ନ୍ୟୁୟର୍କ : ଏବେ ସୋସିଆଲ ମିଡ଼ିଆରେ ଏମିତି ଏକ ଭିଡିଓ ଭାଇରାଲ ହେବାରେ ଲାଗିଛି, ଯାହାକୁ ଦେଖି ଲୋକଙ୍କ ଆଖିରେ ଲୁହ ଆସିଯାଇଛି । ଭିଡ଼ିଓରେ ଏକ ପ୍ରେମୀଯୁଗଳଙ୍କ ନିଆରା ପ୍ରେମ କାହାଣୀ ସାମ୍ନାକୁ ଆସିଛି । ଅସୁସ୍ଥ ପ୍ରେମିକା ହସପିଟାଲରେ ପ୍ରେମିକଙ୍କୁ ବିବାହ କରିବାର ମାତ୍ର ୧୮ ଘଣ୍ଟା ମଧ୍ୟରେ ଆଖି ବୁଝି ଦେଇଛନ୍ତି । ଏହି ପ୍ରେମୀଯୁଗଳଙ୍କ ଭିଡ଼ିଓ ଏବେ ସୋସିଆଲ ମିଡ଼ିଆରେ ଘୂରି ବୁଲୁଛି ।
ସ୍ତନ କର୍କଟରେ ପୀଡ଼ିତ ଥିଲେ ପ୍ରେମିକା
ଆମେରିକାର କନେକ୍ଟିକଟରେ ରୁହନ୍ତି ହେଥର ମୋଶେର । ସେ ସ୍ତନ କର୍କଟରେ ପୀଡିତ ହୋଇଥିଲେ । ଦିନକୁ ଦିନ ଶରୀର ଗୁରୁତର ହୋଇପଡ଼ିବାରୁ ଘରଲୋକ ହେଥରଙ୍କୁ ହାର୍ଟଫୋର୍ଡ ହସପିଟାଲରେ ଭର୍ତ୍ତି କରିଥିଲେ । ଅସୁସ୍ଥ ହେଥର ନିଜ ପ୍ରେମିକ ଡ଼େଭିଡ଼ଙ୍କୁ ହସପିଟାଲରେ ବିବାହ କରିବାକୁ ଇଚ୍ଛା ପ୍ରକାଶ କରିଥିଲେ । ହେଥରଙ୍କ କଥା ଶୁଣି ଦୁଇ ପରିବାରଲୋକ ଆଶ୍ଚର୍ଯ୍ୟ ହୋଇଯାଇଥିଲେ । ପରେ ବିବାହ କରିବାକୁ ରାଜି ହୋଇଥିଲେ । ଏଭଳି ପରିସ୍ଥିତିରେ ସେ ନିଜ ପ୍ରେମିକ ଡ଼େଭିଡ଼ଙ୍କୁ ହସ୍ପିଟାଲ ବେଡରେ ବିବାହ କରିଲେ । ଦୁଇ ପରିବାରର ମାତ୍ର କିଛି ସଦସ୍ୟଙ୍କ ଉପସ୍ଥିତିରେ ଏହି ବିବାହ ହେଲା । ହେଲେ ବିବାହ କରିବାର ମାତ୍ର ୧୮ଘଣ୍ଟା ପରେ ହେଥରଙ୍କ ମୃତ୍ୟୁ ହୋଇଥିଲା । ଏହି ପ୍ରେମୀ ଯୁଗଳଙ୍କ ପ୍ରେମ କାହାଣୀ ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି ।
ପ୍ରେମ କାହାଣୀ ହୃଦୟ ବିଦାରକ
ଏହି ଭିଡ଼ିଓ ଦେଖିବା ପରେ ନଲେଜ ଲ୍ୟାବର ଅଧ୍ୟକ୍ଷ ଅନୀତା ଶର୍ମା ଲେଖିଛନ୍ତି ଯେ, ଏହା ଅତ୍ୟନ୍ତ ଦୁଃଖଦାୟକ । ଅନ୍ୟ ଜଣେ ଉପଭୋକ୍ତା ଲେଖିଛନ୍ତି ଯେ ଜୀବନର କଠିନ ଆହ୍ୱାନର ସମ୍ମୁଖୀନ ହୋଇ ଏପରି ଗଭୀର ପ୍ରେମ ଏବଂ ପ୍ରତିବଦ୍ଧତା ଦେଖିବା ହୃଦୟ ବିଦାରକ ଏବଂ ପ୍ରେରଣାଦାୟକ ଅଟେ । ଏହି ସମୟ ମଧ୍ୟରେ ସେମାନଙ୍କ ପ୍ରିୟଜନଙ୍କ ପାଇଁ ଶାନ୍ତି ଏବଂ ଆରାମ କାମନା କରନ୍ତି । ଏହି ସମୟରେ, ଅନ୍ୟ ଜଣେ ୟୁଜର ଲେଖିଛନ୍ତି ଯେ ଏହା ଏକ ସମୟରେ ଚମତ୍କାର ଏବଂ ଅତ୍ୟନ୍ତ ଦୁଃଖଦାୟକ ଥିଲା । ଏହି ଭିଡ଼ିଓଟି ପୁରୁଣା ହୋଇଥିଲେ ବି ଏବେ ସୋସିଆଲ ମିଡ଼ିଆରେ ଘୂରି ବୁଲୁଛି ।
