ମାର୍କ୍ ଜୁକରବର୍ଗଙ୍କ (Mark Zuckerberg) ଫେସବୁକ୍ ନିଜ ନାମ ବଦଳାଇବ । ଏଥିପାଇଁ ଜୁକରବର୍ଗ ପ୍ରସ୍ତୁତି ମଧ୍ୟ ଆରମ୍ଭ କରିସାରିଲେଣି । ଦି ଭର୍ଜର ଏକ ରିପୋର୍ଟ ଅନୁସାରେ ସେ ଏମିତି ଗୋଟିଏ ନାଁ ଖୋଜୁଛନ୍ତି ଯାହା ତାଙ୍କର ଆଗାମୀ ପ୍ରୋଜେକ୍ଟ ମେଟାଭର୍ସ ସହିତ ଫେସବୁକର ସମ୍ପର୍କକୁ ଦେଖାଉଥିବ । କୁହାଯାଉଛି ଯେ, ଅକ୍ଟୋବର ୨୮ ତାରିଖ ଦିନ ଫେସବୁକର ବାର୍ଷିକ କନେକ୍ଟ କନଫରେନ୍ସରେ ଏନେଇ ସୂଚନା ଦେଇପାରନ୍ତି । ନାମ ବଦଳାଇବା ପଛରେ ଫେସବୁକର ଉଦ୍ଦେଷ୍ୟ ହେଉଛି ନିଜକୁ ସୋସିଆଲ ମିଡିଆ ପ୍ଲାଟଫର୍ମରୁ ଆଗକୁ ନେବା ।
ଫେସବୁକର ଲକ୍ଷ୍ୟ ହେଉଛି ଆଲ୍ଫାବେଟ୍ ଇଂକ୍ ଭଳି ହୋଲ୍ଡିଂ କମ୍ପାନୀ ଛିଡା କରିବା । ଯାହା ପାଖରେ ଗୁଗୁଲ ଭଳି କମ୍ପାନୀ ରହିଛି । ଜୁକରବର୍ଗ ଜୁଲାଇ ମାସରେ ହିଁ କହିଥିଲେ ଯେ, ଫେସବୁକର ଭବିଷ୍ୟ ‘ମେଟାଭର୍ସ’ରେ ହିଁ ନିହିତ ଅଛି । ତେବେ ଏଇଠି ଗୋଟିଏ ମନେ ରଖିବା ଭଳି କଥା ହେଉଛି ଯେ, ଫେସବୁକ ସିଲିକନ୍ ଭ୍ୟାଲିର ପ୍ରଥମ କମ୍ପାନୀ ନୁହେଁ ଯାହା ନିଜ ନାମ ବଦଳାଇବାକୁ ଯାଉଛି । ଏହା ପୂର୍ବରୁ ମଧ୍ୟ ଆଜିର ସମୟର ଅନେକ ଜଣାଶୁଣା କମ୍ପାନୀ ନିଜ ନାମ ବଦଳାଇଛନ୍ତି । ଆସନ୍ତୁ ଜାଣିବା ନିଜ ନାମ ବଦଳାଇଥିବା ସେହି ସବୁ କମ୍ପାନୀଙ୍କ ବାବଦରେ କିଛି ରୋଚକ କଥା…
ଗୁଗଲର ପୁରୁଣା ନାମ ବ୍ୟାକରବ୍
ଗୁଗଲ ଯେତେବେଳେ ଲଂଚ୍ ହୋଇଥିଲା ସେତେବେଳେ ଏହାର ନାମ କିଛି ଅଲଗା ଥିଲା । ସେତେବେଳେ ଏହାର ନାମ ଥିଲା ବ୍ୟାକରବ୍ । ପରେ ବ୍ୟାକରବ ନାଁ ବଦଳି ହୋଇଥିଲା ଗୁଗଲ । ତେବେ ରୋଚକ କଥା ହେଉଛି ଗୁଗଲ ନାମ ଭୁଲ୍ ସ୍ପେଲିଂ କାରଣରୁ ପଡିଥିଲା । ଗୁଗଲର ପ୍ୟାରେଣ୍ଟ୍ କମ୍ପାନୀ ହେଉଛି ଆଲଫାବ୍ୟାଟ୍ ଇଂକ୍ । ଯାହାର ବର୍ତ୍ତମାନର ସିଇଓ ହେଉଛନ୍ତି ସୁନ୍ଦର ପିଚାଇ
ଇନଷ୍ଟାଗ୍ରାମ
ଇନଷ୍ଟାଗ୍ରାମରେ ନିଶ୍ଚିତ ଭାବେ ଆପଣ ନିଜ ଫଟୋ ଅପଲୋଡ୍ କରିଥିବେ । ନିଜ ଚିହ୍ନା ପରିଚୟଙ୍କ ପାଖରେ ନିଜ ବାବଦରେ ସୂଚନା ଦେବାର ମାଧ୍ୟମ ଭାବେ ଏହା ବେସ ଲୋକପ୍ରିୟ ହୋଇ ପାରିଛି । କିନ୍ତୁ ଦିନେ ଇନଷ୍ଟାଗ୍ରାମ୍ ଫ୍ଲପ୍ ଥିଲା । ଏହାର ପ୍ରଥମ ନାମ ଥିଲା ବର୍ବନ । ତେବେ ବହୁ ଚେଷ୍ଟା ପରେ ବି ଯେତେବେଳେ ଆପ୍ କ୍ଲିକ୍ କଲା ନାହିଁ ସେତେବେଳେ ଏହାର ପ୍ରତିଷ୍ଠାତା ଦ୍ୱୟ କେଭିନ୍ ସିଷ୍ଟ୍ରୋମ ଓ ମାଇକ୍ କ୍ରିଗର ବର୍ବନର ନାଁ ବଦଳାଇ ଇନଷ୍ଟାଗ୍ରାମ୍ କରିଥିଲେ । ଯାହାକି ହିଟ୍ ସାବ୍ୟସ୍ତ ହୋଇଥିଲା । ପରେ ଇନଷ୍ଟାଗ୍ରାମକୁ ଜୁକରବର୍ଗ କିଣିନେଇଥିଲେ ।
ଜୋମାଟୋ ବି ନାଁ ବଦଳାଇଛି
ପ୍ରବଳ ଭୋକ ବେଳେ ଜୋମାଟୋରେ ଲଗ୍ ଇନ୍ ତ କେବେ ନା କେବେ କରିଥିବେ । କିନ୍ତୁ ଜାଣିକରି ଆଶ୍ଟର୍ଯ୍ୟ ହେବେ ଜୋମାଟୋର ପ୍ରଥମ ନାଁ କ୍ଲିକ୍ କରିନଥିଲା । ତେଣୁ ଏହାର ନାଁ କମ୍ପାନୀ ବଦଳାଇଥିଲା । ଜୋମାଟୋର ପ୍ରଥମ ନାମ ଥିଲା ଫୁଡିବେ ।
ଆମାଜନର ଆମାଜିଂ ଷ୍ଟୋରି
ଏଥର ଚାଲନ୍ତୁ ଜାଣିବା ଆମାଜନର ଆମାଜିଂ ଷ୍ଟୋରି ବାବଦରେ । ବର୍ତ୍ତମାନ ସମୟରେ ସ୍ମାର୍ଟ ଫୋନ୍ ଧରୁଥିବା ଏମିତି ଜଣେ ବି କେହି ନଥିବେ ଯିଏ ଆମାଜନ ନାଁ ଶୁଣିନଥିବେ । ଆମାଜନ ହେଉଛି ଦୁନିଆର ପ୍ରସିଦ୍ଧ ଓ କୁଖ୍ୟାତ ଅନଲାଇନ୍ ଷ୍ଟୋର । ଯାହାକୁ ଭାରତରେ ଇଷ୍ଟ ଇଣ୍ଡିଆ କମ୍ପାନୀ ୨.୦ (ଟୁ ପଏଣ୍ଟ ଜିରୋ) ବୋଲି ମଧ୍ୟ ନିକଟରେ ଏକ ଭାରତୀୟ ପତ୍ରିକା କହିଥିଲା । ପତ୍ରିକାର ଅଭିଯୋଗ ଯେ, ଆମାଜନ ଭାରତୀୟ ବ୍ୟବସାୟର ହତ୍ୟା କରୁଛି । ଯେଉଁ ଆମାଜନକୁ ନେଇ ଏତେ ଚର୍ଚ୍ଚା ସେହି ଆମାଜନ ପ୍ରଥମେ ବହି ବିକୁଥିଲା । ତାହା ପୁଣି ଗୋଟିଏ ଗ୍ୟାରେଜରୁ । ଏବେ କିନ୍ତୁ ଆମାଜନ ଦୁନିଆର ସବୁଠାରୁ ବଡ ଅନଲାଇନ୍ ରିଟେଲର । ତେବେ ଆମାଜନ ଜନ୍ମ ହେବା ବେଳେ ଏହାର ନାମ ଥିଲା କାଡବ୍ରା ଇଂକ୍ । ଜନ୍ମର କେଇ ମାସ ପରେ ମାଲିକ ଜୋଫ୍ କାଡବ୍ରାର ନାଁ ବଦଳାଇ କରିଦେଇଥିଲେ ଆମାଜନ. ଡଟ୍ କମ । ଆଉ ବାକି କଥା ଇତିହାସ । ଏବେ ଆମାଜନ ସବୁ ଦେଶରେ ନିଜ ବେପାର ଜମେଇକି ବସିଛି ।
ବ୍ରାଡସ ଡ୍ରିଙ୍କରୁ ପେପସି କୋଲା- ପେପସି କୋଲାରୁ ପେପସି
ଆମାଜନ ଭଳି ଆଉ ଗୋଟିଏ ମଲ୍ଟି ନ୍ୟାସନାଲ କମ୍ପାନୀ ହେଉଛି ପେପ୍ସି । କୋକାକୋଲର ପୁରୁଣା ଦୁଶମନ । କୁହାଯାଏ କୋକାକୋଲା ଓ ପେପସି ଭିତରେ ବ୍ୟବସାୟୀକ ଲଢେଇ ପାଇଁ ଦେଶରେ ସରକାର ବଦଳି ଯାଏ । ଗୋଟିଏ ହିସାବ ଅନୁସାରେ କଲମ୍ବିଆ ଭଳି ଦେଶରେ କୋକାକୋଲା ଓ ପେପସି କିଏ ରାଷ୍ଟ୍ରପତି ହେବ ତାହା ନିଷ୍ପତି ନିଅନ୍ତି । ୧୯୯୦ ଦଶକରେ ପେପସି ଭାରତକୁ ଆସିଥିଲା । ମାନେ ଜନ୍ମର ପାଖାପାଖି ୧୦୦ ବର୍ଷ ପରେ ପେପସି ଭାରତ ଆସିଥିଲା । ପେପସିର ଜନ୍ମ ଆମେରିକାର ୧୮୯୩ ମସିହାରେ ହୋଇଥିଲା । ଜନ୍ମ ବେଳେ ଏହାର ନାମ ଥିଲା ବ୍ରାଡସ ଡ୍ରିଙ୍କ୍ । କୋକାକୋଲାକୁ ଟକର ଦେବାକୁ ୫ ବର୍ଷ ପରେ ବ୍ରାଡସର ନାଁ ବଦଳାଇ ରଖା ଯାଇଥିଲା ପେପସି କୋଲା । ୧୯୬୧ ମସିହାରେ ପୁଣିଥରେ ପେପସି ତା’ ନବଦଳାଇଥିଲା । ପେପସି କୋଲାରୁ କୋଲାକୁ କାଟି ଖାଲି ପେପସି ରଖାଯାଇଥିଲା ।
