ବିଶ୍ୱର ଅନେକ ଦେଶ ଚାକିରିଆଙ୍କ ଅବସର ବୟସ ବଢାଇବାକୁ ଅଣ୍ଟା ଭିଡି଼ ସାରିଲେଣି । କିନ୍ତୁ କର୍ମଚାରୀ ଏହାକୁ ବିରୋଧ କରୁଛନ୍ତି । ଉଦାହରଣ ଭାବ ଫ୍ରାନ୍ସକୁ ନିଆଯାଉ । ସେଠାରେ ଅବସରକାଳୀନ ବୟସସୀମାକୁ ୬୨ରୁ ବଢାଇ ୬୪ କରିବାକୁ ପ୍ରସ୍ତାବ ଅଛି । କିନ୍ତୁ ଏହାକୁ କର୍ମଚାରୀ ବିରୋଧ କରୁଛନ୍ତି । ସରକାରଙ୍କ ଏହି ପ୍ରସ୍ତାବ ବିରୋଧରେ କର୍ମଚାରୀ ଆନ୍ଦୋଳନକୁ ଓହ୍ଲାଇଛନ୍ତି । ପୁରା ଦେଶରେ ପେନସନ୍ ସୁଧାରକୁ ବିରୋଧ କରାଯାଉଛି । ଫ୍ରାନ୍ସ ସରକାରଙ୍କ ଯୁକ୍ତି ଯେ, ରିଟାୟରମେଣ୍ଟ୍ ବୟସ ବୃଦ୍ଧିକରି ପେନସନ୍ ସିଷ୍ଟମର ସୁରକ୍ଷା କରାଯାଇ ପାରିବ ।ନୂଆ ଯୋଜନା ଅନ୍ତର୍ଗତରେ ସରକାର ଏହି କାର୍ଯ୍ୟ ୨୦୩୦ରୁ ଆରମ୍ଭ କରିବାକୁ ଚାହାନ୍ତି । ସେତେବେଳେ ସରକାର ରିଟାୟରମେଣ୍ଟ୍ ବୟସକୁ ୬୨ରୁ ୬୪କୁ ବୃଦ୍ଧି କରିବେ ।
ଏମିତିରେ ଅନେକ ଦେଶ ରିଟାୟରମେଣ୍ଟ୍ ବୟସସୀମା ବଢାଇ ସାରିଛନ୍ତି । ବର୍ତ୍ତମାନ ଆମେରିକାରେ ରିଟାୟରମେଣ୍ଟ୍ ବୟସସୀମା ସର୍ବାଧିକ ରହିଛି । ଆମେରିକାରେ ଅବସରକାଳୀନ ବୟସସୀମା ହେଉଛି ୬୬ ବର୍ଷ । ତେବେ ଆମେରିକା ମଧ୍ୟ ଏହାକୁ ଆହୁରି ଏକ ବର୍ଷ ବଢାଇବାକୁ ଚାହୁଁଛି । ଦେଖିବାକୁ ଗଲେ ଦୁନିଆର ସବୁଦେଶର ପେନସନକୁ ନେଇ ନୂଆ ଭାବେ ଚିନ୍ତା ଆରମ୍ଭ କରିଛନ୍ତି ।
ଫ୍ରାନସର ସମ୍ପୂର୍ଣ୍ଣ ପେନସନ୍ ରାଶି ପାଇଁ ଚାକିରିର ସର୍ବନିମ୍ନ ଅବଧିକୁ ମଧ୍ୟ ବଢାଇବା ପାଇଁ ସରକାର ଚିନ୍ତା କରୁଛନ୍ତି । ନିଜ ବଜେଟ କ୍ଷତିକୁ କମ କରିବା ପାଇଁ ସରକାର ଏମିତି କରୁଛନ୍ତି ବୋଲି କୁହାଯାଉଛି । ଆଗାମୀ ବର୍ଷରେ ଫ୍ରାନ୍ସରେ ଅଧିକ ସଂଖ୍ୟାରେ କର୍ମଚାରୀ ଅବସର ନେବାକୁ ଯାଉଛନ୍ତି । ଏହିସଂଖ୍ୟା ୨୦୩୦ ବେଳକୁ ଆହୁରି ବଢିପାରେ । ତେବେ ସରକାରଙ୍କ ଏଭଳି ପଦକ୍ଷେପ ବିରୋଧରେ ଆକ୍ରୋଶ ବଢିବାରେ ଲାଗିଛି । ଯାହା ମାକ୍ରୋ ସରକାର ପାଇଁ ଚିନ୍ତାର କାରଣ ହୋଇପାରେ ।
ପେନସନ୍ ପାଇଁ ଅଧିକ ଦିନ କାମ କରିବାକୁ ପଡିବ
ସରକାରଙ୍କ ଏଭଳି ଉଦ୍ୟମକୁ ଏହା କହି ବିରୋଧ କରାଯାଉଛି ଯେ, ଏଭଳି ପଦକ୍ଷେପ ଦ୍ୱାରା ମଧ୍ୟବିତ୍ତଙ୍କ ଉପରେ ଅଧିକ ଚାପ ପଡିବ । ସେମାନଙ୍କୁ ପେନସନ୍ ପାଇଁ ଅଧିକ ବର୍ଷ କାମ କରିବାକୁ ପଡିବ । ସେପର୍ଯ୍ୟନ୍ତ ସେମାନଙ୍କୁ ନିଜ ଆୟର ଅଧିକ ଅଂଶ ଟ୍ୟାକ୍ସ ଭାବେ ଦେବାକୁ ବାଧ୍ୟ ହେବେ । ବର୍ତ୍ତମାନ ଫ୍ରାନ୍ସରେ ଦରଦାମ ଅହେତୁକ ଭାବେ ବଢିଯାଇଛି । ପ୍ରକୃତ କଥା ହେଉଛି ବିଶ୍ୱର ଅନେକ ଦେଶ ଏବେ ପେନସନ୍ ବ୍ୟବସ୍ଥାକୁ ହଟାଇବାକୁ ଚାହୁଁଛନ୍ତି । ପେନସନ୍ ଦେବାକୁ ସରକାରଙ୍କ ଅର୍ଥବ୍ୟବସ୍ଥା ଉପରେ ଚାପ ବଢୁଛି । ପେନସନ୍ ବାବଦରେ ରାଜକୋଷରୁ କେମିତି କମ ଅର୍ଥ ଯିବ ସେଥିପାଇଁ ଚାକିରି ଅବଧି ବଢାଯାଉଛି ।
ବ୍ରିଟେନ୍ ଓ ଆର୍ୟଲାଣ୍ଡ୍ କ’ଣ କରିଛନ୍ତି ?
ବ୍ରିଟେନ୍ ଓ ଆର୍ୟଲାଣ୍ଡ୍ ଭଳି ଦେଶ ନିଜ କର୍ମଚାରୀଙ୍କ ଅବସର ବୟସସୀମାକୁ ବଢାଇ ୬୮ କରିଦେଇଛନ୍ତି ।ଏମିତିକି ଏହାକୁ ବଢାଇ ୭୦ ବର୍ଷ କରାଯାଇପାରେ ବୋଲି ସଂକେତ ମିଳୁଛି ।ତେଣୁ ଭବିଷ୍ୟତରେ ଯଦି ରିଟାୟରମେଣ୍ଟ୍ ବୟସସୀମାକୁ ୭୬ କରାଯାଏ ତେବେ ଆଶ୍ଚର୍ଯ୍ୟ ହେବାର ନାହିଁ । ଡେନମାର୍କ,ଇଟାଲି ଓ ଏସ୍ତୋନିଆ ଭଳି ଦେଶ ରିଟାୟରମେଣ୍ଟ୍ ବୟସସୀମାକୁ ଆହୁରି ଅଧିକ କରିବାକୁ ଯାଉଛନ୍ତି । ଡେନମାର୍କରେ ଅବସର ବୟସସୀମାକୁ ୬୫ରୁ ବଢାଇ ୭୪,ଏସ୍ତୋନିଆ ୬୩ରୁ ବଢାଇ ୭୧ ଓ ଇଟାଲି ୬୭ରୁ ୭୧ କରିବା ଉପରେ ବିଚାର କରୁଛନ୍ତି ।
