ଗତ କିଛି ଦିନ ହେବ ଋଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହିତ ନଜର ଆସୁଥିବା ଏକ ବ୍ରିଫକେସକୁ ନେଇ ବେସ ଚର୍ଚ୍ଚା ହେଉଛି । ପ୍ରକୃତ କଥା ହେଉଛି ଏହା କିଛି ସାଧାରଣ ବ୍ରିଫକେସ ନୁହେଁ ଅଧିକନ୍ତୁ ଏହା ହେଉଛି ଚଳୟମାନ ପରମାଣୁ କମାଣ୍ଡ୍ ସେଣ୍ଟର । ଏହାକୁ ମଧ୍ୟ ପୁଟିନଙ୍କ ନ୍ୟୁକ୍ଲିୟର ବ୍ରିଫକେସ୍ ବୋଲି କୁହାଯାଇଥାଏ । ଯେଉଁଥିରେ ପରମାଣୁ ଆକ୍ରମଣ ସଂକ୍ରାନ୍ତୀୟ ଆଦେଶ ଦେବାର ସିଷ୍ଟମ ରହିଥାଏ । ୟୁକ୍ରେନ୍ ସହିତ ଯୁଦ୍ଧ ଆରମ୍ଭ ହେବା ପରଠାରୁ ପୁଟିନ ନିଜ ନ୍ୟୁକ୍ଲିୟ ଅସ୍ତ୍ର ସିଷ୍ଟମକୁ ଆଲର୍ଟ ମୋଡରେ ରଖିଛନ୍ତି । ଏମିତିରେ ଚର୍ଚ୍ଚା ହେବା ସ୍ୱଭାବିକ ଯେ, ପୁଟିନ କ’ଣ ୟୁକ୍ରେନ୍ ଉପରେ ପରମାଣୁ ଆକ୍ରମଣ କରିବେ ? ତେବେ ଆସନ୍ତୁ ଜାଣିବା ପୁଟିନଙ୍କ ନ୍ୟୁକ୍ଲିୟର ବ୍ରିଫକେସ୍ କ’ଣ ?
ପୁଟିନଙ୍କ ନ୍ୟୁକ୍ଲିୟର ବ୍ରିଫକେସ୍ କ’ଣ ?
ଏମିତିରେ ପୁଟିନଙ୍କ ସହିତ ଅହରହ ରହୁଥିବା ନ୍ୟୁକ୍ଲିୟର ବ୍ରିଫକେସ ଦେଖିବାକୁ ଯେକୌଣସି ସାଧାରଣ ସୁଟକେସ୍ ଭଳି କିନ୍ତୁ ଏହା କୌଣସି ସାଧାରଣ ସୁଟକେସ୍ ନୁହେଁ । ଏହି ବ୍ରିଫକେସ ଦ୍ୱାରା ପୁଟିନ୍ ନ୍ୟୁକ୍ଲିୟର ଆକ୍ରମଣର ଆଦେଶ ଦେଇ ପାରିବେ ।
- ଏହି ବ୍ରିଫକେସରେ ପରମାଣୁ ଆକ୍ରମଣ ସହିତ ଜଡିତ ସମସ୍ତ ଦସ୍ତାବିଜ ଓ ଆଲର୍ଟ ଆଲାର୍ମ ଅର୍ଥାତ ନ୍ୟୁକ୍ଲିୟର ଆକ୍ରମଣର କମାଣ୍ଡ ସିଷ୍ଟମ ରହିଥାଏ ।
- ଋଷ ଭାଷାରେ ଏହି ବ୍ରିଫକେସକୁ ଚେଗେଟ୍ କୁହାଯାଇଥାଏ । ଋଷର ଏକ ପାହାଡର ନାମ ଅନୁସାରେ ଏହାର ନାମକରଣ ହୋଇଛି ।
- ୧୯୮୦ ଦଶକରେ ସୋଭିଏତ ସଂଘର ଶୀର୍ଷ ନେତା ୟୁରି ଆନ୍ଦ୍ରୋପୋଭଙ୍କ ସ୍ୱଳ୍ପ କାର୍ଯ୍ୟକାଳରେ ପ୍ରଥମଥର ପାଇଁ ଏହି ବ୍ରିଫକେସ ସାମ୍ନାକୁ ଆସିଥିଲା ।
- ୧୯୮୫ ମସିହାରେ ସୋଭିଏତ ଋଷର ଶେଷ ରାଷ୍ଟ୍ରପତି ମିଖାଇଲ ଗୋର୍ଭୋଚୋଭଙ୍କ ଶାସନ କାଳରେ ଏହାକୁ ନିୟମିତ ଭାବେ ରାଷ୍ଟ୍ରପତିଙ୍କ ସହିତ ଦେଖିବାକୁ ମିଳିଥିଲା ।
- ୧୯୯୯ରେ ପ୍ରଥମ ଥର ପାଇଁ ପୁଟିନଙ୍କୁ ଏହି ବ୍ରିଫକେସ୍ ହସ୍ତାନ୍ତର କରାଯାଇଥିଲା ଓ ଏହାପରଠାରୁ ଏହା ପୁଟିନଙ୍କ ପାଖରେ ରହି ଆସିଛି ।
- ଏପର୍ଯ୍ୟନ୍ତ କେବଳ ଥରୁଟିଏ ଏହି ବ୍ରିଫକେସର ସାର୍ବଜନୀକ ପ୍ରଦର୍ଶନ ହୋଇଥିଲା । ୨୦୧୯ରେ ଋଷର ସରକାରୀ ପ୍ରତିରକ୍ଷା ଚ୍ୟାନେଲ Zvezda ପ୍ରଥମ ଥରପାଇଁ ଏହାକୁ ଟିଭିରେ ଦେଖାଇଥିଲା ।
- ଏହି ବ୍ରିଫକେସ୍ ହେଉଛି ଋଷ ରାଷ୍ଟ୍ରପତି ଓ ଦେଶର ଶକ୍ତିର ପ୍ରତୀକ ।
କେମିତି କାମ କରେ ନ୍ୟୁକ୍ଲିୟର ବ୍ରିଫକେସ୍ ?
- ଏହି ବ୍ରିଫକେସରେ ଏକ ଇଲେକଟ୍ରୋନିକ୍ ସିଷ୍ଟମ ରହିଥାଏ । ଏହା ଭିତରେ ପଛ ପଟକୁ ଏକ କ୍ଷୁଦ୍ରାକରର କଳା ରଙ୍ଗର ସ୍କ୍ରିନ୍ ଥାଏ ଓ ଆଗରେ ଅନେକ ସୁଇଚ୍ ଥାଏ
- ଏହା ମଧ୍ୟରୁ ଅଧିକାଂଶ ସୁଇଚର ରଙ୍ଗ ଧଳା ହୋଇଥିବାବେଳେ ମଧ୍ୟ ଭାଗରେ ଏକ ଲାଲ ରଙ୍ଗର ସୁଇଚ୍ ରହିଛି । ଧଳା ରଙ୍ଗର ସୁଇଚ୍ ଦବାଇବା ଦ୍ୱାରା ଆଣବିକ ଆକ୍ରମଣ କମାଣ୍ଡ୍ ସିଷ୍ଟମ ଆକ୍ଟିଭେଟ୍ ହୋଇଥାଏ ବୋଲି କୁହାଯାଏ
- ଏକ ଗୁପ୍ତ କୋଡ୍ ଦ୍ୱାରା ଏହି ବ୍ରିଫକେସ୍ ଖୋଲିଥାଏ । ଏହି କୋଡ୍ କେବଳ ପୁଟିନ ହିଁ ଜାଣନ୍ତି ।
- ଋଷ ପାଖରେ ଏଭଳି ତିନୋଟି ବ୍ରିଫକେସ୍ ଥିବା କୁହାଯାଏ । ଗୋଟିଏ ରାଷ୍ଟ୍ରପତିଙ୍କ ପାଖରେ, ଦ୍ୱିତୀୟ ବ୍ରିଫକେସ୍ ପ୍ରତିରକ୍ଷା ମନ୍ତ୍ରୀ ଓ ତୃତୀୟ ବ୍ରିଫକେସ୍ ସେନା ମୁଖ୍ୟଙ୍କ ପାଖରେ ଥିବା କୁହାଯାଏ ।
- ଏହି ବ୍ରିଫକେସ ଜରିଆରେ ପରମାଣୁ ଆକ୍ରମଣର ଆଦେଶ କେବଳ ଓ କେବଳ ରାଷ୍ଟ୍ରପତି ଅର୍ଥାତ ପୁଟିନ୍ ହିଁ ଦେଇ ପାରିବେ ।
- ଏହି ବ୍ରିଫକେସ୍ ଜରିଆରେ ଋଷର ୬ ହଜାର ପରମାଣୁ ଅସ୍ତ୍ରକୁ ନିୟନ୍ତ୍ରିତ କରାଯାଇଥାଏ । ତେଣୁ ଏହାକୁ ୨୪ ଘଣ୍ଟା କଡା ପହରା ଭିତରେ ରଖାଯାଏ ।
- ଏହି ବ୍ରିଫକେସ୍ ମଧ୍ୟରେ ଗୋଟିଏ ଆଲର୍ଟ ଆଲାର୍ମ ଥାଏ । ଋଷ ଉପରେ କୌଣସି ପ୍ରକାରର ପରମାଣୁ ଆକ୍ରମଣ ସ୍ଥିତିରେ ଏହି ଆଲାର୍ମ ବାଜିଥାଏ
- ରିପୋର୍ଟ ଅନୁସାରେ ପୁଟିନଙ୍କ ସହିତ କେବଳ ଏହି ବ୍ରିଫକେସ ନଥାଏ । ବ୍ରିଫକେସ ସହିତ ଜଣେ ଅଧିକାରୀ ମଧ୍ୟ ତାଙ୍କ ସହିତ ରହିଥାନ୍ତି । ଏହି ଆଧିକାରୀ ବ୍ରିଫକେସକୁ ନେଇ ତାଙ୍କ ସହିତ ଯାଇଥାନ୍ତି । ପରମାଣୁ ଆକ୍ରମଣ ସ୍ଥିତିରେ ପୁଟିନଙ୍କୁ ସହାୟତା କରିବା ପାଇଁ ଏହି ଅଧିକାରୀଙ୍କୁ ଟ୍ରେନିଂ ଦିଆଯାଇଥାଏ
- ଏହି ବ୍ରିଫକେସ୍ ଜରିଆରେ ପୁଟିନ ଦୁନିଆକୁ ଧ୍ୱଂସ କରିପାରୁଥିବା ପରମାଣୁ ଅସ୍ତ୍ର ସକ୍ରୀୟ କରିପାରିବେ । ତା’ ପୁଣଇ ଥରୁଟିଏ ନୁହେଁ, ଅନେକ ଥର ।
