ପଂଜାବ ରାଜନୀତି ପାଇଁ ଶନିବାର ଥିଲା ବଡ଼ଦିନ । ଶନିବାର ଦିନ ପୂର୍ବତନ ଓପନର ନବଜ୍ୟୋତ୍ ସିଦ୍ଧୁ କ୍ୟାପ୍ଟେନଙ୍କ ଉପରେ ଭାରି ପଡିଥିଲେ । ସିଦ୍ଧୁ ପଂଜାବ କଂଗ୍ରେସ ର ମୁଖ୍ୟ ହେବାର ମାତ୍ର ଦୁଇ ମାସ ପରେ ଅମରିନ୍ଦର ସିଂହ ଙ୍କୁ ନିଜ ପଦ ହରାଇବାକୁ ପଡିଛି । ଜୁଲାଇ ମାସରେ କ୍ୟାପ୍ଟେନ ଓ ସିଦ୍ଧୁ ମୁହାଁମୁହିଁ ହେବା ପରେ କଂଗ୍ରେସର ପ୍ରାଦେଶିକ ଚେହେରା ବଦଳିଥିଲେ । କ୍ୟାପ୍ଟେନଙ୍କ ଇସ୍ତଫାର ମୁଖ୍ୟ କାରଣ ଦୁହିଁଙ୍କ ମଧ୍ୟରେ ଅହଂ ଓ ବର୍ଚ୍ଚସ୍ୱ ଲଢେଇ । ଦୁଇ ନେତା ପରସ୍ପର ସହିତ କାମ କରିବା ପାଇଁ ପ୍ରସ୍ତୁତ ନଥିଲେ । ଦୁଇ ଗୋଷ୍ଠୀ ପରସ୍ପର ବିରୋଧରେ ଯୁଦ୍ଧ ଘୋଷଣା କରିଥିଲେ । ଶେଷରେ ଯୁଦ୍ଧରେ କ୍ୟାପ୍ଟେନ ଇସ୍ତଫା ଦେଇ ନିଜ ପରାଜୟ ସ୍ୱୀକାର କରିଛନ୍ତି । ସିଦ୍ଧୁ ଓ ଅମରିନ୍ଦର ଲଢେଇର ପ୍ରଥମ ଇନିଂସରେ ଏବେ ପୂର୍ବତନ ଓପନିଂ ବ୍ୟାଟସମ୍ୟାନଙ୍କ ବିଜୟ ହୋଇଥିବା ଲାଗୁଛି । କିନ୍ତୁ ସିଦ୍ଧୁ ନିଜ ନୂଆ ରାଜନୈତିକ ଶକ୍ତିକୁ କେତେଦିନ ବଜାୟ ରଖିବେ ତାହା ସମୟ କହିବ ।
ହାଇକମାଣ୍ଡ୍ ସିଦ୍ଧୁଙ୍କୁ ଗୁରୁତ୍ୱ ଦେଲେ
କଂଗ୍ରେସ ହାଇକମାଣ୍ଡ୍ କ୍ୟାପ୍ଟେନଙ୍କ ଅପେକ୍ଷା ସିଦ୍ଧୁଙ୍କୁ କେତେ ଗୁରୁତ୍ୱ ଦେଉଛନ୍ତି ତାହା ଜୁଲାଇ ମାସରୁ ଜଣା ପଡିଥିଲା । ଜୁଲାଇ ମାସରେ କ୍ୟାପ୍ଟେନଙ୍କ ବିରୋଧ ସତ୍ୱେ ସିଦ୍ଧୁଙ୍କୁ ହାଇକମାଣ୍ଡ୍ କଂଗ୍ରେସ ପ୍ରଦେଶ କମିଟି ମୁଖ୍ୟ କରିଥିଲେ । କିନ୍ତୁ କଂଗ୍ରେସ ମଧ୍ୟରେ ଗୃହଯୁଦ୍ଧ ସରିନଥିଲା । ବରଂ ଅଧିକ ବଢିଥିଲା । ଦୁଇ ନେତା ପରସ୍ପର ବିରୋଧରେ ବୟାନବାଜିର କୌଣସି ମୌକା ହରାଇ ନଥିଲେ । ନିକଟରେ ଜମ୍ମୁକାଶ୍ମୀରକୁ ନେଇ ସିଦ୍ଧୁଙ୍କ ଜଣେ ପରାମର୍ଶଦାତ୍ତା ଦେଇଥିବା ଟିପ୍ପଣୀକୁ ନେଇ କ୍ୟାପ୍ଟେନ ତାଙ୍କୁ ଘେରିଥିଲେ । ଫଳରେ ଏହି ପରାମର୍ଶଦାତ୍ତାଙ୍କୁ ତାଙ୍କ ପଦ ହରାଇବାକୁ ପଡିଥିଲା । ଯାହାକୁ ନେଇ ଦୁଇ ଜଣଙ୍କ ମଧ୍ୟରେ ତିକ୍ତତା ଅଧିକ ବଢିଥିଲା । ସିଦ୍ଧୁଏକ ସଭାରେ ଇଟ୍ ସେ ଇଟ୍ ବଜା ଦୁଙ୍ଗା ବୋଲି କହିବାକୁ ପଛାଇ ନଥିଲେ ।
କ୍ୟାପ୍ଟେନଙ୍କ ଉପରେ ନଥିଲା ଭରସା ?
ଇସ୍ତଫା ଦେବା ପରେ କ୍ୟାପ୍ଟେନ୍ ଯାହା କହିଛନ୍ତି ସେଥିରୁ ଲାଗୁଛି ଯେ, ହାଇକମାଣ୍ଡଙ୍କର ତାଙ୍କ ଉପରେ ଭରସା ନଥିଲା । ସେ କହିଥିଲେ ଯେ, ମୁଁ ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେଇ ଦେଇଛି । ତାଙ୍କର ଯାହା ଉପରେ ବିଶ୍ୱାସ ଅଛି ସେ ତାକୁ ମୁଖ୍ୟମନ୍ତ୍ରୀ କରନ୍ତୁ । ଗତ କେଇ ମାସ ମଧ୍ୟରେ ତୃତୀୟ ଥର ପାଇଁ ସିଏଲପି ବୈଠକ ହୋଇଛି । ଏଥିରୁ ଲାଗୁଛି ଯେ ମୁଁ ସରକାର ଚଳାଇ ପାରିବି ବୋଲି ତାଙ୍କର ସନ୍ଦେହ ଅଛି । ମୁଁ ଭାବୁଛି ୟେ, ଯଦି ମୋ ଉପରେ ସନ୍ଦେହ ଅଛି, ମୁଁ ସରକାର ଚଳାଇ ପାରିଲି ନାହିଁ, ଯେଉଁଭଳି ଭାବେ ଏହା ହେଲା ସେଥିରେ ମୁଁ ଅପମାନିତ ଅନୁଭବ କଲି । କଂଗ୍ରେସ ହାଇକମାଣ୍ଡ୍ ଓ ତାଙ୍କ ମଧ୍ୟରେ ସମ୍ପର୍କ କେତେ ଖରାପ ହୋଇଯାଇଛି ,ତାହା ଏହି ବୟାନରୁ ଜଣା ପଡେ ।
ବିକଳ୍ପ କ’ଣ ବିଜେପି ?
ଇସ୍ତଫା ପରେ କ୍ୟାପ୍ଟେନ ଆଉ ଗୋଟିଏ ବଡ ସଂକେତ ଦେଇଛନ୍ତି । ସେ କହିଛନ୍ତି ଯେ , ରାଜନୀତିରେ ବିକଳ୍ପ ଖୋଲା ଥାଏ । ତେବେ ଏହି ବିକଳ୍ପ କ’ଣ ହେବ ତାହା ସମୟ କହିବ । କ୍ୟାପ୍ଟେନ ନୂଆ ଦଳ ଗଢିବେ କି ବିଜେପିରେ ଯୋଗ ଦେବେ ତାହା ଆଗକୁ ଜଣା ପଡିବ । କାରଣ ଅନେକ ପ୍ରସଙ୍ଗ ଉପରେ କ୍ୟାପ୍ଟେନ ବିଜେପିକୁ ସମର୍ଥନ ଦେଇଛନ୍ତି । ତାଙ୍କ ଦଳ ଲାଇନରୁ ହଟି ସେ ୩୭୦ ଧାରା ଉପରେ ସରକାରକୁ ସମର୍ଥନ ଦେଇଛନ୍ତି । ନିକଟରେ ଏକ ସଭାରେ ସେ ବିକ୍ଷୋଭକାରୀ କୃଷକଙ୍କୁ ପଂଜାବରେ ବିକ୍ଷୋଭ ନକରିବାକୁ କହିଥିଲେ । ଏମିତି କହି ସେ କୃଷକ ଆନ୍ଦୋଳନରୁ ନିଜକୁ ଦୁରେଇବାକୁ ସଂକେତ ଦେଉଥିଲେ । ଯାହାର ଅର୍ଥ ବିଜେପିର ନିକଟତର ହେବ । ସବୁଠାରୁ ବଡ କଥା ହେଲା ଇସ୍ତଫା ଦେବାର କେଇ ଘଣ୍ଟା ପୂର୍ବରୁ କ୍ୟାପ୍ଟେନ କହିଥିଲେ ଯଦି ମୁଖ୍ୟମନ୍ତ୍ରୀ ପଦ ଛାଡିବାକୁ କୁହାଯାଏ ତେବେ ଦଳ ଛାଡିବି । ନିକଟରେ ମଧ୍ୟ କ୍ୟାପଟେନ୍ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିଥିଲେ । ଏମିତିରେ ତାଙ୍କ ପାଇଁ ବିକଳ୍ପ ଯଦି ବିଜେପି ହୁଏ ତେବେ ଆଶ୍ଚର୍ଯ୍ୟ ହେବାର କିଛି ନାହିଁ । କ୍ୟାପଟେନ୍ ମଧ୍ୟ ଇସ୍ତଫା ଦେବା ପରେ ରାହୁଲଙ୍କୁ ‘ଛୋଟ ପିଲା’ କହି ବାଣ ମାରିଛନ୍ତି । ଯାହାର ଅର୍ଥ ହେଉଛି କ୍ୟାପଟେନ୍ ଓ କଂଗ୍ରେସ ଏବେ ପରସ୍ପରଠାରୁ ଦୁରରେ ।
ସିଦ୍ଧୁଙ୍କ ମନୋବୈଜ୍ଞାନିକ ବିଜୟ
କ୍ୟାପଟେନଙ୍କ ଇସ୍ତଫା ନିଶ୍ଚିତ ଭାବେ ସିଦ୍ଧୁଙ୍କ ପାଇଁ ଗୋଟିଏ ବଡ ମନୋବୈଜ୍ଞାନିକ ବିଜୟ । ଏଥିରୁ ପ୍ରମାଣିତ ହେଉଛି ଯେ, କଂଗ୍ରେସ ହାଇକମାଣ୍ଡ୍ ସିଦ୍ଧୁଙ୍କୁ ଅଧିକ ଗୁରୁତ୍ୱ ଦେଉଛନ୍ତି । ଜୁଲାଇ ମାସରେ କ୍ୟାପଟେନଙ୍କ ଆପତି ସତ୍ୱେ ସିଦ୍ଧୁଙ୍କୁ ଦଳର ମୁଖ୍ୟ କରି ହାଇକମାଣ୍ଡ୍ ସ୍ପଷ୍ଟ ସଂକେତ ଦେଇଥିଲେ ଯେ, ସିଦ୍ଧୁ ମହତ୍ୱପୂର୍ଣ୍ଣ ।
ଏମିତି ହୋଇଥିଲା ଫିଲ୍ଡିଂ ସେଟ୍
କ୍ୟାପ୍ଟେନଙ୍କୁ ହଟାଇବା ପାଇଁ ସିଦ୍ଧୁ ତିନି ମାସ ଧରି ଫିଲ୍ଡି ସେଟ୍ କରୁଥିଲେ । ନିକଟରେ ୫୦ରୁ ଅଧିକ ବିଧାୟକ ସୁପ୍ରିମୋ ସୋନିଆଙ୍କୁ ପତ୍ର ଲେଖି କ୍ୟାପ୍ଟେନଙ୍କୁ ହଟାଇବା ପାଇଁ ନିବେଦନ କରିଥିଲେ । ଏହି ପତ୍ରରେ ସିଏଲପି ବୈଠକ ଡାକିବା ପାଇଁ ଅନୁରୋଧ କରାଯାଇଥିଲା । ପତ୍ର ପାଇବା ପରେ ହାଇକମାଣ୍ଡ୍ ସିଏଲପି ବୈଠକ ପାଇଁ ଆଦେଶ ଦେଇଥିଲେ । ଫଳରେ ବିଳମ୍ବିତ ରାତ୍ରିରେ ଶନିବାର ସିଏଲପି ବୈଠକ ହେବ ବୋଲି ଜଣାଇ ଦିଆଗଲା । ଏସବୁ କିଛି ଏକଦା ପଂଜାବ କଂଗ୍ରେସ ରାଜନୀତିରେ କେନ୍ଦ୍ରରେ ଥିବା ଅମରିନ୍ଦରଙ୍କ ଅଜାଣତରେ ହୋଇଥିଲା । ବୈଠକ ନିଷ୍ପତିର ମାତ୍ର କେଇ ଘଣ୍ଟା ମଧ୍ୟରେ କ୍ୟାପ୍ଟେନ ରାଜନୀତିରେ ରିଟାୟର୍ଡ୍ ହର୍ଟ ହୋଇ ନିଜ ବିକଳ୍ପ ଖୋଜୁଛନ୍ତି ।
