ନ୍ୟୁୟର୍କ: ଗବେଷଣାରୁ ସ୍ୱଷ୍ଟ ଯେ, ମାଆ କ୍ଷୀର ଶିଶୁ ପାଇଁ ଖୁବ୍ ଉପାଦେୟ । ସେଥିପାଇଁ ନବଜାତ ଶିଶୁମାନଙ୍କୁ ୬ ମାସ ପର୍ଯ୍ୟନ୍ତ କେବଳ ମା’ କ୍ଷୀର ପିଇବାକୁ ଡ଼ାକ୍ତରମାନେ ପରାମର୍ଶ ଦେଇଥାନ୍ତି । କାରଣ ସ୍ତନ୍ୟପାନରେ ପୋଷକତତ୍ତ୍ୱ ଭରପୂର ରହିଛି । କିନ୍ତୁ ଜଣେ ମହିଳା ନିଜ ସ୍ତନକ୍ଷୀରରୁ ସାବୁନ ତିଆରି କରି ଏବେ ଚର୍ଚ୍ଚାକୁ ଆସିଛନ୍ତି । ଏହି ସାବୁନକୁ ଲଗାଇଲେ ଚେହେରାରେ ଚମକ ଆସିବ ବୋଲି ଜୋର ଦେଉଛନ୍ତି ମହିଳା । କେବଳ ସେତିକି ନୁହେଁ, ଏହି ସାବୁନକୁ ବିକ୍ରି କରି ଭଲ ରୋଜଗାର ବି କରୁଛନ୍ତି । ସୋସିଆଲ ମିଡ଼ିଆରେ ଅନ୍ୟ ମହିଳାମାନଙ୍କୁ ଏନେଇ ତାଲିମ ମଧ୍ୟ ଦେଉଛନ୍ତି ।
ୟୁଟ୍ୟୁବ୍ରୁ ଦେଖି ପ୍ରସ୍ତୁତ କଲେ ସାବୁନ
ଆମେରିକାର ବାସିନ୍ଦା ୨୪ ବର୍ଷୀୟା ବ୍ରିଟ୍ନୀ ଏଡି । ତାଙ୍କର ସାତ ମାସର ଏକ ସନ୍ତାନ ରହିଛି । ପିଲାଟି ପୂରା କ୍ଷୀର ପିଉଥିଲା, କିନ୍ତୁ ପରେ କ୍ଷୀର ସଞ୍ଚୟ ହେବାକୁ ଲାଗିଲା । ବ୍ରିଟ୍ନୀ କ୍ଷୀରକୁ କାଡ଼ି ଫ୍ରିଜରେ ରଖିଥିଲେ । ଦିନେ ତାଙ୍କ ସ୍ୱାମୀ ଫ୍ରିଜ୍ ଅନ୍ କରିବାକୁ ଭୁଲିଯାଇଥିଲେ । ଫଳରେ ସବୁ କ୍ଷୀର ନଷ୍ଟ ହୋଇଗଲା । ତା’ପରେ ବ୍ରିଟ୍ନୀ ଏହା ସହିତ କ’ଣ କରିବେ ଇଣ୍ଟରନେଟରେ ଖୋଜିଲେ । ଏହି କ୍ଷୀରରେ ଲେମ୍ବୁ ପକାଇ ଏହାକୁ କ’ଣ କରିହେବ ଉପାୟ ଦେଖିଲେ । ପରେ ୟୁଟ୍ୟୁବରେ ଏକ ଭିଡ଼ିଓ ଦେଖିବାକୁ ପାଇଲେ, ଯେଉଁଥିରେ ଜଣେ ମହିଳା ତାଙ୍କ ସ୍ତନ୍ୟକ୍ଷୀରରୁ ସାବୁନ ତିଆରି କରିଛନ୍ତି । ବ୍ରିଟ୍ନୀ ଏହି ଉପାୟଟି ମନକୁ ଛୁଇଁଲା । ତେଣୁ ସେ ନିଜ ସ୍ତନକ୍ଷୀରରୁ ସାବୁନ ତିଆରି କରିବାକୁ ନିଷ୍ପତ୍ତି ନେଲେ । ପରେ ନିଜ ପିଲାକୁ କ୍ଷୀର ଦେବା ପରେ ବଳକା କ୍ଷୀରରେ ସାବୁନ ତିଆରି କଲେ ।
ଦୂର ହେବ ଷ୍ଟ୍ରେଚ୍ ମାର୍କ
ବ୍ରିଟ୍ନୀ କହିଛନ୍ତି ଯେ, ସ୍ତନକ୍ଷୀରରେ ଅନେକ ଉପାଦାନ ଥାଏ । ଏଥିରେ ଲରିକ୍ ଏସିଡ୍ ମଧ୍ୟ ଥାଏ, ଯାହାର ଆଣ୍ଟିିବ୍ୟାକ୍ଟେରିଆଲ ଗୁଣ ଅଛି । ଏହା ଚର୍ମକୁ ଥଣ୍ଡା କରିବାରେ ସାହାଯ୍ୟ କରିଥାଏ । ସେ ତାଙ୍କ ମୁହଁରେ ସ୍ତନକ୍ଷୀରରୁ ପ୍ରସ୍ତୁତ ସାବୁନ ବ୍ୟବହାର କରିବା ମାତ୍ରେ କୁଣ୍ଡେଇ ହେବା ବନ୍ଦ ହୋଇଯାଏ । ଚର୍ମରେ ଷ୍ଟ୍ରେଚ ମାର୍କ ଅଦୃଶ୍ୟ ହୁଏ । ଶୁଖିଲା ଚର୍ମ ମଧ୍ୟ ଉନ୍ନତି ଆରମ୍ଭ କରେ । ଏହି ସାବୁନ ଚର୍ମକୁ ସୁନ୍ଦର କରିଥାଏ ଏବଂ ଏହା ମଧ୍ୟ ଦୀର୍ଘ ସମୟ ପର୍ଯ୍ୟନ୍ତ ସୁରକ୍ଷିତ ରହିଥାଏ ବୋଲି କହିଛନ୍ତି ।
ଏହାର ଦାମ୍ ୨,୪୯୩ ଟଙ୍କା
କେବଳ ସେତିକି ନୁହେଁ, ବ୍ରିଟ୍ନୀ ଅନଲାଇନ ପ୍ଲାଟଫର୍ମରେ ଅନେକ କ୍ଷୀର ବିକୁଛନ୍ତି । ଗୋଟିଏ ବାର ସାବୁନ ମୂଲ୍ୟ ୩୦ ଡଲାର । ଅର୍ଥାତ୍ ଭାରତୀୟ ମୁଦ୍ରାରେ ଏହାର ଦାମ୍ ୨,୪୯୩ ଟଙ୍କା । ସେହିପରି ଡାଏପର କ୍ରିମ୍ ଏବଂ ଲୋସନର ମୂଲ୍ୟ ୧୫ ଡଲାର । ଏହାକୁ କିଣିବା ପାଇଁ ଲୋକଙ୍କ ମଧ୍ୟରେ ବହୁତ ଉତ୍ସାହ ଅଛି । ଏହି ସାବୁନକୁ ବିଭିନ୍ନ ଆକାରରେ କିଣାଯାଇପାରିବ ।
ଚେତାବନୀ ଦେଇଛନ୍ତି ବୈଜ୍ଞାନିକ
ଅନ୍ୟପଟେ, ବୈଜ୍ଞାନିକମାନେ ଏ ବିଷୟରେ ଚେତାବନୀ ଦେଇଛନ୍ତି । ସେ ବିଶ୍ୱାସ କରନ୍ତି ସ୍ତନ୍ୟକ୍ଷୀରରେ ବିଭିନ୍ନ ପ୍ରକାରର ପୋଷକତତ୍ତ୍ୱ ଥାଏ । କିନ୍ତୁ ସାବୁନ ତିଆରି ପ୍ରକ୍ରିୟାରେ ପୋଷକତତ୍ତ୍ୱ ନଷ୍ଟ ହୋଇଯାଇଥାଏ । ଦୁଇ ବର୍ଷ ପୂର୍ବେ ଜଣେ ଚାଇନିଜ ମହିଳାଙ୍କ ଭିଡିଓ ଭାଇରାଲ ହୋଇଥିଲା । ସେ ମଧ୍ୟ ତାଙ୍କ ସ୍ତନକ୍ଷୀରରୁ ସାବୁନ ତିଆରି କରି ବିକ୍ରି କରୁଥିଲେ । ତେବେ ପରେ ସରକାର ଏହାକୁ ବାରଣ କରିଥିଲେ ।
