ନୂଆଦିଲ୍ଲୀ: ସଫଳ ହେଲା ଦ୍ରୁତ ବୋଲର ମହମ୍ମଦ ଶାମିଙ୍କ ଅସ୍ତ୍ରୋପଚାର । ତାଙ୍କର ଗୋଇଠିରେ ଅସ୍ତ୍ରୋପଚାର କରାଯାଇଛି । ସେ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଫଟୋ ସେୟାର କରି ତାଙ୍କ ଚିକିତ୍ସା ବିଷୟରେ ସୂଚନା ଦେଇଛନ୍ତି । ଶାମି କହିଛନ୍ତି, ମୋ ଗୋଇଠିରେ ହୋଇଥିବା ଅସ୍ତ୍ରୋପଚାର ସଫଳ ହୋଇଛି ଏବଂ ମୁଁ ସୁସ୍ଥ ଅଛି । ସମ୍ପୂର୍ଣ୍ଣ ସୁସ୍ଥ ହେବାକୁ କିଛି ସମୟ ଲାଗିବ । କିନ୍ତୁ କ୍ରିକେଟ ପଡ଼ିଆକୁ ଖୁବ୍ଶୀଘ୍ର ଫେରିବେ ବୋଲି ବିଶ୍ୱାସ ରଖିଛନ୍ତି ।
ଆହତ ଗୋଡରେ ଖେଳିଥିଲେ ବିଶ୍ୱକପ
୧୯ ନଭେମ୍ବରରେ ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ଏକ ଦିବସୀୟ ବିଶ୍ୱକପ ଫାଇନାଲ ୨୦୨୩ ସମୟରେ ଶାମି ଆହତ ହୋଇଥିଲେ । ସେ ଆହତ ଗୋଡରେ ବିଶ୍ୱକପରେ ଖେଳିଥିଲେ । ଟୁର୍ନାମେଣ୍ଟରେ ଚମତ୍କାର ପ୍ରଦର୍ଶନ କରି ସାତୋଟି ମ୍ୟାଚରେ ୨୪ ୱିକେଟ ନେଇଥିଲେ । ସେ ହିଁ ବୋଲର ଯିଏ ସର୍ବାଧିକ ୱିକେଟ ନେଇଥିଲେ । ଏହା ପରଠାରୁ ସେ କ୍ରମାଗତ ଭାବେ କ୍ରିକେଟ ଆକ୍ସନ ଠାରୁ ଦୂରରେ ଅଛନ୍ତି । ଆଇପିଏଲ ୨୦୨୪ ଆରମ୍ଭ ହେବାକୁ ପ୍ରାୟ ଏକ ମାସ ବାକି ଅଛି । ଏହାପୂର୍ବରୁ, ୨୦୨୨ର ଚାମ୍ପିଅନ ଦଳ ଏବଂ ୨୦୨୩ ଗୁଜୁରାଟ ଟାଇଟାନ୍ସର ରନରଅପ ଏକ ବଡ଼ ଅସୁବିଧାର ସମ୍ମୁଖୀନ ହୋଇଥିଲେ ।
ସମଗ୍ର ଆଇପିଏଲ ସିଜନ୍ରେ ବାଦ ପଡ଼ିଛନ୍ତି ଶାମି
ଶାମିଙ୍କ ବାମ ଗୋଡରେ ଆଘାତ ଲାଗିଥିବାରୁ ସମଗ୍ର ଆଇପିଏଲ ସିଜନରେ ବାଦ ପଡିଛନ୍ତି । ଆହତ କାରଣରୁ ଶାମି ଦକ୍ଷିଣ ଆଫ୍ରିକା ଗସ୍ତ ପାଇଁ ମଧ୍ୟ ମନୋନୀତ ହୋଇନଥିଲେ । ଏହା ବ୍ୟତୀତ ସେ ଇଂଲଣ୍ଡ ବିପକ୍ଷ ଟେଷ୍ଟ ସିରିଜରୁ ମଧ୍ୟ ବାହାରେ ଥିଲେ । ଗୁଜୁରାଟ ପାଇଁ ଶାମିଙ୍କ ଅନୁପସ୍ଥିତି ଅତ୍ୟନ୍ତ କ୍ଷତିକାରକ ହୋଇପାରେ । ହାର୍ଦ୍ଦିକ ପାଣ୍ଡ୍ୟା ଗୁଜୁରାଟ ଛାଡି ମୁମ୍ବାଇ ଇଣ୍ଡିଆନ୍ସ ଯିବା କାରଣରୁ ଦଳ କ୍ଷତିର ସମ୍ମୁଖୀନ ହୋଇଛି । ଗୁଜୁରାଟର ଅଧିନାୟକ ଥିବା ହାର୍ଦ୍ଦିକଙ୍କୁ ଗତ ବର୍ଷ ନିଲାମ ପୂର୍ବରୁ ମୁମ୍ବାଇ ଦ୍ୱାରା ଜିଟିରେ ଟ୍ରେଡ କରାଯାଇଥିଲା ।
