ଜଣେ ରାଷ୍ଟ୍ରପତିଙ୍କୁ ପିଟିପିଟି ହତ୍ୟା କରି ଟ୍ରାଫିକ ପୋଷ୍ଟରେ ଶବକୁ ଝୁଲାଇଥିବା ‘ବିଦ୍ୟାର୍ଥୀ’ଙ୍କ ଦଳ ପୁଣି ଶାସନକୁ ଫେରୁଛି
ଆଫଗାନିସ୍ତାନରୁ ଆମେରିକା ସେନା ଫେରିବା ଦିନ ପାଖେଇ ଆସିବା ସହିତ ସେଠାରେ ତାଲିବାନ କ୍ଷମତା ଦଖଲର ନିକଟତର ହେବାରେ ଲାଗିଛି । ତାଲିବାନ ଗତ କେଇ ସପ୍ତାହ ମଧ୍ୟରେ ୧୦ ଜିଲ୍ଲାର ମୁଖ୍ୟାଳୟ ଉପରେ କବଜା ଜମାଇ ସାରିଲାଣି । ସବୁଠୁ ବଡ କଥା ହେଉଛି ଏଥିପାଇଁ ତାଲିବାନକୁ ବିଶେଷ କିଛି କଷ୍ଟ କରିବାକୁ ପଡିନାହିଁ । କାରଣ ଆଫାଗନୀ ସେନା ତାଲିବାନ ଡରରେ ପଡୋଷୀ ଦେଶକୁ ପଳାୟନ କରିଛନ୍ତି । ଏମିତିରେ ସେହି ଆଶଙ୍କା ସତ ହେବାକୁ ଯାଉଛି ଯାହାକି ସିଆଇଏ ତା’ର ଗୁପ୍ତ ରିପୋର୍ଟରେ କରିଥିଲା । ସିଆଇଏର ଗୁପ୍ତ ରିପୋର୍ଟ ଅନୁସାରେ ଆମେରିକା ସେନା ଆଫଗାନିସ୍ତାନ ଛାଡିବାର ୬ ମାସ ମଧ୍ୟରେ ତାଲିବାନ କ୍ଷମତାକୁ ଆସିବ । ତେବେ ଏବେ ଲାଗୁଛି ଏଥିପାଇଁ ୬ ମାସ ମଧ୍ୟ ଲାଗିବ ନାହିଁ । ଆଫଗାନିସ୍ତାନରେ ତାଲିବାନର ପୁନଃ କ୍ଷମତାକୁ ପ୍ରତ୍ୟାବର୍ତ୍ତନ ଇରାନ ଓ ଭାରତ ପାଇଁ ଶୁଭ ସଂକେତ ନୁହେଁ । ତାଲିବାନର ଫେରିବା କେବଳ ପାକିସ୍ତାନ ଓ ଚୀନକୁ ସୁହାଇବ ।
ୱାର୍ଲଡ୍ ଟ୍ରେଡ୍ ସେଣ୍ଟର ଆକ୍ରମଣ ପରେ ଆଫାଗନିସ୍ତାନ ଆସିଥିଲା ଅଙ୍କଲ ସାମ୍
୨୦୦୧ ସେପ୍ଚେମ୍ବର ୧୧ ଆକ୍ରମଣ ପରେ ଆମେରିକା ଆଫଗାନିସ୍ତାନରେ ପହଂଚିଥିଲା । ଅଙ୍କଲ ସାମ ଯୁଦ୍ଧ ମୈଦାନକୁ ନଓହ୍ଲାଇ କାର୍ପେଟ୍ ବମିଂ ଦ୍ୱାରା ତାଲିବାନକୁ କ୍ଷମତାଚ୍ୟୁତ କରିଥିଲା । ଆମେରିକାର ଫାୟାର ପାୱାର ଆଗରେ ତିଷ୍ଟି ନପାରି ତାଲିବନା ଅତିଥି ଓସାମା ବିନ୍ ଲାଡେନ ସହିତ ତୋରାବରା ପାହଡ ଓ ସେଠାରୁ ପାକିସ୍ତାନକୁ ପଳାୟନ କରିଥିଲା । ଏହା ପରେ ପାଖାପାଖି ୨୧ ବର୍ଷ ପରେ ଆମେରିକା ସେନା ନିଜ ଦେଶକୁ ଫେରୁଛି । କିନ୍ତୁ ଲାଗୁଛି ଆମେରିକାର ସବୁଠାରୁ ଲମ୍ବା ଯୁଦ୍ଧ ତାଲିବାନକୁ ମୁଳପୋଛ କରିବାରେ ବିଫଳ ହୋଇଛି । କାରଣ ତାଲିବାନ ଏବେ ଆଗ ଅପେକ୍ଷା ଅଧିକ ଶକ୍ତିଶାଳୀ । ଆମେରିକା ଓ ମିତ୍ର ରାଷ୍ଟ୍ର ଆଫଗାନିସ୍ତାନୀ ସେନାର ଆଧୁନିକିକରଣ ପାଇଁ ହଜାର ହଜାର କୋଟି ଟଙ୍କା ଖର୍ଚ୍ଚ କରିଥିଲେ ମଧ୍ୟ ଏବେ ତାଲିବାନ ଆଗରେ ସେମାନେ ଯେଉଁଭଳି ଛତ୍ରଭଙ୍ଗ ଦେଉଛନ୍ତି ସେଥିରୁ ଲାଗୁଛି ଆଫଗାନିସ୍ତାନରେ ଆମେରିକା ହାରିଛି ।
ଭାରତ ପାଇଁ ବିପଦ
ଆର୍ଥିକ ଚାପ ଓ ଘରେ ବିରୋଧ କାରଣରୁ ଆମେରିକା ନିଜ ସେନାକୁ ଆଫଗାନିସ୍ତାନରୁ ଫେରାଇ ନେଉଛି । ତେବେ ଏହାର ପ୍ରଭାବ କେବଳ ଆଫଗାନିସ୍ତାନ ନୁହେଁ ଭାରତ ଉପରେ ମଧ୍ୟ ପଡ଼ିବ । ଯାହା ଭାରତର ଚିନ୍ତା ବଢାଇ ଦେଇଛି । କାରଣ ଆଗରୁ ତାଲିବାନ ଶାସନରେ ଥିବା ବେଳେ ଏହା ଭାରତ ବିରୋଧୀ ଶକ୍ତିଙ୍କ ଆଡ୍ଡା ପାଲଟିଥିଲା । ପାକିସ୍ତାନ ସରକାର ତାଲିବାନର ପ୍ରଧାନ ପୃଷ୍ଠପୋଷକ ଥିଲା । ତାଲିବାନ ପାକିସ୍ତାନୀ ଗୁଇନ୍ଦା ଏଜେନ୍ସି ଆଇଏସଆଇ ଇଙ୍ଗିତରେ ଚାଲୁଥିଲା । ୧୯୯୯ରେ ତାଲିବାନ ପାଇଁ ଭାରତ ଗମ୍ଭୀର ପରିସ୍ଥିତିର ସମ୍ମୁଖୀନ ହୋଇଥିଲା । ୧୯୯୯ରେ ଗୋଟିଏ ଭାରତୀୟ ବିମାନକୁ ପାକ୍ ଆତଙ୍କଦାବୀ ହାଇଜ୍ୟାକ୍ କରିନେଇଥିଲେ । ଅପହୃତ ବିମାନ ଓ ଏହାର ଯାତ୍ରୀଙ୍କ ବଦଳେ ଆତଙ୍କବାଦୀ ୫ ଜଣ ପାକିସ୍ତାନୀ ଆତଙ୍କବାଦୀଙ୍କ ମୁକ୍ତି ଦାବି କରିଥିଲେ ।
କାନ୍ଦାହାର ବିମାନ ଅପହରଣ କାଣ୍ଡ
ଅପହୃତ ଭାରତୀୟ ବିମାନ କାନ୍ଦାହାର ବିମାନ ବନ୍ଦରରେ ଅବତରଣ କରିଥିଲା । ତାଲିବାନ ସୈନିକ ଏହି ବିମାନରେ ଥିବା ଅପହରଣାକରୀଙ୍କୁ ସୁରକ୍ଷା ଯୋଗାଇ ଦେଇଥିଲେ । ଭାରତ କମାଣ୍ଡୋ କାର୍ଯ୍ୟାନୁଷ୍ଠାନ ପାଇଁ ଚିନ୍ତା କରିଥିଲା କିନ୍ତୁ ତାଲିବାନ ଏଥିପାଇଁ ଅନୁମତି ଦେଇନଥିଲା । ଶେଷରେ ଭାରତକୁ ଆତଙ୍କବାଦୀଙ୍କ ଦାବି ଆଗରେ ମୁଣ୍ଡ ନୁଆଁଇବାକୁ ପଡିଥିଲା । ପଣବନ୍ଦୀଙ୍କ ବଦଳରେ ଭାରତ ୫ ଜଣ ଆତଙ୍କବାଦୀଙ୍କୁ ମୁକ୍ତ କରିଥିଲା । ଯେଉଁମାନଙ୍କ ମଧ୍ୟରେ ଜୈସ-ଏ-ମହମ୍ମଦର ପ୍ରତିଷ୍ଠାତା ମୌଲନା ମସୁଦ ଅଜହର ଓ ଆମେରିକୀୟ ସାମ୍ବାଦିକ ଡାନିଏଲ ପର୍ଲଙ୍କ ହତ୍ୟାକାରୀ ଥିଲେ ।
ପୁଣି ହୋଇପାରେ ଭାରତ ବିରୋଧୀ ଶକ୍ତିଙ୍କ ଚରାଭୂଇଁ
ଆଫଗାନିସ୍ତାନରୁ ତାଲିବାନର ପତନ ପରେ ଭାରତ ସେଠାରେ ଅନେକ ଉନ୍ନତିମୁଳକ କାର୍ଯ୍ୟରେ ନିଜକୁ ସାମିଲ କରିଥିଲା । କିନ୍ତୁ ଏବେ ଭାରତର ଡର ଯେ, ତାଲିବାନ ଫେରିବା ସହିତ ଆଇଏସଆଇ ସେଠାରେ ପୁଣିଥରେ ନିଜ ବେସ୍ ସ୍ଥାପନ କରି ଭାରତ ବିରୋଧୀ କାର୍ଯ୍ୟକଳାପ ବଢାଇବ । ତାଲିବାନ କ୍ଷମତାକୁ ଫେରିବା ଦ୍ୱାରା ପାକ୍ ସେନା ସମ୍ପୂର୍ଣ୍ଣ ଭାବେ ଜମ୍ମୁକାଶ୍ନୀରରେ ଧ୍ୟାନ କେନ୍ଦ୍ରିତ କରିପାରିବ । ତାଲିବାନ ମଧ୍ୟ ଭାରତୀୟ ଆତଙ୍କବାଦୀଙ୍କୁ ଟ୍ରେନିଂ ଦେବାର ଆଶଙ୍କା ରହିଛି । ପାକିସ୍ତାନ ପ୍ରତି ତାଲିବାନର ନରମ ମନୋଭାବର କାରଣ ହେଉଛି ଏହାର ସୃଷ୍ଟି ପଛରେ ଇସଲାମାବାଦ ରହିଛି ।
ରାଷ୍ଟ୍ରପତିଙ୍କୁ ମାରି ଟ୍ରାଫିକ୍ ପୋଷ୍ଟରେ ଝୁଲାଇ ଦେଇଥିଲେ
୧୯୯୬ ମସିହାରେ ପାକିସ୍ତାନ ପଟୁ ତାଲିବାନ ଆଫଗାନିସ୍ତାନକୁ ପ୍ରବେଶ କରିଥିଲା । ତାଲିବର ଅର୍ଥ ହେଉଛି ବିଦ୍ୟାର୍ଥୀ । ତାଲିବାନର ପ୍ରତି ସଦସ୍ୟ ମଦ୍ରାସାରୁ ଶିକ୍ଷା ଲାଭ କରିଥାନ୍ତି । ବେନଜିର ଭୁଟ୍ଟୋଙ୍କ ଅମଳରେ ପାକିସ୍ତାନ ତାଲିବାନକୁ ତିଆରି କରିଥିଲା । ଲକ୍ଷ୍ୟ ଥିଲା ତାଲିବାନ ଜରିଆରେ ଆଫଗାନିସ୍ତାନକୁ ନିୟନ୍ତ୍ରଣ କରି ଇରାନ, ଭାରତ ଓ ଋଷକୁ ଟକ୍କର ଦେବା । ୧୯୯୬ରେ ତାଲିବାନ କାବୁଲ ଦଖଲ କରିଥିଲା । ସେତେବେଳେ ସେଠାରେ ମୁଜାହିଦ୍ଦିନଙ୍କ ସରକାର ଥିଲା । ମୁଜାହିଦ୍ଦିନଙ୍କ ପଳାୟନ ପରେ ପୁର୍ବତନ କମ୍ୟୁନିଷ୍ଟ ରାଷ୍ଟ୍ରପତି ନଜିବଉଲ୍ଲାଙ୍କୁ ତାଲିବାନ ନୃଶଂସତାର ସହ ହତ୍ୟା କରିଥିଲା । ଜାତିସଂଘ ଅଫିସରେ ଶରଣ ନେଇଥିବା ନଜିବଉଲ୍ଲାଙ୍କୁ ପିଟି ପିଟି ହତ୍ୟା କରାଯାଇଥିଲା । ପରେ ତାଙ୍କ ଗୁପ୍ତାଙ୍ଗକୁ କାଟି ଦିଆଯାଇଥିଲା । ଏହା ପରେ ତାଙ୍କ ମୃତଦେହକୁ କାବୁଲର ଗୋଟିଏ ଟ୍ରାଫିକ୍ ପୋଷ୍ଟରେ କିଛି ଦିନ ପାଇଁ ଟଙ୍ଗାଇ ରଖା ଯାଇଥିଲା । ନଜିବଉଲ୍ଲାଙ୍କ ପରିବାରକୁ ଭାରତ ଶରଣ ଦେଇଥିବାରୁ ସେମାନେ ରକ୍ଷା ପାଇଯାଇଥିଲେ ।
