ଜମ୍ମୁ-କାଶ୍ମୀର ଲିବରେସନ ଫ୍ରଣ୍ଟର ମୁଖ୍ୟ ୟାସିନ ମଲ୍ଲିକକୁ ଦିଲ୍ଲୀର ସ୍ପେଶାଲ ଏନଆଇଏ କୋର୍ଟ୍ ୨୦୧୭ ଟେରର ଫଣ୍ଡିଂ ମାମଲାରେ ଆଜିବନ କାରାଦଣ୍ଡରେ ଦଣ୍ଡିତ କରିଛି । ବୁଧବାର ୟାସିନ ମଲ୍ଲିକକୁ ସଜ୍ଜା ମିଳିବା ପରେ କାଶ୍ମୀରରେ ଚାପା ଉତ୍ତେଜନା ପ୍ରକାଶ ପାଇଛି । କାଶ୍ମୀରରେ ହିନ୍ଦୁଙ୍କ ପଳାୟନ ପାଇଁ ସର୍ବାଧିକ ଦାୟୀ ୟାସିନ କିଛିଙ୍କ ପାଇଁ ସ୍ୱାଧିନତା ସଂଗ୍ରାମୀ । ୟାସିନ ମଲ୍ଲିକକୁ ଦଣ୍ଡ ମିଳିବା ପରେ ଏବେ ଏହି ପୁରୁଣା ଜିହାଦୀକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଅନେକ ୟାସିନର ଅତିତ ବିଶୟରେ ଜାଣିବାକୁ ଚାହାନ୍ତି । ଆସନ୍ତୁ ଜାଣିବା ୟାସିନ୍ କିଏ ଓ କେମିତି ସେ କାଶ୍ମୀର ପଣ୍ଡିତଙ୍କ ପାଇଁ ଆତଙ୍କର କାରଣ ହୋଇଥିଲା ।
ୟାସିନ୍: ୩୦ ବର୍ଷ ତଳର ଇତିହାସ
ୟାସିନ୍ ମୁଳତଃ ଶ୍ରୀନଗରର ବାସିନ୍ଦା । ତା’ ଉପରେ ୪ ଜଣ ବାୟୁସେନା ଅଧିକାରୀଙ୍କ ହତ୍ୟା ସମେତ ଆହୁରି ବହୁତ ଜଘନ୍ୟ ଅଭିଯୋଗ ରହିଛି । ଏପ୍ରିଲ ୩ ତାରିଖ ୧୯୬୬ରେ ୟାସିନର ଜନ୍ମ । ଶ୍ରୀନଗରର ମାୟସୁମାରେ ଜନ୍ମିତ ୟାସିନର ପିତା ସରକାରୀ ବସ୍ ଡ୍ରାଇଭର ଥିଲେ । ୧୯୮୦ ଦଶକରେ ୟାସିନ ଆତଙ୍କବାଦର ରାସ୍ତା ଧରିଥିଲା । ସେ ସେତେବେଳେ ତାଲା ପାର୍ଟି ନାମକ ଏକ ଦଳ ଗଠନ କରିଥିଲେ । ୧୯୮୩ ମସିହା ଭାରତ-ୱେଷ୍ଟ ଇଣ୍ଡିଜ୍ ମ୍ୟାଚ୍ କାଳରେ ହଙ୍ଗାମା ସୃଷ୍ଟି କରି ସେ ଚର୍ଚ୍ଚାକୁ ଆସିଥିଲା । ୧୯୮୪ରେ ଜେକେଏଲଏଫର ମୁଖ୍ୟ ମକବୁଲ ଭଟ୍ଟର ଫାଶୀ ପରେ ସେ ଖୋଲାଖୋଲି ଭାରତକୁ ବିରୋଧ କରିବା ଆରମ୍ଭ କରିଥିଲା ।
ବିଚାରପତି ନିଲକଣ୍ଠ ଗଂଜୁ ଏହି ଫାଶୀ ଆଦେଶ ଦେଇଥିଲେ । ଯାହାକୁ ବିରୋଧ କରି ୟାସିନ୍ ଜେଲକୁ ଯାଇଥିଲା । ଜେଲରୁ ମୁକୁଳିବା ପରେ ୟାସିନ୍ ନିଜ ଦଳର ନାମ ଇସଲାମିକ ଷ୍ଟଡେଣ୍ଟ୍ ଲିଗ୍ କରିଥିଲା । ଏହି ସମୟରେ ତା’ ସହିତ ଜାଭେଦ ମିର, ଅଫଫାକ୍ ବାନି ଓ ଅବଦୁଲ୍ ହମିଦ ଶେଖ ଭଳି ଆତଙ୍କବାଦୀ ଯୋଡି ହୋଇଥିଲେ । ଅଶଫାକ ବାନି ହିଁ ୧୯୮୯ରେ ତତ୍କାଳୀନ କେନ୍ଦ୍ର ଗୃହମନ୍ତ୍ରୀ ମୁଫତି ମହମ୍ମଦ ସାଇଦଙ୍କ ଝିଅର ଅପହରଣ କରିଥିଲା ।
ୟୁସୁଫ ଶାହାରୁ ଆତଙ୍କବାଦୀ ସାଲ୍ଲାଉଦ୍ଦିନ୍
୧୯୮୬ ବିଧାନସଭା ନିର୍ବାଚନରେ ସେ କଂଗ୍ରେସ ବିରୋଧରେ ପ୍ରଚାର କରିଥିଲା । ଏହି ସମୟରେ ସେ ମୁସଲିମ୍ ୟୁନାଇଟେଡ୍ ଫ୍ରଣ୍ଟ ଜଏନ କରିଥିଲା । ଏହି ଫ୍ରଣ୍ଟର ଜଣେ ପ୍ରାର୍ଥୀ ଥିଲା ମହମ୍ମଦ ୟୁଶୁଫ ଶାହା । ୟାସିନ ମହମ୍ମଦ ୟୁଶୁଫ ସାହାର ବୁଥ୍ ଏଜେଣ୍ଟ୍ ଥିଲା । ଭୋଟ୍ ଗଣତି ଦିନ ଦି’ପହର ପର୍ଯ୍ୟନ୍ତ ୟୁସୁଫ ଆଗୁଆ ଥିଲା । କିନ୍ତୁ ଅଚାନକ ସେ ହାରି ଯାଇଥିଲା । ପରାଜିତ ୟୁସୁଫ୍ ପାକିସ୍ତାନକୁ ଚାଲିଯାଇଥିଲା । ସେଠାରେ ଆଇଏସଆଇ ଆଶ୍ରୟରେ ହିଜବୁଲ ମୁଜାହିଦ୍ଦିନ ନାମକ ସଂଗଠନ ତିଆରି କରିଥିଲା । ଆଉ ତା’ର ନାମ ବଦଳି ହୋଇଥିଲା ସାଲ୍ଲାଉଦ୍ଦିନ୍ । ଏହି ସାଲ୍ଲାଉଦ୍ଦିନ ପରବର୍ତି କାଳରେ କାଶ୍ମୀରରେ ଆତଙ୍କ ସୃଷ୍ଟି କରିଥିଲା ।
୧୯୮୮ରେ ପାକିସ୍ତାନକୁ ପଳାୟନ
ୟୁସୁଫ ଭଳି ୟାସିନ ମଧ୍ୟ ୧୯୮୮ରେ ପାକିସ୍ତାନକୁ ଚାଲିଯାଇଥିଲା । ସେଠାରେ ପାକ୍ ଅଧିକୃତ କାଶ୍ମୀରରେ ପ୍ରଶିକ୍ଷଣ ନେଇ ଭାରତ ଫେରିଥିଲା । ତାକୁ ଆଇଏସଆଇ ଜେକେଏଲଏଫର ଏରିଆ କମାଣ୍ଡର କରିଥିଲା । ସେ ମଧ୍ୟ ଅଫଫାକ, ହମିଦ ଓ ଜାଭେଦ ସହିତ ମିଶି ହାଜି ନାମକ ଗୋଷ୍ଠୀ ତିଆରି କରିଥିଲା । ଏହି ଗୋଷ୍ଠୀ ହିଁ ରୁବିଆ ସଇଦ୍ଙ୍କ ଅପହରଣ କରିଥିଲା ।
ମନମୋହନ ସରକାର ଅମଳରେ ସରକାରୀ ଅତିଥି
କାଶ୍ମୀର ପଣ୍ଡିତ ନିଜ ଅବସ୍ଥା ପାଇଁ ୟାସିନକୁ ଦାୟୀ କରନ୍ତି । ୨୦୦୨ରେ ଅଟଳ ବିହାରୀ ସରକାର ଅମଳରେ ୟାସିନ ଗିରଫ ମଧ୍ୟ ହୋଇଥିଲା । କିନ୍ତୁ ୨୦୦୪ରେ ସରକାର ପରିବର୍ତ୍ତନ ସହିତ କେନ୍ଦ୍ରର କାଶ୍ମୀର ନୀତିରେ ପରିବର୍ତ୍ତନ ଘଟିଥିଲା । ଆଉ ଅଚାନକ ୟାସିନ୍ ଆତଙ୍କବାଦୀରୁ ଗାନ୍ଧିବାଦୀ ପାଲଟି ଯାଇଥିଲା । ମିଡିଆ ମଧ୍ୟ ତା’ର ପୁରୁଣା କୁକୃତ୍ୟକୁ ଭୁଲି ତା’ର ମହିମାମଣ୍ଡନ କରିବା ଆରମ୍ଭ କରିଥିଲା । ଏପରିକି ୨୦୦୬ରେ କାଶ୍ମୀରର ଅନ୍ୟ ବିଛିନ୍ନତାବାଦୀ ନେତାଙ୍କ ସହିତ ୟାସିନକୁ ମନମୋହନ ସିଂହ ନିଜ ସରକାରୀ ବାସଭବନକୁ ନିମନ୍ତ୍ରଣ କରିଥିଲେ । ଏବେ ୟାସିନ ସହିତ ମନମୋହନଙ୍କ ସେହି ଫଟୋ ମିଡିଆରେ ଭାଇରାଲ ହେବାର ଲାଗିଛି ।
