“ହକର” ମଶାଙ୍କୁ ଭଣ୍ଡାଇ ମାରୁଥିବା ଯନ୍ତ୍ର

ବିଶ୍ୱରେ ୩୫ଶହରୁ ଅଧିକ ପ୍ରଜାତିର ମଶା ରହିଛନ୍ତି । ମଶାଙ୍କ କାରଣରୁ ଡେଙ୍ଗୁ, ମେଲେରିଆ ଭଳି ମାରାତ୍ମକ ରୋଗ ହୋଇଥାଏ । ମଶା କାମୁଟଡିବା କାରଣରୁ ହେଉଥିବା ରୋଗରେ ପ୍ରତିବର୍ଷ ବିଶ୍ୱରେ ୭ ଲକ୍ଷ ପ୍ରାଣ ହରାଇଥାନ୍ତି । ମଶା ଦାଉରୁ ରକ୍ଷା ପାଇବା ପାଇଁ ଆମେ ଅନେକ ଉପାୟ ଅବଲମ୍ବନ କରିଥାଉ । କିନ୍ତୁ ଖୋଲାରେ, ଯେମିତି ସ୍ୱରେଜ୍ ଟାଙ୍କି କିମ୍ବା ମଇଳା ପାଣି ଜମିଥିବା ସ୍ଥାନରେ ଅଧିକ ସଂଖ୍ୟାରେ ମଶା ଜମା ହୋଇଥାନ୍ତି । ଏମିତି ସ୍ଥାନରେ କ’ଣ କରାଯାଇ ପାରିବ ?

ଯଦି ମଶାଙ୍କ ଉତ୍ପତି ସ୍ଥାନରେ ହିଁ ସେମାନଙ୍କୁ ମାରି ଦିଆଯାଏ ତେବେ କ’ଣ ହେବ ? ଉତ୍ତର ହେଉଛି ରୋଗ ବ୍ୟାପିବ ନାହିଁ । ସବୁଠାରୁ ଭଲ କଥା ହେଉଛି କୌଣସି ପ୍ରକାରର ହାନିକାରକ କେମିକାଲର ପ୍ରୟୋଗ ବିନା ହିଁ ଏମିତି କରିବା ସମ୍ଭବ । ଏଥିପାଇଁ କେରଳର ମ୍ୟାଥୁସ୍ କେ. ମ୍ୟାଥୁ ଏକ ବିଶେଷ ଆବିଷ୍କାର କରିଛନ୍ତି । ଯାହାର ନାମ ହେଉଛି ’ହକର’ । ହକର ଏଭଳି ଏକ ବିଶେଷ ଯନ୍ତ୍ର ଯାହ ଖୋଲା ସ୍ଥାନରେ ମଶାଙ୍କୁ ମାରିଥାଏ ।

କେରଳର କୋଟ୍ଟାୟମର କାଞ୍ଜିରପଲ୍ଲୀର ନିକଟସ୍ଥ କପ୍ପଟୁର ବାସିନ୍ଦା ମ୍ୟାଥୁସ ଗ୍ରାଜୁଏସନ କରିଛନ୍ତି । ସେ ରହୁଥିବା ଅଞ୍ଚଳରେ ମଶାଙ୍କ ପାର୍ଦୁଭାବ ଅଧିକ । ଗୋଟିଏ କୃଷକ ପରିବାରରୁ ଆସିଥିବା ମ୍ୟାଥୁସ ପିଲାବେଳୁ ମଶାଙ୍କ କାରଣରୁ ଉତ୍ପନ ସମସ୍ୟାକୁ ଅଙ୍ଗେ ନିଭାଇଛନ୍ତି । ସେ ସବୁବେଳେ ଭାବୁଥିଲେ ଯେ, କ’ଣ ଏଭଳି କୌଣସି ଉପାୟ ନାହିଁ ଯାହାଦ୍ୱାରା ଖୋଲା ସ୍ଥାନରେ ଥିବା ମଶାଙ୍କଠାରୁ ମଧ୍ୟ ମୁକ୍ତି ମିଳିପାରିବ? ଖୋଲା ସ୍ଥାନରେ ବା ଘର ବାହାରେ ଥିବା ମଶାଙ୍କୁ ମାରିବା ପାଇଁ କେମିକାଲ ସିଂଚନ କରାଯାଇଥାଏ । କିନ୍ତୁ ତାହା ବିଶାକ୍ତ ହୋଇଥାଏ । ମ୍ୟାଥୁ ଏଭଳି ଗୋଟିଏ ଉପାୟ କଥା ଚିନ୍ତା କରୁଥିଲେ ଯେଉଁଥିରେ କେମିକାଲର ବ୍ୟବହାର ହେଉନଥିବ । ଏହି ଚିନ୍ତାରୁ ଜନ୍ମ ନେଇଥିଲା ‘ହକର’

ଏମିତି ଆସିଥିଲା ଆଇଡିଆ

ମ୍ୟାଥୁସଙ୍କ ଅନୁସାରେ ଥରେ ସେ ଘରେ ବସିଥିବା ବେଳେ ଗୋଟିଏ ମଶା ତାଙ୍କ ହାତକୁ କାମୁଡି ଦେଇଥିଲା । ସେ ମଶାକୁ ଆର ହାତରେ ମାରିଥିଲେ । ମାଡ ଖାଇ ମଶା ଟେବୁଲ ଉପରେ ପଡିଗଲା । କିନ୍ତୁ କିଛି ସମୟ ପରେ ମଶା ଉଡିବାକୁ ଆରମ୍ଭ କରିଥିଲା । ପ୍ରକୃତରେ ମଶା ମରିନଥିଲା । ସେ ବେହୋସ ହୋଇଥିଲା । ହୋସକୁ ଆସିବା ପରେ ମଶା ବାହାରକୁ ଯିବା ପାଇଁ ରାସ୍ତା ଖୋଜିବାକୁ ଲାଗିଲା । ମଶା ତାଙ୍କ ଟାଇଲି ଘର ଛାତ ଆଡକୁ ଉଡ଼ିଥିଲା । ଟାଇଲିରେ ଗୋଟିଏ କାଚ ଲାଗିଥିଲା । କାଚରୁ ସୂର୍ଯ୍ୟ କିରଣ ଆସୁଥିଲା । ଫଳରେ ମଶାକୁ ଲାଗିଲା ଯେ, ତାହା ଖୋଲା ସ୍ଥାନ ଏବଂ ସେଇ ରାସ୍ତା ଦେଇ ବାହାରକୁ ଯାଇ ହେବ ।

ଏହି ଘଟଣାରୁ ମ୍ୟାଥୁ ଜାଣିପାରିଥିଲେ ଯେ, ମଶା ଆଲୋକ ଆଡକୁ ଆକର୍ଷିତ ହୋଇଥାନ୍ତି ।ଆଉ ମଧ୍ୟ ସେମାନେ କାଚ ଭଳି ପାରଦର୍ଶୀ ବସ୍ତୁକୁ ଚିହ୍ନି ପାରନ୍ତି ନାହିଁ । ଏହାପରେ ସେ ଗୋଟିଏ ବାୟୋ ଗ୍ୟାସ୍ ପ୍ଲାଣ୍ଟରେ ମଶାଙ୍କୁ ଦେଖିବାକୁ ପାଇଥିଲେ । ସେହି ପ୍ଲାଣ୍ଟ ଦୁଇଟି ପଥର ଦ୍ୱାରା ଘୋଡାଇ ହୋଇ ରହିଥିଲା । ଦୁଇ ପଥର ମଧ୍ୟରେ ଥିବା ଛିଦ୍ର ଦେଇ ମଶା ଯିବା ଆସିବା କରୁଥିଲେ । ମ୍ୟାଥୁସ ଜାଣି ପାରିଥିଲେ ଯେ, ମଶା ଗରମ ସହନ କରି ପାରନ୍ତି ନାହିଁ । ଯେଉଁଠାରେ ଥଣ୍ଡା ସହିତ ଆଦ୍ରତା ଥାଏ ସେଠାରେ ମଶା ରୁହନ୍ତି । ପ୍ରଜନନ କରନ୍ତି ।

ଏହା ପରେ ମ୍ୟାଥୁସ ମଶା ଧରିବା ଯନ୍ତ୍ର ତିଆରି କରିବା କଥା ଚିନ୍ତା କରିଥିଲେ । ଏଥିପାଇଁ ସେ ସେହି ବାୟୋଗ୍ୟାସ୍ ପ୍ଲାଣ୍ଟକୁ ଏକ୍ସପେରିମେଣ୍ଟ୍ ଭାବେ ନେଇଥିଲେ । ଗ୍ୟାସ ପ୍ଲାଣ୍ଟ ଉପରେ ଥିବା ପଥର ମଝିରେ, ଖାଲି ସ୍ଥାନ ଉପରେସେ ଏକ ପାରଦର୍ଶୀ ଗ୍ଲାସ୍ ଲଗାଇଥିଲେ । ସେଥିରେ ମଶାଙ୍କ ପ୍ରବେଶ ପାଇଁ ଛୋଟିଆ ରାସ୍ତାଟିଏ ରଖିଥିଲେ । କିଛି ସମୟ ପରେ ସେହି ଗ୍ଲାସରେ ମଶା ଭର୍ତ୍ତି ହେବାକୁ ଲାଗିଥିଲେ । ଏହାପରେ ସେ ମଶାଙ୍କ ପ୍ରବେଶ ପାଇଁ ଥିବା ଛିଦ୍ରକୁ ଆହୁରି ଛୋଟ କରିଥିଲେ । କିନ୍ତୁ ଛିଦ୍ର ଛୋଟ ହେବା ପରେ ମଧ୍ୟ ମଶାଙ୍କ ପ୍ରବେଶ ଜାରି ରହିଥିଲା । ମଶା ସେହି ଛୋଟ ଛିଦ୍ରକୁ ଖୋଜି ଗ୍ଲାସ ମଧ୍ୟକୁ ପ୍ରବେଶ କରୁଥିଲେ । ମ୍ୟାଥୁସ ଜାଣିପାରିଥିଲେ ଯେ, ବାୟୋ ଗ୍ୟାସ୍ ପ୍ଲାଣ୍ଟରୁ ବାହାରୁଥିବା ଗନ୍ଧ ହିଁ ମଶାଙ୍କୁ ଟାଣୁଛି ।

୨୦୦୨ରେ ମ୍ୟାଥୁ ନିଜ ଯନ୍ତ୍ରର ପ୍ରଥମ ପ୍ରୋଟେଟାଇପ୍ ତିଆରି କରିଥିଲେ । କିନ୍ତୁ ବିପୁଳ ତଥା ବାଣିଜ୍ୟକ ଉତ୍ପାଦନ ପାଇଁ ତାଙ୍କ ପାଖରେ ପାଣ୍ଠିର ଅଭାବ ଥିଲା । ତଥାପି ମ୍ୟାଥୁସ ହାର ମାନିନଥିଲେ । ଅନେକ ବର୍ଷର ପ୍ରଚେଷ୍ଟା ପରେ ଜନ୍ମ ନେଇଥିଲା ‘ହକର’

ହକର କେମିତି କାମ କରେ ?

ହକରକୁ ସେପ୍ଟିକ୍ ଟ୍ୟାଙ୍କ, ବାୟୋ ଗ୍ୟାସ୍ ଟ୍ୟାଙ୍କ, ସ୍ୱରେଜ୍ ଟ୍ୟାଙ୍କ ଭଳି ସ୍ଥାନରେ ବ୍ୟବହାର କରାଯାଇ ପାରେ । ଏହାର ନିମ୍ନ ଭାଗ ପଲିମର ଓ ଉପରିଭାଗ ପାରଦର୍ଶୀ ପ୍ଲାଷ୍ଟିକରେ ତିଆରି । ଏଥିରେ ଗୋଟିଏ ଟ୍ୟୁବ୍ ଲାଗିଥାଏ । ଯାହାକୁ ଯେକୌଣସି ଟାଙ୍କିରେ ଫିଟ୍ କରାଯାଇ ପାରିବ । ଏହି ଟ୍ୟୁବ୍ ଜରିଆରେ ଟ୍ୟାଙ୍କରୁ ବାୟୋଗ୍ୟାସ ହକରର ନିମ୍ନ ଭାଗରେ ପହଂଚିଥାଏ । ଏହି ଭାଗରୁ ଗ୍ୟାସ୍ ବାହାରକୁ ବ୍ୟାପେ ଓ ମଶା ଆକର୍ଷିତ ହୋଇଥାନ୍ତି । ଗ୍ୟାସ ଗନ୍ଧ ପାଇଁ ମଶା ପ୍ରଥମେ ଯନ୍ତ୍ରର ନିମ୍ନ ଭାଗକୁ ପ୍ରବେଶ କରିଥାନ୍ତି । ଏହାପରେ ସେମାନେ ଉପରଭାଗକୁ ଯାଇଥାନ୍ତି । କାରଣ ସେଠାରୁ ପାରଦର୍ଶୀ ପ୍ଲାଷ୍ଟିକରୁ ଆଲୋକ ମିଳିଥାଏ । ଯେତେବେଳେ ମଶା ଉପରକୁ ଯାନ୍ତି ସେତେବେଳେ ସେମାନେ ଗୋଟିଏ ଚ୍ୟାମ୍ବରରେ ଫସିଯାନ୍ତି । ଏହି ଚ୍ୟାମ୍ବର ସୂର୍ଯ୍ୟ କିରଣରେ ଗରମ ହୋଇଯାଏ । ଗରମରେ ମଶା ପ୍ରାଣ ହରାନ୍ତି । ମ୍ୟାଥୁଙ୍କ ଅନୁସାରେ ଥରେ ଏହି ମେସିନର ଇନଷ୍ଟଲେସନ୍ ପରେ ଏଥିରେ କୌଣସି ଖର୍ଚ୍ଚ କରିବାକୁ ପଡେ ନାହିଁ । କାରଣ ଏଥିରେ କୌଣସି ପ୍ରକାରର ଗ୍ୟାସ୍ କିମ୍ବା କେମିକାଲ ବ୍ୟବହାର କରିବାକୁ ପଡିନଥାଏ ।

ହକରର ଇନଡୋର ମଡେଲ ମଧ୍ୟ ଖୁବଶୀଘ୍ର ବଜାରକୁ ଆସିବାକୁ ଯାଉଛି । ଯାହାକୁ ଘରେ ଲଗା ଯାଇପାରିବ । ମ୍ୟାଥୁସ୍ ଏହାର ପ୍ୟାଟେଣ୍ଟ୍ ପାଇଁ ଆବେଦନ କରିଛନ୍ତି । ଏହା ସହିତ ସେ ଗୋଟିଏ ମାଛି ମରା ଯନ୍ତ୍ର ମଧ୍ୟ ତିଆରି କରୁଛନ୍ତି । ଯାହା ଆଗକୁ ତାଙ୍କ କମ୍ପାନୀ ଲଂଚ୍ କରିବ ।