ଚୀନ୍ ଓ ଭାରତ ମଧ୍ୟରେ ଯୁଦ୍ଧର ଆଶଙ୍କା ରହିଛି ବୋଲି ଦାବି କଲା ଆମେରିକା

ଭାରତ ଓ ଚୀନ୍ ମଧ୍ୟରେ ବାସ୍ତବିକ ନିୟନ୍ତ୍ରଣ ରେଖା ବା ଏଲଏସିରେ ସଂଘର୍ଷର ଆଶଙ୍କା ରହିଛି । ଏହି ସଂଘର୍ଷ ପରବର୍ତ୍ତି କାଳରେ ଯୁଦ୍ଧର ରୂପ ନେଇପାରେ ବୋଲି ଆମେରିକା ଗୁଇନ୍ଦା ବିଭାଗ ଦାବି କରିଛି । ଆମେରିକୀୟ ଗୁଇନ୍ଦା କମ୍ୟୁନିଟିର ବାର୍ଷିକ ବିପଦ ଆକଳନ ରିପୋର୍ଟରେ ଏଭଳି କୁହାଯାଇଛି । ୟୁଏଏସ ଇଣ୍ଟେଲିଜେନସ ରିପୋର୍ଟ ଅନୁସାରେ ଭାରlତ ଓ ଚୀନ୍ ମଧ୍ୟରେ ସଂଘର୍ଷ ସ୍ଥିତି ଉତ୍ପନ ହେଲେ ଏହା ଆମେରିକୀୟ ସ୍ୱାର୍ଥକୁ ପ୍ରଭାବିତ କରିବ ।

ରିପୋର୍ଟରେ କ’ଣ ଅଛି ?

ରିପୋର୍ଟରେ କୁହାଯାଇଛି ଯେ, ବର୍ଷ ୨୦୨୦ରେ ଭାରତ ଓ ଚୀନ୍ ମଧ୍ୟରେ ହୋଇଥିବା ଘାତକ ସଂଘର୍ଷକୁ ଦେଖିଲେ ଦୁଇ ଦେଶ ମଧ୍ୟରେ ସମ୍ପର୍କ ଉତ୍ତେଜନାପୂର୍ଣ୍ଣ ରହିବ । ଯଦିଓ ଦୁଇ ଦେଶ ସ୍ଥିତିକୁ ସାମାନ୍ୟ କରିବା ପାଇଁ କଥା ହେଉଛନ୍ତି ଓ କିଛି ବିଷୟରେ ସହମତି ମଧ୍ୟ ବନିଛି । ଏଥିରେ କୁହାଯାଇଛି ଯେ, ଭାରତ ଓ ଚୀନ ମଧ୍ୟରେ ବିଗତ ଦିନରେ ଯେଉଁ ଗତିରୋଧ ଦେଖାଯାଇଥିଲା ସେଥିରୁ ଜଣାପଡୁଛି ଯେ, ଏଲଏସିରେ ଛୋଟମୋଟ ସଂଘର୍ଷ କେତେବେଳେ ବି ବଡ଼ ସଂଘର୍ଷରେ ପରିବର୍ତ୍ତିତ ହୋଇପାରେ ।

ଉଲ୍ଲେଖନୀୟ ଯେ, ଭାରତ-ଚୀନ୍ ମଧ୍ୟରେ ପୂର୍ବ ଲଦ୍ଦାଖରେ ଗତ ୩୦ ବର୍ଷ ଧରି ଗତିରୋଧ ଜାରି ରହିଛି । ପେଙ୍ଗାଙ୍ଗ ହ୍ରଦରେ ହିଂସକ ଝଗଡା ପରେ ଗଲବାନ ଘାଟିରେ ବଡ଼ ଧରଣର ସଂଘର୍ଷ ହୋଇଥିଲା । ଯେଉଁଥିରେ ୨୦ ଜଣ ଭାରତୀୟ ସୈନିକ ସହିଦ ହୋଇଥିଲେ । ଅନ୍ୟପକ୍ଷରେ ଚୀନ ଅଧିକ ସଂଖ୍ୟକ ସୈନିକଙ୍କୁ ହରାଇଥିଲେ ମଧ୍ୟ ନିରବ ଥିବା ବିଭିନ୍ନ ରିପୋର୍ଟରେ ଦାବି କରାଯାଇଥିଲା ।

ପାକିସ୍ତାନ ସହିତ ମଧ୍ୟ ଯୁଦ୍ଧର ଆଶଙ୍କା

ୟୁଏଏସ ଇଣ୍ଟେଲିଜେନ୍ସ ରିପୋର୍ଟରେ ଭାରତ ଓ ପାକିସ୍ତାନ ମଧ୍ୟରେ ସଂପର୍କକୁ ନେଇ ମଧ୍ୟ ଆଲୋଚନା ହୋଇଛି । ରିପୋର୍ଟ ଅନୁସାରେ ପାକିସ୍ତାନ ସହିତ ନିୟନ୍ତ୍ରଣ ରେଖାରେ ଭାରତର ସଂଘର୍ଷ ହୋଇପାରେ । ଭାରତ ଓ ପାକିସ୍ତାନ ମଧ୍ୟରେ ୩୦୦୦ କିଲୋମିଟରରୁ ଅଧିକ ସୀମା ରହିଛି । ଏହି ସୀମାରେଖାରେ କିଛି ସ୍ଥାନକୁ ନେଇ ଦୁଇ ଦେଶ ମଧ୍ୟରେ ବିବାଦ ରହିଛି । ବିଶେଷକରି କାଶ୍ମୀରକୁ ନେଇ ଦୁଇ ଦେଶ ମଧ୍ୟରେ ବିବାଦ ରହିଛି । ତେଣୁ ଭବିଷ୍ୟତରେ ଦୁଇ ପରମାଣୁ ରାଷ୍ଟ୍ର ଯୁଦ୍ଧ କରିପାରନ୍ତି ବୋଲି ଆଶଙ୍କା କରାଯାଇଛି । ଏହା ସହିତ ରିପୋର୍ଟରେ ଦାବି କରାଯାଇଛି ଯେ, ବର୍ତ୍ତମାନର ନରେନ୍ଦ୍ର ମୋଦି ସରକାର ପାକିସ୍ତାନକୁ ନେଇ ଉଦାର ନୁହେଁ । ପାକିସ୍ତାନର କୌଣସି ପ୍ରକାରର ହରକତର ଜବରଦସ୍ତ ଉତ୍ତର ଦେବାକୁ ଭାରତ ପ୍ରସ୍ତୁତ ଅଛି । ପାକିସ୍ତାନ ପଟୁ ଯଦି କୌଣସି ଆତଙ୍କବାଦୀ କାର୍ଯ୍ୟକଳାପ ହୁଏ ତେବେ ଭାରତ ଏହା ଦୃଢ଼ ଯବାବ ଦେବ ବୋଲି ରିପୋର୍ଟରେ ଦାବି କରାଯାଇଛି ।