ନୂଆଦିଲ୍ଲୀ : ଦୈନନ୍ଦିନ ଜୀବନରେ ଏବେ ମୋବାଇଲ ବେଶ ଗୁରୁତ୍ୱପୂର୍ଣ୍ଣ । ବିନା ମୋବାଇଲରେ ଘଣ୍ଟାଏ ସମୟ ବିତାଇବା ଗୋଟିଏ ପ୍ରକାର ଅସମ୍ଭବ ହୋଇପଡିଛି । ଏସବୁ ଭିତରେ ମୋବାଇଲ ବ୍ୟବହାରକାରିଙ୍କ ପାଇଁ ଏକ ବଡ଼ ଖବର ଆସିଛି । ଏଣିକି ମୋବାଇଲରେ ବ୍ୟବହାର କରୁଥିବା ସିମ୍ ବଦଳାଇବାକୁ ଚାହୁଁଥିଲେ ନୂଆ ନିୟମ ମାନିବାକୁ ପଡ଼ିବ। ସିମ୍ ପୋର୍ଟିଂ ପାଇଁ ଆଜିଠାରୁ ସାରା ଦେଶରେ ଲାଗୁ ହୋଇଛି ନୂଆ ନିୟମ।
ଏଣିକି ମୋବାଇଲ୍ ନମ୍ବରକୁ ପୋର୍ଟ କରିବାକୁ ଚାହୁଁଥିଲେ ୭ ଦିନର ଅପେକ୍ଷା କରିବାକୁ ପଡ଼ିବ । ସିମ୍ କାର୍ଡ ଜରିଆରେ ହେଉଥିବା ଠକେଇ ଉପରେ ଲଗାମ ଲଗାଇବା ପାଇଁ ଏହି ନିୟମ କଡାକଡି କରାଯାଇଛି । କୌଣସି ଗ୍ରାହକ ନିଜ ନମ୍ବରକୁ ଅପରିବର୍ତ୍ତିତ ରଖି, ଯଦି ଅପରେଟର ବଦଳାଇବାକୁ ଚାହାନ୍ତି, ତେବେ ବାଧ୍ୟତାମୂଳକ ଭାବେ ୭ ଦିନ ଅପେକ୍ଷା କରିବାକୁ ପଡିବ । ଆବଶ୍ୟକୀୟ ପ୍ରମାଣପତ୍ର ଓ ଓଟିପି ଦେଇ ଭେରିଫିକେସନ୍ ପାଇଁ ମଧ୍ୟ ଅପେକ୍ଷା କରିବାକୁ ପଡିବ ।
ଏବେ ସ୍ୱତନ୍ତ୍ର ପୋର୍ଟିଂ କୋର୍ଡ ପାଇଁ ୭ ଦିନ ଭିତରେ ଅନୁରୋଧ କରିବେ ଗ୍ରାହକ । ପୂର୍ବରୁ ଏହି ସମୟ ୧୦ ଦିନ ଥିଲା । ଟେଲିଯୋଗାଯୋଗ ମୋବାଇଲ ନମ୍ବର ପୋର୍ଟେବିଲିଟି ନିୟମ ୨୦୨୪ ରେ ପରିବର୍ତ୍ତନକରି ଏହାକୁ ୭ ଦିନକୁ ବୃଦ୍ଧିକରାଯାଇଛି ।
ଅଂଶୀଦାରଙ୍କ ସହ ଆଲୋଚନା ପରେ ଏହି ନିଷ୍ପତି ନିଆଯାଇଛି । କିଛି ଅଂଶୀଦର ୧୦ ଦିନ ପ୍ରତୀକ୍ଷା ଅବଧିକୁ ସମର୍ଥନ କରୁଥିଲେ । ଅନ୍ୟ କିଛି ପକ୍ଷ ଏହାକୁ ୪ ଦିନ ହ୍ରାସ କରି ୬ ଦିନ କରିବାକୁ ପ୍ରସ୍ତାବ ଦେଇଥିଲେ । ହେଲେ ଭାରତୀୟ ଟେଲିକମ୍ ନିୟାମକ କର୍ତ୍ତୃପକ୍ଷ ଅର୍ଥାତ୍ ଟ୍ରାଇ ତାକୁ ୭ ଦିନ ଧାର୍ଯ୍ୟ କରିଛନ୍ତି । ସିମ୍ ଫ୍ରଡ୍ ରୋକିବା ସହିତ ଗ୍ରାହକଙ୍କ ଡାଟା ସୁରକ୍ଷିତ ରଖିବା ପାଇଁ ଟ୍ରାଇ ପକ୍ଷରୁ ଏହି ନିଷ୍ପତି ନିଆଯାଇଛି । ଏହି ନୂଆ ନିୟମ ଗତ ମାର୍ଚ୍ଚ ମାସରୁ ଡ୍ରାଫ୍ଟ ହୋଇସାରିଥିଲା । ଆଜିଠାରୁ ଏହା ବିଧିବଦ୍ଧ ଭାବେ ଲାଗୁ ହୋଇଛି ।
