ଭାରତ ଓ ଋଷ ମଧ୍ୟରେ ଗତ 75 ବର୍ଷରୁ ଅଧିକ ବର୍ଷ ଧରି ମୈତ୍ରୀପୂର୍ଣ୍ଣ ସମ୍ପର୍କ ରହି ଆସିଛି । ଦୁଇ ଦେଶ ପରସ୍ପରକୁ ଅନେକ କ୍ଷେତ୍ରରେ ସାହାଯ୍ୟ କରିଥାନ୍ତି । ଦୁଇ ଦେଶଙ୍କ ମଧ୍ୟରେ ସମ୍ପର୍କ ସହିତ ଦୁଇ ଦେଶର ନାଗରିକଙ୍କ ମଧ୍ୟରେ ବି ସମ୍ପର୍କ ବେସ୍ ଦୃଢ । ଭାରତୀୟ ଫିଲ୍ମଠାରୁ ଭାରତୀୟ ଖାଦ୍ୟ ଋଷରେ ବେସ ଲୋକପ୍ରିୟ ।ତେଣୁ କୌଣସି ଭାରତୀୟ ଋଷ ବିରୋଧରେ ଯୁଦ୍ଧ ଲଢିବା କଥା ଶୁଣିବାକୁ ଅଜବ ଲାଗିପାରେ । କିନ୍ତୁ ଏହା ସତ । ଆଉ ଏହି ସତ ଆସିଛି ୟୁକ୍ରେନରୁ ।
ୟୁକ୍ରେନ ଓ ଋଷ ମଧ୍ୟରେ ଲଢେଇକୁ ପ୍ରାୟ 500 ଦିନରୁ ଅଧିକ ସମୟ ବିତିଗଲାଣି । କିନ୍ତୁ ଏପର୍ଯ୍ୟନ୍ତ କୌଣସି ସମାଧାନର ବାଟ ବାହାରି ପାରିନାହିଁ । ଗୋଟିଏ ପଟେ ଶକ୍ତିଶାଳୀ ରାଷ୍ଟ୍ର ଋଷ ୟୁକ୍ରେନ ଭିତରେ ପଶି ଧ୍ୱଂସଲୀଳା ରଚୁଥିବାବେଳେ ମିସାଇଲ ମାଡ କରି କଡା ଜବାବ ଦେଉଛି ଧ୍ବସ୍ତବିଧ୍ବସ୍ତ ୟୁକ୍ରେନ । ୟୁକ୍ରେନର ନାଗରିକ ସେନା ସହ କାନ୍ଧକୁ କାନ୍ଧ ମିଶାଇ ଋଷ ବିରୋଧରେ ଲଢେଇ ଜାରି ରଖିଛନ୍ତି । କେବଳ ୟୁକ୍ରେନର ଯୁବପିଢି ନୁହନ୍ତି ବରଂ ୟୁକ୍ରେନର ଏହି ବିପଦ ବେଳେ ସାହାଯ୍ୟର ହାତ ବଢାଇଛନ୍ତି କିଛି ଭାରତୀୟ । ୟୁକ୍ରେନ ସେନାରେ ଯୋଗ ଦେଇ ପୁଟିନ ସେନାକୁ ପାଣି ପିଆଇଲେଣି ଏହି ଭାରତୀୟ ଯୁବକ ।
ଆଜି ଆମେ ଆପଣଙ୍କୁ ଏମିତି ତିନି ଜଣ ଭାରତୀୟଙ୍କ ବିଷୟରେ କହିବୁ ଯେଉଁମାନେ ୟୁକ୍ରେନ ପାଇଁ ଋଷ ବିରୋଧରେ ଲଢେଇ କରୁଛନ୍ତି । ତାଙ୍କ ପାଇଁ ଏହି ଯୁଦ୍ଧ ଏବେ ନିଜ ଘର ବଞ୍ଚାଇବାକୁ ଲଢେଇ ଭଳି ହୋଇ ସାରିଛି । ଏହି ତିନି ଭାରତୀୟ ଏବେ ଋଷ କବଜା କରିଥିବା ବଖମୁତର ଆଖପାଖ ଅଞ୍ଚଳରେ ମୁତୟନ ଅଛନ୍ତି । ବଖମୁତରୁ ୨୭ କିଲୋମିଟର ଦୂର କୋସ୍ୟାତିନ୍ତିକା ସହରରେ ମୁତୟନ ଥିବା ତିନି ଭାରତୀୟ ଏକ ସାକ୍ଷାତକାରରେ ୟୁକ୍ରେନର ଦୁଃଖ ବଖାଣିଛନ୍ତି । ଏବେବି ସହରରେ ଗୋଳା ବାରୁଦ ବିସ୍ଫୋରଣ ଶବ୍ଦ ଶୁଭୁଥିବା ସେମାନେ ପ୍ରକାଶ କରିଛନ୍ତି ।
ଦୁଇ ଜଣ ଯବାନ କହିଛନ୍ତି ଯେ ସେମାନେ ପାଠ ପଢିବା ପାଇଁ ୟୁକ୍ରେନ ଆସିଥିଲେ । କିନ୍ତୁ ଏଠାରେ ଦୁଇଜଣ .ୟୁକ୍ରେନ ମହିଳାଙ୍କୁ ସେମାନେ ବିବାହ କରିଥିଲେ । ମଧ୍ୟ ପ୍ରଦେଶର ୟୁକ୍ରେନ ଯବାନ ଏଣ୍ଡ୍ରିଙ୍କ ଦୁଇଟି ପିଲା ମଧ୍ୟ ଅଛନ୍ତି । ୟୁକ୍ରେନରେ ୧୨ବର୍ଷରୁ ରହିଆସୁଥିବା ଏଣ୍ଡ୍ରି କହିଛନ୍ତି ଋଷ ସେନା ନୀରିହ ୟୁକ୍ରେନ ନାଗରିକଙ୍କୁ ହତ୍ୟା କରୁଛି । ଯେଉଁଠି ୟୁକ୍ରେନ ସେନା ମୁତୟନ ନାହାନ୍ତି ସେହି ଅଞ୍ଚଳକୁ ଟାର୍ଗେଟ କରୁଛି ଋଷ । ମହିଳାଙ୍କୁ ସେମାନଙ୍କ ସ୍ବାମୀଙ୍କ ସମ୍ମୁଖରେ ଦୁଷ୍କର୍ମ କରୁଛି ଋଷ ସେନା । ଋଷ ପଶୁ ଭଳି ହିଂସ୍ର ହୋଇପଡିଥିବାରୁ ବାଧ୍ୟ ହୋଇ ୟୁକ୍ରେନ ଛାଡୁଛନ୍ତି ନାଗରିକ ।
ସେହିପରି ହରିୟାଣାର ନବୀନଙ୍କ ମୁତାବକ ଋଷ ସୋଭିଏତ ସମୟରୁ ରଖିଥିବା ରକେଟ୍ର ଏବେ ବ୍ୟବହାର କରୁଛି । ଯଦି ଦୁଇ ଦେଶ ମଧ୍ୟରେ ମୁହାଁମୁହିଁ ଯୁଦ୍ଧ ହୁଏ ତେବେ ୟୁକ୍ରେନ ଋଷକୁ ହରାଇ ଦେବ । ଖାରଖିବ ଏଭିଏସନ ଇନଷ୍ଟିଚ୍ୟୁଟରେ ପାଠ ପଢୁଥିବା ନବୀନ ପ୍ରଥମେ ପ୍ରାଦେଶିକ ରକ୍ଷା ବଳରେ ସାମିଲ ହୋଇଥିଲେ । ଯାହାକି ୟୁକ୍ରେନ ସେନା ପାଇଁ ସଂରକ୍ଷଣ ରହିଥାଏ । ସେ ୨୦୨୩ରେ ସେନାରେ ସାମିଲ ହୋଇଥିଲେ । ହେଲେ ବିଦେଶୀ ହେବା କାରଣରୁ ନବୀନଙ୍କୁ ସ୍ବତନ୍ତ୍ର ପ୍ରକ୍ରିୟା ଦେଇ ଚୟନ ହେବାକୁ ପଡିଥିଲା । ଫ୍ରଣ୍ଟଲାଇନ ପୋଷ୍ଟିଂ ପୂର୍ବରୁ ସେ ଫ୍ରାନ୍ସ, ଜର୍ମାନ ଓ ଇସ୍ରାଏଲ ଠାରୁ ସ୍ବତନ୍ତ୍ର ଟ୍ରେନିଂ ନେଇଥିଲେ । ସେ କହିଛନ୍ତି ପ୍ରତିଦିନ ନୂଆ ଯବାନ ୟୁକ୍ରେନ ସେନାରେ ସାମିଲ ହେଉଛନ୍ତି ।
ସେପଟେ ନବୀନ ଆଉ ଏଣ୍ଡ୍ରି ୟୁକ୍ରେନ ସେନାର ପ୍ରଶଂସା କରିଛନ୍ତି । ତାଙ୍କ ସାଙ୍ଗରେ କୌଣସି ପ୍ରକାର ଭେଦଭାବ କରିନାହିଁ ୟୁକ୍ରେନ ସେନା । ୟୁକ୍ରେନକୁ ସାହାଯ୍ୟ କରିବା ପାଇଁ ଏହି ଦୁଇଜଣ ଭାରତ ସରକାରଙ୍କୁ ନିବେଦନ ବି କରିଛନ୍ତି । ଯୁଦ୍ଧ ଆରମ୍ଭରୁ ସେମାନଙ୍କୁ ୟୁକ୍ରେନ ଛାଡିବା ପାଇଁ ବିକଳ୍ପ ବି ଦିଆଯାଇଥିଲା । କିନ୍ତୁ ବିପଦ ବେଳେ ୟୁକ୍ରେନ ହାତ ଛାଡିବାକୁ ମନା କରିଦେଇଥିଲେ ଏହି ଦୁଇ ଭାରତୀୟ ।
