା ଓ ଏମରଜେନ୍ସି ବିଶେଷଜ୍ଞ ଥମାସ ଫ୍ଲାଇସମ୍ୟାନ୍ ଏଭଳି ଅନେକ ବ୍ୟକ୍ତିଙ୍କୁ ଭେଟିଥିଲେ ଯେଉଁମାନେ ଚମତ୍କାରିକ ଭାବେ ମରୁ ମରୁ ବଂଚିଥିଲେ ।
ଥମାସଙ୍କ ଅନୁସାରେ ମୃତ୍ୟୁର ୫ ପର୍ଯ୍ୟାୟ ରହିଛି । ଦୀର୍ଘ ୩୫ ବର୍ଷ ଧରି ଦୁର୍ଘଟଣାର ଶିକାର ବ୍ୟକ୍ତିଙ୍କ ଚିକିତ୍ସା କରିବା ସମୟରେ ସେ ଏଭଳି ଅନେକ ବ୍ୟକ୍ତିଙ୍କ ସାକ୍ଷାତକାର ନେଇଛନ୍ତି ଯେଉଁମାନେ ମରୁମରୁ ବଂଚିଛନ୍ତି । ୩୫ ବର୍ଷର କ୍ୟାରିୟର ଭିତରେ ଥମାସ ୨୦୦୦ ଲୋକଙ୍କୁ ନିଜ ଆଖି ଆଗରେ ମରିଥିବା ଦେଖିଛନ୍ତି । ଏଭଳି ବ୍ୟକ୍ତି ଯେଉଁମାନେ ବଡ଼ଧରଣର ଦୁର୍ଘଟଣାରୁ ଅଳ୍ପକେ ବର୍ତ୍ତି ଯାଇଥିଲେ,ସେମାନଙ୍କ ସହିତ ସାକ୍ଷାତକାରରୁ ଥମାସ ଗୋଟିଏ ଉପସଂହାରରେ ଉପନୀତ ହୋଇଛନ୍ତି ଯେ, ମୃତ୍ୟୁର ୫ ପର୍ଯ୍ୟାୟ ରହିଛି । ଏହି ୫ ପର୍ଯ୍ୟାୟ ଦେଇ ଜଣେ ପ୍ରାଣ ହରାଇଥାଏ ।ଆସନ୍ତୁ ଜାଣିବା ସେହି ପର୍ଯ୍ୟାୟ ଗୁଡିକ କ’ଣ ସବୁ…
୧. ମୃତ୍ୟୁର ପ୍ରଥମ ପର୍ଯ୍ୟାୟରେ ମଣିଷକୁ କିଛି ମଧ୍ୟ ଶୁଭେ ନାହିଁ । ସେ ଏକ ଅଦଭୁତ ଶାନ୍ତି ଅନୁଭବ କରିଥାଏ । ତା’ର ସବୁ ଚିନ୍ତା ଦୁର ହୋଇଯାଏ । ସବୂ ଡ଼ର ଓ ଚିନ୍ତାର ଅନ୍ତ କାରଣରୁ ମରୁଥିବା ବ୍ୟକ୍ତି ଚରମ ଶାନ୍ତି ପାଏ ।
୨. ଦ୍ୱିତୀୟ ପର୍ଯ୍ୟାୟରେ ମଣିଷ ହାଲୁକା ଅନୁଭବ କରେ । ଥମାସଙ୍କ ଅନୁସାରେ ମରିବାକୁ ଯାଉଥିବା ବ୍ୟକ୍ତିକୁ ଲାଗେ ଯେ, ତା’ର ଶରିରର ଓଜନ କମିଯାଇଛି । ମୃତ୍ୟୁମୁଖରେ ଥିବା ବ୍ୟକ୍ତିକୁ ଲାଗେ ଯେମିତି ସେ ହାୱାରେ ଉଡୁଛି ।
୩. ମୃତ୍ୟୁର ତୃତୀୟ ପର୍ଯ୍ୟାୟ ଆଶ୍ୱସ୍ତିକର ବୋଲି କୁହନ୍ତି ଡକ୍ଟର ଥମାସ । ସେ ଯେଉଁମାନଙ୍କ ସାକ୍ଷାତକାର ନେଇଥିଲେ ସେମାନଙ୍କ ମଧ୍ୟରୁ ୯୮ ପ୍ରତିଶତଙ୍କ କହିବା ଥିଲା ଯେ, ସେତେବେଳେ ସେମାନେ ଶାନ୍ତି ଅନୁଭ କରୁଥିଲେ । କୌଣସି ଚିନ୍ତା ନଥିଲା । ଅନ୍ୟପକ୍ଷରେ ବାକି ୨ ପ୍ରତିଶତଙ୍କ କହିବା ହେଉଛି ସେହି ସମୟରେ ସେମାନେ ଭୟଙ୍କର ଜୀବ ଓ ଶବ୍ଦ ଶୁଣିଥିଲେ । କିଛି ମଧ୍ୟ ଦୁର୍ଗନ୍ଧର ଅଭିଯୋଗ କରିଥିଲେ ।
୪. ମୃତ୍ୟୁର ଚତୁର୍ଥ ପର୍ଯ୍ୟାୟରେ ଅଚାନକ ଏକ ଉଜ୍ୱଳ ଆଲୋକ ଦେଖାଦିଏ । ଏହି ଆଲୋକ ଗରମ ହୋଇଥାଏ ଓ ଏହା ନିଜ ଆଡକୁ ଟାଣିଥାଏ । କିନ୍ତୁ କିଛି ସମୟ ପରେ ଆଲୋକ ଲୁଚିଯାଏ ଓ ତା’ ସ୍ଥାନ ନିଏ ଅନ୍ଧକାର ।
୫. ଏହି ପର୍ଯ୍ୟାୟରେ ମଣିଷ ମରି ସାରିଥଏ । ସେ ଏହି ଦୁନିଆରୁ ବିଦାୟ ନେଇ ସାରିଥାଏ । ତା’ ଶରିରରୁ ଆତ୍ମା ବାହାରି ସାରିଥାଏ । ମୃତ୍ୟୁମୁଖରୁ ଫେରିଥିବା ୧୦ ପ୍ରତିଶତଙ୍କ ଅନୁସାରେ ଏହି ପର୍ଯ୍ୟାୟରେ ଶାନ୍ତି ରହିଥାଏ । ସେମାନେ ଏଭଳି ଏକ ଦୁନିଆରେ ପ୍ରବେଶ କରନ୍ତି ଯାହା ବହୁତ ସୁନ୍ଦର ଓ ଶାନ୍ତିଦାୟକ ଥିଲା ।
