ସେପ୍ଟେମ୍ବର ୧୯,୨୦୧୬ । ଆମେରିକାର ଆଟଲାଣ୍ଟିକ୍ ଏୟାରପୋର୍ଟରେ ବୋଇଂ ୭୫୭ ଫ୍ଲାଇଟ୍ ଅବତରଣ କରେ । ଏହାର ଦୁଇ ଦିନ ପରେ ବିମାନ ଭିତରକୁ ନଯାଇ କିଛି ବ୍ୟକ୍ତି ତାକୁ ହ୍ୟାକ୍ କରିନେଲେ । ସେମାନେ ଫ୍ଲାଇଟ୍ ରେଡିଓ ଫ୍ରିକ୍ୱେନ୍ସି କମ୍ୟୁନିକେଶନ ଭିତରକୁ ପ୍ରବେଶ କରିବାରେ ସଫଳ ହୋଇଥିଲେ । ରେଡିଓ କମ୍ୟୁନିକେଶନକୁ ପ୍ରବେଶ କରି ଏହି ହ୍ୟାକର ମାନେ ପୁରା ପ୍ଲେନର ସିଷ୍ଟମକୁ ନିଜ କବଜାକୁ ନେଇ ପାରିଥିଲେ ।
ଏହି ଘଟଣାର ବର୍ଷକ ପରେ ନଭେମ୍ବର ୮ ତାରିଖ ୨୦୧୭ରେ ଆମେରିକାର ସାଇବର ସିକ୍ୟୁରିଟି ସହିତ ଜଡିତ ହୋମଲ୍ୟାଣ୍ଡ୍ ସିକ୍ୟୁରିଟିର ଜଣେ ଅଧିକାରୀ ସ୍ୱୀକାର କରିଥିଲେ ଯେ,ଏହି ହ୍ୟାକିଂ ପଛରେ ସେମାନେ ଥିଲେ । ବିମାନକୁ ନଛୁଇଁ ସେମାନେ ତାକୁ ନିଜ କବଜାକୁ ନେଇ ପାରିଥିଲେ । ଯଦିଓ ଏହା କେବଳେ ପ୍ରୟୋଗ ପାଇଁ କରାଯାଇଥିଲା ତଥାପି ଏହି ଘୋଷଣା ପୁରା ଦୁନିଆକୁ ସ୍ତବ୍ଧ କରିଦେଇଥିଲା । କାରଣ ଏହା ହେଉଛି ବିମାନ ଅପରହରଣର ନୂଆ ଟେକନିକ୍ । ବିମାନ ଭିତରକୁ ନଯାଇ ମଧ୍ୟ ଆତଙ୍କବାଦୀ ବିମାନର ଅପହରଣ କରିପାରନ୍ତି ।
ସିଡିଏସ ରାୱତଙ୍କ ହେଲିକପ୍ଟର ଦୁର୍ଘଟଣା ଓ ଷଡ଼ଯନ୍ତ୍ର ଥିଓରୀ
ସିଡିଏସ ବିପିନ ରାୱତଙ୍କ ହେଲିକପ୍ଟର କ୍ରାସ ପରେ ପରେ ଏବେ ଏଭଳି ଆଶଙ୍କା ସୃଷ୍ଟି ହେଉଛି ଯେ, ତାଙ୍କ ହେଲିକପ୍ଟରକୁ ହ୍ୟାକ କରାଯାଇଥିଲା । ସାଇବର ସୁରକ୍ଷା ସହିତ ସଂପର୍କ ରଖୁଥିବା ବିଶେଷଜ୍ଞ ମଧ୍ୟ ସ୍ୱୀକାର କରନ୍ତି ଯେ, ସାଇବର ଯୁଦ୍ଧରେ ହ୍ୟାକିଂ ଜରିଆରେ ଦୁରରେ ବସି ମଧ୍ୟ ଯୁଦ୍ଧ ବିମାନ କିମ୍ବା ହେଲିକପ୍ଟରକୁ ଟାର୍ଗେଟ୍ କରାଯାଇ ପାରେ । ଏପରିକି ଦୁନିଆର ସବୁଠାରୁ ହାଇଟେକ୍ ଆର୍ମି କୁହାଯାଉଥିବା ଆମେରିକାର ସେନା ମଧ୍ୟ ସୁରକ୍ଷିତ ନୁହେଁ । ବିଶେଷଜ୍ଞଙ୍କ ଅନୁସାରେ ଆମେରିକା ୨୦୧୨ରୁ ୨୦୧୭ ମଧ୍ୟରେ ଯେଉଁ ସବୁ ପ୍ରତିରକ୍ଷା ପ୍ରଣାଳୀ (ୱିପନ୍ ସିଷ୍ଟମ) ବିକାଶ କରିଛି ସେ ସବୁ ସାଇବର ଆକ୍ରମଣ ଦୃଷ୍ଟିରୁ ସମ୍ବେଦନଶୀଳ ।
ହେଲିକପ୍ଟରକୁ ଡିଜିଟାଲି ହ୍ୟାକ୍ କରିବା ଅସମ୍ଭବ ନୁହେଁ
ବିଶେଷଜ୍ଞଙ୍କ ଅନୁସାରେ ସିଡିଏସ ଯେଉଁ ହେଲିକପ୍ଟରରେ ଯାତ୍ରା କରୁଥିଲେ ତାକୁ ଡିଜିଟାଲି ହ୍ୟାକ୍ କରାଯାଇପାରେ । ସାଇବର ଯୁଦ୍ଧର ଦୁନିଆରେ ଏହା ସହଜରେ କରିହେବ । ସାଇବର ଆକ୍ରମଣକାରୀ ଏଭଳି କାଣ୍ଡ କରିବାରେ ସକ୍ଷମ ଅଟନ୍ତି । ରେଡିଓ ସିଗନାଲକୁ ଜାମ୍ କରିବା,ପାଇଲଟକୁ ଭୁଲ ସଂକେତ କିମ୍ବା ନିର୍ଦ୍ଦେଶ ଦେବା,ଫ୍ଲାଇଟ୍ ଡାଟା ଭୁଲ ଦେବା ଭଳି କାମ ସହଜରେ କରାଯାଇ ପାରିବ । ଦୁନିଆରେ ଏଭଳି ହ୍ୟାକିଂକୁ ରୋକିବା ପାଇଁ ଆଡଭାନ୍ସ ସିଷ୍ଟମ ବିକଶିତ ମଧ୍ୟ ହୋଇ ନାହିଁ ।
ଇରାନର ପରମାଣୁ କେନ୍ଦ୍ର ଉପରେ ହୋଇଥିଲା ସାଇବର ଆଟାକ୍
ସିଡିଏସ ରାୱତଙ୍କ ହେଲିକପ୍ଟର ଉପରେ ସାଇବର ଆକ୍ରମଣର ଆଶଙ୍କା ପଛର ବଡ଼ କାରଣ ହେଲା ଇରାନ ଉପରେ ଆଗରୁ ଏମିତି ଆକ୍ରମଣ ହୋଇଛି । ଇରାନର ପରମାଣୁ କେନ୍ଦ୍ର ଉପରେ ଇସ୍ରାଏଲ ଏଭଳି ଆକ୍ରମଣ କରିଥିଲା । ଫଳରେ ଇରାନର ପରମାଣୁ ଅସ୍ତ୍ର ବିକାଶ କାର୍ଯ୍ୟ ୧୦ ବର୍ଷ ପଛକୁ ଚାଲିଯାଇଥିଲା ।
ସରକାର ଏଭଳି ଆକ୍ରମଣକୁ ଲୁଚାନ୍ତି !
ବିଶେଷଜ୍ଞଙ୍କ ଅନୁସାରେ ପ୍ରାୟ ସବୁଦେଶର ସରକାର ଏଭଳି ସାଇବର ଆଟାକ୍ ସମ୍ପର୍କରେ ମୁହଁ ଖୋଲନ୍ତି ନାହିଁ । କାରଣ ହେଉଛି ବଦନାମିର ଡର । ସରକାର ଯଦି ସ୍ୱୀକାର କରନ୍ତି ଯେ, ସାଇବର ଆଟାକ୍ ହୋଇଛି ତେବେ ଦେଶର ସୁରକ୍ଷାତନ୍ତ୍ର ଉପରେ ନାଗରିକଙ୍କ ଭରସା କମିଯିବ । ଏମିତିରେ ସିଡିଏସ ବିପିନ ରାୱତଙ୍କ ବିମାନ ଉପରେ ସାଇବର ଆଟାକ ହୋଇଥିଲା କି ନାହିଁ ତା’ର ସତ କେବେ ମଧ୍ୟ ସାମ୍ନାକୁ ଆସିବ ନାହିଁ ବୋଲି ବିଶେଷଜ୍ଞ ଆଶଙ୍କା କରନ୍ତି ।
