ଇଞ୍ଜିନରୁ ଗାଏବ ହୋଇଯାଇଥିଲା ‘ଟ୍ୟାଙ୍କ୍ ମ୍ୟାନ୍’

ଗୁଗୁଲ, ଟ୍ୱିଟର, ଫେସବୁକ୍ । ଏହି ସବୁ କମ୍ପାନୀଙ୍କ ମଧ୍ୟରେ ଦୁଇଟି ସମାନତା ରହିଛି । ପ୍ରଥମତଃ ଏହି କମ୍ପାନୀ ସବୁ ଆମେରିକରୁ ଆସନ୍ତି । ଦ୍ୱିତୀୟତଃ ଏମାନେ ସ୍ୱାଧିନ ଅଭିବ୍ୟକ୍ତି ଉପରେ କାଳେ ଅଧିକ ଗୁରୁତ୍ୱ ଦିଅନ୍ତି  । ଭାରତ ସରକାରଙ୍କ ସହିତ ନୂଆ ଆଇଟି ନିୟମକୁ ନେଇ ଟ୍ୱିଟରର ଏବେ ଯୁଦ୍ଧ ଚାଲିଛି । କିନ୍ତୁ ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଯେ ଏମାନଙ୍କ ମଧ୍ୟରୁ ଅନେକ ଚୀନର ଅପରେଟ୍ କରନ୍ତି ନାହିଁ । ଆଉ ଯିଏ ଅପରେଟ୍ କରେ ସିଏ ଚୀନର କଠୋର ନିୟମକୁ ଲାଲ ସଲାମ ପକାଇ ମାନିଚଳେ । ଯାହାର ତାଜା ଉଦାହରଣ ହେଉଛି ମାଇକ୍ରୋସଫ୍ଟର ଚୀନ ଚାପ ଆଗରେ ଚେପା ହେବା । ଆଉ ଏହା ଘଟିଛି ତିଆନମ୍ୟାନ୍ ସ୍କୋୟାର ଗଣହତ୍ୟାର ୩୨ ବର୍ଷ ପୂରଣ ଦିନ ।

ମାଇକ୍ରୋସଫ୍ଟର ସର୍ଚ୍ଚ ଇଂଜିନ୍ ବିଙ୍ଗର ସେହିଦିନ (ଶୁକ୍ରବାର) ଯେଉଁମାନେ ‘ଟ୍ୟାଙ୍କ୍ ମ୍ୟାନ୍’ ସର୍ଚ୍ଚ କରିଥିବେ ସେମାନଙ୍କୁ କିଛି ମଧ୍ୟ ମିଳିନଥିବ । କାରଣ ଟ୍ୟାଙ୍କ୍ ମ୍ୟାନର ଚିତ୍ର ଡାଉନ୍ ହୋଇଯାଇଥିଲା । ଆଉ ଉତ୍ତର ଆସୁଥିଲା ଟ୍ୟାଙ୍କ ମ୍ୟାନ୍ ପାଇଁ କୌଣସି ରିଜଲ୍ଟ ନାହିଁ ।  ମାଇକ୍ରୋସଫ୍ଟ ପରେ ଏହାକୁ ମାନବୀୟ ତ୍ରୁଟି ବୋଲି କହିଥିଲା । କିନ୍ତୁ ଅନେକ ଏହାକୁ ମାନିବାକୁ ରାଜି ନଥିଲେ । ସେମାନଙ୍କ କହିବା ହେଉଛି ମାଇକ୍ରୋସଫ୍ଟ ବ୍ୟବସାୟକୁ ଦୃଷ୍ଟିରେ ରଖି ଚୀନ ସରକାରଙ୍କୁ ଅସନ୍ତୁଷ୍ଠ କରିବାକୁ ଚାହୁଁନଥିଲା । ତେଣୁ ବିଙ୍ଗ୍ ଟ୍ୟାଙ୍କ୍ ମ୍ୟାନକୁ ସର୍ଚ୍ଚ କରିପାରୁନଥିଲା । ଅବଶ୍ୟ ଚୌତରଫା ସମାଲୋଚିତ ହେବା ପରେ ବିଙ୍ଗରେ ଟ୍ୟାଙ୍କ୍ ମ୍ୟାନଙ୍କ ଅବିର୍ଭାବ ହୋଇଥିଲା । ଏବେ ଆପଣଙ୍କ ମନରେ ଆସୁଥିବ ଏହି ଟ୍ୟାଙ୍କ୍ ମ୍ୟାନ୍ କିଏ ? ଯାହାକୁ ନେଇ ଚୀନର କମ୍ୟୁନିଷ୍ଟ୍ ସରକାର ଏତେ ସମ୍ବେଦନଶୀଳ ।

ଟ୍ୟାଙ୍କ୍ ମ୍ୟାନ୍ କିଏ ?

୧୯୮୯ରେ ଚୀନ ରାଜଧାନୀ ବେଜିଂରେ ଛାତ୍ର ସଡକ ଉପରକୁ ଆସିଥିଲେ । ସେମାନେ ଅଧିକ ଗଣତାନ୍ତ୍ରିକ ଅଧିକାର ଚାହୁଁଥିଲେ । ଛାତ୍ରଙ୍କ ଆନ୍ଦୋଳନକୁ ଚୀନର କମ୍ୟୁନିଷ୍ଟ୍ ପାର୍ଟି ପ୍ରଥମେ ଗୁରୁତ୍ୱ ଦେଇନଥିଲା । କିନ୍ତୁ ଅନ୍ତର୍ଜାତୀୟ ମିଡିଆ ଏହାକୁ କଭର କରିବା ଆରମ୍ଭ କରିଥିଲା । ନିଜ ଭାବମୂର୍ତ୍ତ ନଷ୍ଟ ହେଉଥିବା ଦେଖି ଚୀନ୍ ଆନ୍ଦୋଳନକୁ ଦମନ କରିବା ପାଇଁ ସେନାକୁ ରାସ୍ତାକୁ ଓହ୍ଲାଇଥିଲା । ବେଜିଂର ତିଆନମେନ୍ ସ୍କୋୟାର ଥିଲା ଆନ୍ଦୋଳନର କେନ୍ଦ୍ର ସ୍ଥଳ । ସେଠାରେ ଛାତ୍ର ଏକାଠି ହୋଇଥିଲେ । ଛାତ୍ରଙ୍କୁ ସାଧାରଣ ନାଗରିକଙ୍କ ସମର୍ଥନ ମଧ୍ୟ ମିଳିବାକୁ ଲାଗିଲା ।

ତିଆନମେନ୍ ସ୍କୋୟାରରେ ଟ୍ୟାଙ୍କ ସହିତ ଚୀନ୍ ସେନା ଆନ୍ଦୋଳନ ଦବାଇବା ପାଇଁ ଉଦ୍ୟମ କରୁଥିଲା । ଟ୍ୟାଙ୍କ୍ ମ୍ୟାନ୍ ନାମରେ ପ୍ରସିଦ୍ଧ ଏହି ଚିତ୍ରରେ ଜଣେ ବ୍ୟକ୍ତିଙ୍କୁ ବ୍ୟାଗ୍ ସହିତ ଟ୍ୟାଙ୍କ ଆଗରେ ଛିଡା ହୋଇଥିବା ଦେଖିବାକୁ ମିଳେ । କୁହାଯାଏ ଯେ, ଆନ୍ଦୋଳନକାରୀଙ୍କୁ ହଟାଇବା ପାଇଁ ଟ୍ୟାଙ୍କ୍ ଯାଉଥିବା ବେଳେ ବଜାରକୁ ଆସିଥିବା ଜଣେ ବ୍ୟକ୍ତି ନିଜ ଜୀବନକୁ ଖାତିର ନକରି ଟ୍ୟାଙ୍କ ଆଗରେ ଛିଡା ହୋଇ ପଡିଥିଲେ । ସେ ଟ୍ୟାଙ୍କକୁ ରାସ୍ତା ଦେଇନଥିଲେ । ଏହି ବ୍ୟକ୍ତି କିଏ ତାହା ଆଜି ପର୍ଯ୍ୟନ୍ତ ବି ରହସ୍ୟ । କିନ୍ତୁ ଏହି ଚିତ୍ର ହିଁ ଆନ୍ଦୋଳନର ଛବି ବନି ଯାଇଥିଲା । ଯାହା ପରେ ଟ୍ୟାଙ୍କ୍ ମ୍ୟାନ୍ ନାମରେ ଜଣା ଯାଇଥିଲା ।