ମୁମ୍ବାଇ: ବଲିଉଡ ଅଭିନେତା ପଙ୍କଜ ତ୍ରିପାଠୀ ନିଜର ବଳିଷ୍ଠ ଅଭିନୟ ପାଇଁ ବେଶ ଜଣାଶୁଣା । ପଙ୍କଜ ବଲିଉଡରେ ଅନେକ ସୁପରହିଟ୍ ଫିଲ୍ମ କରିଛନ୍ତି । ନିକଟରେ ପଙ୍କଜ ଓଏମଜି ୨ ଏବଂ ଫୁକରେ ୩ ଚଳଚ୍ଚିତ୍ରରେ ନଜର ଆସିଥିଲେ । ଏହି ଦୁଇଟି ଚଳଚ୍ଚିତ୍ର ବକ୍ସ ଅଫିସରେ ହିଟ୍ ହୋଇଥିଲା । ସବୁଥର ପରି ପଙ୍କଜ ତ୍ରିପାଠୀଙ୍କ ଅଭିନୟକୁ ବହୁତ ପ୍ରଶଂସା କରାଯାଇଥିଲା । ତେବେ ବର୍ତ୍ତମାନ ପଙ୍କଜ ତ୍ରିପାଠୀ ପୂର୍ବତନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀଙ୍କ ଜୀବନୀ ଉପରେ ଆଧାରିତ ଏକ ଫିଲ୍ମ ପାଇଁ ପ୍ରସ୍ତୁତ ହେଉଛନ୍ତି । ସେ ‘ମେଁ ଅଟଳ ହୁଁ’ ଫିଲ୍ମରେ ଅଟଳ ବିହାରୀ ବାଜପେୟୀଙ୍କ ଭୂମିକାରେ ଅଭିନୟ କରିବେ । ଏହି ଚଳଚ୍ଚିତ୍ରର ନିର୍ଦ୍ଦେଶନା ଦେଇଛନ୍ତି ରବି ଯାଦବ । ଏଥି ସହିତ ସେ ନିକଟରେ ଫିଲ୍ମ ବିଷୟରେ ଅନେକ ଖୁଲାସା କରିଛନ୍ତି ଏବଂ ପୂର୍ବତନ ପ୍ରଧାନମନ୍ତ୍ରୀଙ୍କ ଭୂମିକା ପାଇଁ ସେ କେତେ ପରିଶ୍ରମ କରିଛନ୍ତି ତାହା ମଧ୍ୟ କହିଛନ୍ତି ।
କେବଳ ଖେଚୁଡି ଖାଇ ନିଜକୁ କରୁଥିଲେ ପ୍ରସ୍ତୁତ
ପଙ୍କଜ ତ୍ରିପାଠୀ ଏକ ସାକ୍ଷାତକାରରେ କହିଛନ୍ତି ଯେ, ମୁଁ ଏହି ଫିଲ୍ମ ପାଇଁ ପ୍ରାୟ ୬୦ ଦିନ ସୁଟିଂ କରିଥିଲି । ସେହି ସମୟରେ ମୁଁ କେବଳ ଖେଚୁଡ଼ି ଖାଇଥିଲି ଏବଂ ମୁଁ ଏହାକୁ ନିଜେ ପ୍ରସ୍ତୁତ କରିଥିଲି । ଫିଲ୍ମ ପ୍ରସ୍ତୁତି ସମୟରେ ସେ କାହିଁକି ଖାଦ୍ୟ ନିଜେ ରାନ୍ଧିଥିଲେ ସେ ବିଷୟରେ ମଧ୍ୟ ସୂଚନା ଦେଇଥିଲେ । ସେ କହିଥିଲେ ଯେ ଅନ୍ୟମାନେ ଏହାକୁ କିପରି କରିବେ ତାହା ଆପଣ ଜାଣିପାରିବେ ନାହିଁ । ମୁଁ ଏଥିରେ କୌଣସି ତେଲ କିମ୍ବା ମସଲା ମିଶାଇନଥିଲି । ଖେଚୁଡ଼ି ପାଇଁ ମୁଁ କେବଳ ଡାଲି, ଚାଉଳ ଏବଂ ପନିପରିବା ବ୍ୟବହାର କରିଥିଲି । ଏହି ସମୟ ମଧ୍ୟରେ ସେ ଏହା ମଧ୍ୟ କହିଛନ୍ତି ଯେ ଅଭିନେତାମାନେ ସେମାନଙ୍କର ଖାଦ୍ୟ ଏବଂ ପାନୀୟ ପ୍ରତି ସମ୍ପୂର୍ଣ୍ଣ ଧ୍ୟାନ ଦେବା ଉଚିତ୍ । ସେମାନଙ୍କର ସ୍ୱାସ୍ଥ୍ୟ ଏବଂ ମନ ମଧ୍ୟରେ ସନ୍ତୁଳନ ବଜାୟ ରଖିବା ପାଇଁ ଅଭିନେତାମାନେ ସର୍ବଦା ହାଲୁକା ଖାଦ୍ୟ ଖାଇବା ଉଚିତ୍ । ଉଲ୍ଲେଖ ଥାଉ କି ଯେ ‘ମେଁ ଅଟଳ ହୁଁ’ ଫିଲ୍ମରେ ପଙ୍କଜ ତ୍ରିପାଠୀ ଅଟଳ ବିହାରୀ ବାଜପେୟୀଙ୍କ ଭୂମିକାରେ ନଜର ଆସିବେ । ଏହି ଚଳଚ୍ଚିତ୍ର ଚଳିତ ବର୍ଷ ୨୫ ଡିସେମ୍ବରରେ ମୁକ୍ତିଲାଭ କରିବ ।
