ଉର୍ଦ୍ଦୁ ଭାଷାର ପ୍ରସିଦ୍ଧ କବି ବଶିର ବଦ୍ର ଲେଖିଥିଲେ ଯେ, ‘ଶତ୍ରୁତା ଜମେଇକି କର କିନ୍ତୁ ଯେତେବେଳେ ପୁଣି ବନ୍ଧୁ ହେବା ସେତେବଳେ ଯେମିତି ଲଜ୍ଜିତ ହେବାନି ତା’ର ସମ୍ଭାବନା ମଧ୍ୟ ରଖ’ । ରାଜନୀତିରେ କେହି ସ୍ଥାୟୀ ମିତ୍ର ନଥାଏ କି କେହି ସ୍ଥାୟୀ ଶତ୍ରୁ । ମତବାଦ ଦୃଷ୍ଟିରୁ ଆପଣଙ୍କର ଅଲଗା ଦଳରେ ଥିବା ନେତାଙ୍କ ସହିତ ମତଭେଦ ରହିପାରେ ସତ କିନ୍ତୁ ମନଭେଦ ରହିବା ଠିକ୍ ନୁହେଁ । ରାଜନୀତିରେ ନୂଆ ସମ୍ପର୍କ ସ୍ଥାପନ ପାଇଁ କିମ୍ବା ପୁରୁଣା ସମ୍ପର୍କକୁ ଅଧିକ ମଜବୁତ କରିବା ପାଇଁ ଉପହାରର ଆଦାନ ପ୍ରଦାନ ହୋଇଥାଏ । ତେବେ କ’ଣ ଆପଣ କେବେ ଶୁଣିଛନ୍ତି ଯେ, କାମ ନହେଲେ କିମ୍ବା ମେଣ୍ଟ ଭାଙ୍ଗିଗଲେ କୌଣସି ନେତା ଆଉ ଜଣେ ନେତାଙ୍କୁ ଦେଇଥିବା ଉପହାର ଫେରସ୍ତ ମାଗନ୍ତି ? ଉତ୍ତର ପ୍ରଦେଶ ରାଜନୀତିରେ କିଛି ସେଇଭଳି ଏବେ ଘଟିଛି । ଯାହାକୁ ନେଇ ଏବେ ଉତ୍ତରପ୍ରଦେଶ ରାଜନୀତିରେ ଜୋରଦାର ଚର୍ଚ୍ଚା ଚାଲିଛି । ଉତ୍ତର ପ୍ରଦେଶ ବିଧାନସଭାର ଦ୍ୱିତୀୟ ବୃହତ୍ତମ ଦଳର ମୁଖ୍ୟ ନିଜର ଜଣେ ମେଣ୍ଟ ଭାଗିଦାରଙ୍କୁ କିଛି ମାସ ତଳେ ଉପହାର ଭାବେ ଗୋଟିଏ ଦାମି କାର ଦେଇଥିଲେ । କାର ଥିଲା ଟୋୟଟା କମ୍ପାନୀର ଏସୟୁଭି ଫର୍ଚ୍ୟୁନର । ତେବେ ଏହି ଫର୍ଚ୍ୟୁନର ସହିତ ଜଡିତ ଆଉ ଗୋଟିଏ କାହାଣୀ ମଧ୍ୟ ବେସ ଚର୍ଚ୍ଚାରେ ଅଛି । ଆଉ ସେହି କାହାଣୀ ବିହାର ସହିତ ଜଡିତ । ଏହି ଦୁଇ କାହାଣୀ ଦ୍ୱାରା ବୁଝନ୍ତୁ କେମିତି ରାଜନୈତିକ ସମୀକରଣ ବଦଳିଥାଏ ।
ଅଖିଳେଶ ଫେରସ୍ତ ମାଗିଲେ ଫର୍ଚ୍ୟୁନର
ସମାଜବାଦୀ ପାର୍ଟି ଓ ମହାନ ଦଳ ମଧ୍ୟରେ ମନ ଫଟାଫଟିରୁ ଉପହାର ଫେରସ୍ତ ମଗା ପର୍ଯ୍ୟନ୍ତ କଥା ଯାଇଛି । ୟୁପି ନିର୍ବାଚନ ପୂର୍ବରୁ ମହାନ ଦଳ ସହିତ ସମାଜବାଦୀ ପାର୍ଟିର ମେଣ୍ଟ ହୋଇଥିଲା । ଅଖିଳେଶ ସେହି ସମୟରେ ମହାନ ଦଳ ମୁଖ୍ୟ କେଶଦ ଦେବ ମୋର୍ଯ୍ୟଙ୍କୁ ଏକ ଫର୍ଚ୍ୟୁନର କାର ଉପହାର ଭାବେ ଦେଇଥିଲେ । ନିର୍ବାଚନ ପ୍ରଚାରରେ ଏହି କାର ବ୍ୟବହୃତ ହେବାର ଥିଲା । ତେବେ ମହାନ ଦଳକୁ ଟିକେଟ୍ ବିତରଣରେ ଉଚିତ ଭାଗ ମିଳିନଥିଲା । ନିର୍ବାଚନରେ ମେଣ୍ଟ ପରାସ୍ତ ହୋଇଥିଲା ଓ ବିଜେପି ପୁଣିଥରେ କ୍ଷମତାକୁ ଫେରିଥିଲା । କେଶବ ଭାବିଥିଲେ ଯେ, ଅଖିଳେଶ ତାଙ୍କୁ ବିଧାନ ପରିଷଦକୁ ପଠାଇବେ । କିନ୍ତୁ ଅଖିଳେଶ ବିଜେପିରୁ ଆସିଥିବା ସ୍ୱାମୀ ପ୍ରସାଦ ମୌର୍ଯ୍ୟଙ୍କୁ ବିଧାନ ପରିଷଦ ପଠାଇଥିଲେ । ଏଥିରେ ଉତକ୍ଷିପ୍ତ ହୋଇ କେଶବ ମେଣ୍ଟରୁ ଓହରି ଯାଇଥିଲେ । ଏହାପରେ ଅଖିଳେଶଙ୍କୁ ତାଙ୍କ ପରାମର୍ଶଦାତ୍ତା ମାନେ ଉପହାରରେ ଦିଆଯାଇଥିବା କାର ଫେରସ୍ତ ମାଗିବାକୁ କହିଥିଲେ । ଜଣେ ପରାମର୍ଶଦାତ୍ତା ମଧ୍ୟ ତୁରନ୍ତ କେଶବଙ୍କୁ ଫୋନ୍ କରି କାର ଫେରସ୍ତ ମାଗିଥିଲେ । କେଶବ ମଧ୍ୟ ତୁରନ୍ତ କାର ଫେରାଇ ଦେଇଥିଲେ । ଯାହାକୁ ନେଇ ଏବେ ଉତ୍ତର ପ୍ରଦେଶ ରାଜନୀତିରେ ଢେର ଚର୍ଚ୍ଚା ହେଉଛି । କିଛି ଅଖିଳେଶଙ୍କୁ ଏଥିପାଇଁ ସମାଲୋଚନା ମଧ୍ୟ କରୁଛନ୍ତି । ଅଖିଳେଶ ଏମିତି କରି ଛୋଟମନର ପରିଚୟ ଦେଇଛନ୍ତି ବୋଲି କୁହାଯାଉଛି ।
ଆମ୍ବାସଡାରରେ ନୀତିଶଙ୍କ ଘରକୁ ଯାଇଥିଲେ, ଫର୍ଚ୍ୟୁନରରେ ଫେରିଲେ
୨୦୧୮ ମସିହାର କଥା । ବିହାରର ପୂର୍ବତନ ମୁଖ୍ୟମନ୍ତ୍ରୀ ଜିତନ ରାମ ମାଂଝି ନିଜ ପୁରୁଣା ଆମ୍ବାସଡାର କାରରେ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଭେଟିବା ପାଇଁ ତାଙ୍କ ସରକାରୀ ବସଭବନକୁ ଯାଇଥିଲେ । ସାକ୍ଷାତ କାଳରେ ନୀତିଶ ମାଂଝିଙ୍କୁ ହାଲଚାଲ ପଚାରିଥିଲେ । ଉତ୍ତରରେ ମାଂଝି ତାଙ୍କୁ ତାଙ୍କ ପୁରୁଣା କାର କେମିତି ରାସ୍ତାରେ ଧୋକା ଦେଉଛି ଓ କେମିତି ଏହା ତାଙ୍କ ସୁରକ୍ଷା ପାଇଁ ବିପଜ୍ଜନକ ସେ କଥା କହିଥିଲେ । ଏହା ଶୁଣିବା କ୍ଷଣି ନୀତିଶ ତୁରନ୍ତ ତାଙ୍କ ବାସଭବନରେ ଥିବା ଗୋଟିଏ ବୁଲେଟ୍ ପ୍ରୁଫ୍ ଫର୍ଚ୍ୟୁନର କାର ମାଂଝିଙ୍କୁ ଦେଇଥିଲେ । ଆମ୍ବାସଡାର କାରରେ ଯାଇଥିବା ମାଂଝି ଘରକୁ ଫେରିଥିଲେ ବୁଲେଟ୍ ପ୍ରୁଫ୍ ଫର୍ଚ୍ୟୁନର କାରରେ । ଏହି ଦୁଇଟି କାହଣୀକୁ ତର୍ଜମା କରିବାର କାରଣ ହେଉଛି ଯେ, ଗୋଟିଏ ସମୟରେ ମାଂଝି ନୀତିଶଙ୍କୁ ଧୋକା ଦେଇଥିଲେ । ୨୦୧୪ ଲୋକସଭା ନିର୍ବାଚନରେ ଖରାପ ପ୍ରଦର୍ଶନ ପାଇଁ ନିଜକୁ ଦାୟୀ କରି ନୀତିଶ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇଥିଲେ । ତାଙ୍କ ଜାଗାରେ ମାଂଝି ମୁଖ୍ୟମନ୍ତ୍ରୀ ହୋଇଥିଲେ । କିନ୍ତୁ ବର୍ଷକ ପରେ ଯେତେବେଳେ ନୀତିଶ ପୁଣି ମୁଖ୍ୟମନ୍ତ୍ରୀ ହେବାକୁ ଚାହିଁଲେ ସେତେବେଳେ ମାଂଝି ଗାଦି ଛାଡିନଥିଲେ । ବିଧାନସଭାରେ ଆସ୍ଥା ଭୋଟ୍ ଆସିଥିଲା । କିନ୍ତୁ ଭୋଟର ସମ୍ମୁଖୀନ ହେବା ପୂର୍ବରୁ ମାଂଝି ଇସ୍ତଫା ଦେଇଥିଲେ । ଏହା ପରେ ସେ ନୀତିଶଙ୍କୁ ଗୁଡ୍ ବାୟ କହି ନିଜ ଦଳ ଗଢିଥିଲେ । ଏତେ ସବୁ ପରେ ମଧ୍ୟ ଦୁଇ ନେତାଙ୍କ ମଧ୍ୟରେ ବ୍ୟକ୍ତିଗତ ସମ୍ପର୍କ ଖରାପ ହୋଇନଥିଲା । ଯଦି ଖରାପ ହୋଇଥାନ୍ତା ତେବେ ଆମ୍ବାସଡାରେ ଯାଇଥିବା ମାଂଝିଙ୍କୁ ନୀତିଶ ଫର୍ଚ୍ୟୁନର ଦେଇନଥାନ୍ତେ । ଅଖିଳେଶଙ୍କ ଉପହାର ଫେରସ୍ତକୁ ନୀତିଶଙ୍କ ବଡ଼ ହୃଦୟ ସହିତ ତୁଳନା କରାଯାଉଛି । କୁହାଯାଉଛି ଯେ, ଅଖିଳେଶଙ୍କୁ ଆହୁରି ବହୁତ କଥା ଶିଖିବାର ଅଛି ।
