ଆମାଜନ ପ୍ରାଇମର ଯଦି ଆପଣ ଗ୍ରାହକ ତେବେ ’ଦି ଏକ୍ସପେନ୍ସ’ ନାମକ ସିରିଜ୍ ନିଶ୍ଚୟ ନଜରରେ ପଡିଥିବ କିମ୍ବା ଦେଖିଥିବେ । ଏହି ସିରିଜରେ ମଙ୍ଗଳ ଗ୍ରହରେ ହୋଇଥିବା ଏକ ହତ୍ୟାକାଣ୍ଡର ତଦନ୍ତ ପାଇଁ ପୃଥିବୀରୁ ଜଣେ ଡିଟେକ୍ଟିଭ୍ ଯାଆନ୍ତି । ଡିଟେକ୍ଟିଭଙ୍କ ତଦନ୍ତ ସହିତ କାହାଣୀ ଆଗକୁ ବଢେ । ଏହା ଏବେ କଳ୍ପ ବିଜ୍ଞାନର କାହାଣୀ ଲାଗୁଥାଇ ପାରେ । କିନ୍ତୁ ଗୋଟିଏ ସମୟ ଆସିବ ଯେତେବେଳେ ମଣିଷ ମହାକାଶରେ ରହିବ । ଆଉ ସେମାନେ ଛୁଟି କଟାଇବା ପାଇଁ ପୃଥିବୀକୁ ଆସିବେ । ଏଭଳି କହିଛନ୍ତି ଆମାଜନ ତଥା ସ୍ପେସ୍ ଏକ୍ସପେଡିସନ କମ୍ପାନୀ ବ୍ଲୁ ଓରିଜିନର ମାଲିକ ଜେଫ୍ ବେଜୋସ୍ ।
ୱାଂସିଟନରେ ବ୍ଲୁ ଓରିଜିନର ଭବିଷ୍ୟତକୁ ନେଇ ଆୟୋଜିତ ଏକ ଆଲୋଚନାଚକ୍ରରେ ଯୋଗ ଦେଇ ବେଜୋସ କଂପାନୀର ଯୋଜନା, ଅନ୍ତରୀକ୍ଷରେ ଅନୁସଂଧାନ, ପୃଥିବୀକୁ ବଂଚାଇବା ଆଦି ପ୍ରସଙ୍ଗ ଉପରେ ନିଜ ରାୟ ରଖିଥିଲେ । ମହାକାଶରେ ଭବିଷ୍ୟତରେ ମାନବ ବସତିକୁ ନେଇ ସେ ନିଜ ମତ ରଖିଥିଲେ । କହିଥିଲେ ଯେ, ଘର ସବୁ ଭାସମାନ ହେବ । ପୃଥିବୀର ପାଣିପାଗ ଓ ମାଧ୍ୟାକାର୍ଷଣ ଶକ୍ତିର ନକଲ ସେଠାରେ କରାଯିବ । ଭାସମାନ ଘରଗୁଡିକରେ ପ୍ରାୟ ୧୦ ଲକ୍ଷ ଲୋକ ରହିବେ । ସେଠାରେ ଜଙ୍ଗଲ, ନଦୀ ଓ ବନ୍ୟପ୍ରାଣୀ ମଧ୍ୟ ରହିବେ ।
ମହାକାଶରେ ଜନ୍ମ, ପୃଥିବୀକୁ ଆସିବେ ବୁଲିବା ପାଇଁ
ମହାକାଶର ଭାସମାନ ଘରେ ଶତାବ୍ଦୀ ଶତାବ୍ଦୀ ଧରି ମଣିଷ ଜନ୍ମ ନେବେ । ମହାକାଶ ସେମାନଙ୍କ ପାଇଁ ଘର ହେବ । ସେମାନେ ଭାସମାନ ବସ୍ତିରେ ଜନ୍ମ ନେବେ । ଏହାପରେ ପୃଥିବୀ ଯାତ୍ରାରେ ଆସିବେ । ଏହାକିଛି ଏମିତି ହେବ ଯେମିତି ଆମେ ଛୁଟି କାଟିବା ପାଇଁ ବୁଲିବାକୁ ଯାଉ ବୋଲି କହିଛନ୍ତି ବେଜୋସ୍ ।
ଆମାଜାନ ମାଲିକଙ୍କ କହିବା ହେଉଛି କୌଣସି ଅନ୍ୟ ଗ୍ରହକୁ ଯାତ୍ରା କରି ସେଠାରେ ଜୀବନକୁ ପୁଣି ଆରମ୍ଭ କରିବା ଅପେକ୍ଷା ମହାକାଶରେ ମାନବ ବସ୍ତି ବସାଇବା ଅଧିକ ବୁଦ୍ଧିମାନର କାମ ହେବ । ସେ କହିଛନ୍ତି ଯେ, ଯଦି ମଙ୍ଗଳ ଗ୍ରହର ବାତାବରଣକୁ ବଦଳାଇ ଦିଆଯାଏ କିମ୍ବା ସେଭଳି କିଛି ନାଟକୀୟ କରାଯାଏ ତେବେ ତାହା ଅଧିକ ଆହ୍ୱାନମୁଳକ ହେବ ଓ ଅନ୍ୟଏକ ପୃଥିବୀ ତିଆରି କରିବା ଭଳି ହେବ । ତା’ପରେ ସେଠାରେ ୧୦ରୁ ୨୦ ଶହ କୋଟି ଲୋକ ବସବାସ କରି ପାରିବେ ।
ମଙ୍ଗଳକୁ ନେଇ ମସ୍କଙ୍କୁ ନିଶାନା
ସୂଚନାଯୋଗ୍ୟ ଯେ, ପୃଥିବୀ ବାହାରେ ମାନବ ଜୀବନ ବିକାଶକୁ ନେଇ ଜେଫ ବେଜୋସ୍ ଓ ଏଲନ୍ ମସ୍କଙ୍କ ମଧ୍ୟରେ ଗତ କେଇଦିନ ଧରି ବାକଯୁଦ୍ଧ ଚାଲିଛି । ମସ୍କ ଏବେ ବୋଜେସଙ୍କୁ ପଛରେ ପକାଇ ବିଶ୍ୱର ଏକ ନମ୍ବର ଧନୀ ହୋଇଛନ୍ତି । ମସ୍କଙ୍କ ସ୍ପେସ୍ କମ୍ପାନୀ ସ୍ପେସଏକ୍ସ ଓ ବୋଜେସଙ୍କ ବ୍ଲୁ ଓରିଜିନ୍ ମଧ୍ୟରେ ବି ମହାକାଶ ଅଭିଯାନକୁ ନେଇ ପ୍ରତିଦ୍ୱନ୍ଦ୍ୱିତା ଚାଲିଛି । ମସ୍କ ମଙ୍ଗଳରେ ମାନବ ବସତି ବସାଇବା ଯୋଜନା କରୁଛନ୍ତି । ମସ୍କଙ୍କ ମଙ୍ଗଳ ଗ୍ରହରେ ମାନବ ବସତି ଯବାବରେ ବେଜୋସ୍ ମହାକାଶରେ ଭାସମାନ ମାନବ ବସତି ବିଚାର ସାମ୍ନାରେ ରଖିଛନ୍ତି ବୋଲି କୁହାଯାଉଛି ।
