ଆଗକୁ ଜାମ୍ମୁକାଶ୍ମୀର ନିର୍ବାଚନ ହେବାର ସମ୍ଭାବନା ରହିଛି । ତେଣୁ କେନ୍ଦ୍ର ସରକାର ଜାମ୍ମୁ- କାଶ୍ମୀରର ବାଲ୍ମିକୀ ସମ୍ପ୍ରଦାୟକୁ ଅନୁସୂଚିତ ଜାତି ତାଲିକାରେ ସାମିଲ କରିବାକୁ ଚିନ୍ତା କରୁଛନ୍ତି । ଏଥିପାଇଁ ସାମାଜିକ ନ୍ୟାୟ ଓ କଲ୍ୟାଣ ବିଭାଗ କାମ କରୁଥିବା ଶୁଣିବାକୁ ମିଳୁଛି । ଉତ୍ତର ଭାରତର ଅନ୍ୟ ରାଜ୍ୟରେ ବାଲ୍ମିକୀ ସମ୍ପ୍ରଦାୟ ଅନୁସୂଚିତ ଜାତି ତାଲିକାରେ ଥିବା ବେଳେ ଜାମ୍ମୁକାଶ୍ମୀର ରେ ସେମାନଙ୍କୁ ଏହି ମାନ୍ୟତା ମିଳିନାହିଁ । ଏହା ପଛରେ ରହିଛି ପୁରୁଣା ଜାମ୍ମୁ କାଶ୍ମୀର ସରକାରଙ୍କ ବାଛବିଛାର ଓ ସମ୍ବିଧାନର ୩୭୦ ଧାରା । ଧାରା ୩୭୦ ଉଛେଦ ହେବା ପରେ ବାଲ୍ମିକୀ ସମ୍ପ୍ରଦାୟ ନ୍ୟାୟ ପାଇବାର ଆଶା ବଢିଥିଲା । ଆଉ ଲାଗୁଛି ଏବେ ସେମାନେ ମଧ୍ୟ ସଂରକ୍ଷଣର ସୁବିଧା ଉଠାଇ ପାରିବେ । ତେବେ ଆସନ୍ତୁ ଜାଣିବା କ’ଣ ପାଇଁ କାଶ୍ମୀର ଉପତ୍ୟକାରେ ରହୁଥିବା ବାଲ୍ମିକୀ ସମ୍ପ୍ରଦାୟ ପାତର ଅନ୍ତରର ଶିକାର ହେଉଥିଲେ ।
ପାତରଅନ୍ତର ଆରମ୍ଭ ହୁଏ ୫୦ ବର୍ଷ ତଳେ
୧୯୫୭ ମସିହାର କଥା । ସେହି ବର୍ଷ ଜମ୍ମୁକାଶ୍ମୀରରେ ସଫାଇ କର୍ମଚାରୀ କାର୍ଯ୍ୟବନ୍ଦ ଆନ୍ଦୋଳନ କରିଥିଲେ । ଫଳରେ ଉପତ୍ୟକାରେ କୁଢକୁଢ଼ ମଇଳା ଜମା ହୋଇଥିଲା । ସରକାର ଉପତ୍ୟକାକୁ ସଫା କରିବା ପାଇଁ ଉପାୟ ଖୋଜୁଥିଲେ । ଏହି ସମୟରେ ଜମ୍ମୁ କାଶ୍ମୀରର ମୁଖ୍ୟମନ୍ତ୍ରୀଙ୍କୁ ପ୍ରଧାନମନ୍ତ୍ରୀ କୁହାଯାଉଥିଲା । ଆଉ ପ୍ରଧାନମନ୍ତ୍ରୀ ଥିଲେ ବକ୍ସି ଗୁଲାମ ମହମ୍ମଦ । ମହମ୍ମଦ ଅନ୍ୟ ରାଜ୍ୟରୁ ସଫେଇ କର୍ମଚାରୀ ଆଣିବାକୁ ନିଷ୍ପତ୍ତି ନେଇଥିଲେ । ସେଥିପାଇଁ ସେ ପଂଜାବର ମୁଖ୍ୟମନ୍ତ୍ରୀ ପ୍ରତାପ ସିଂହ କେରୋଙ୍କ ସହ କଥା ହୋଇଥିଲେ । ପ୍ରତାପ ସିଂହଙ୍କୁ ମହମ୍ମଦ ପ୍ରତିଶ୍ରୁତି ଦେଇଥିଲେ ଯେ, ଯେଉଁ କର୍ମଚାରୀ ଆସିବେ ସେମାନଙ୍କୁ ସ୍ଥାୟୀ ଚାକିରି ଦିଆଯିବ । ଏହି ପ୍ରତିଶ୍ରୁତିକୁ ବିଶ୍ୱାସ କରି ପଂଜାବ ସରକାର ୨୭୨ ଜଣ କର୍ମଚାରୀ କାଶ୍ମୀର ପଠାଇଥିଲେ ।
ଏହି ସବୁ କର୍ମଚାରୀ ବାଲ୍ମିକୀ ସମ୍ପ୍ରଦାୟର ଥିଲେ । ସେମାନେ କାଳକ୍ରମେ କାଶ୍ମୀର ଉପତ୍ୟକାର ସ୍ଥାୟୀ ବାସିନ୍ଦା ହୋଇଗଲେ । ସେମାନଙ୍କ ସଂଖ୍ୟା ବୃଦ୍ଧି ପାଇ ୨୭୨ରୁ ଅଢେଇ ଲକ୍ଷ ହୋଇଥିଲା । କିନ୍ତୁ ଏହି ଅଢେଇ ଲକ୍ଷ ଲୋକଙ୍କ ପ୍ରତି କାଶ୍ମୀର ସରକାରଙ୍କ ବ୍ୟବହାର ଅମାନବୀୟ ଥିଲା । ସେଠାକାର ସରକାର ନିଜର ଅଲଗା ସମ୍ବିଧାନର ଦ୍ୱାହୀ ଦେଇ ସେମାନଙ୍କୁ ସ୍ଥାୟୀ ବାସିନ୍ଦାର ପ୍ରମାଣପତ୍ର ଦେଇନଥିଲେ କିମ୍ବା ନାଗରିକତା ଦେଇନଥିଲେ । ଫଳରେ ଏହି ସମ୍ପ୍ରଦାୟର ଲୋକ ନା ଭୋଟ୍ ଦେଇ ପାରୁଥିଲେ ନା ଜମି କିଣିପାରୁଥିଲେ ।ସମ୍ବିଧାନର ଧାରା ୩୭୦ ଓ ୩୫କ’ର ଉଦାହରଣ ଦେଇ କାଶ୍ମୀର ବାଲ୍ମିକୀ ସମ୍ପ୍ରଦାୟର ଅଧିକାର ହଡ଼ପ କରିଥିଲା ।
ଯେତେ ପଢ଼ିଲେ ବି ଝାଡ଼ୁଦାର !
ବାଲ୍ମିକୀ ସମ୍ପ୍ରଦାୟ ପ୍ରତି କାଶ୍ମୀରରେ କିଭଳି ଅମାନବୀୟ ବ୍ୟବହାର କରାଯାଉଥିଲା ତାରା ଗୋଟିଏ ଉଦାହରଣ ହେଉଛି ଯେ, ଯେହେତୁ ଏହି ସମ୍ପ୍ରଦାୟ ସଫେଇ କରିବାକୁ ଆସିଥିଲେ ତେଣୁ ସେମାନଙ୍କ ପିଲାମାନେ ମଧ୍ୟ କେବଳ ସେହି କାମ କରିବେ ବୋଲି ନିୟମ କରାଯାଇଥିଲା । ଅର୍ଥାତ ଜଣେ ଉଚ୍ଚଶିକ୍ଷିତ ହୋଇଥିଲେ ମଧ୍ୟ ସେ ଅନ୍ୟ କୌଣସି ଚାକିରି ପାଇଁ ମନୋନିତ ହେଉନଥିଲେ । ତେଣୁ ବାଲ୍ମିକୀ ସମ୍ପ୍ରଦାୟର ଅନେକ ଉଚ୍ଚ ଶିକ୍ଷିତ ଯୁବକ ଯୁବତୀ ବାଧ୍ୟ ହୋଇ ସଫେଇ କର୍ମଚାରୀ ହୋଇଥିଲେ । ଗତ ୬୦ ବର୍ଷ ଧରି ଏହି ଅତ୍ୟାଚାର ଚାଲି ଆସୁଥିଲା । ନିଜର ସ୍ୱତନ୍ତ୍ରତା ପାଇଁ ମୁହଁ ଖୋଲି ଗର୍ଜନ କରୁଥିବା କାଶ୍ମୀରର ମୁସଲିମ୍ ନେତା ବାଲ୍ମିକୀ ସମ୍ପ୍ରଦାୟ ଉପରେ ହେଉଥିବା ଅତ୍ୟାଚାରର ଖୋଲାଖୋଲି ସମର୍ଥକ ଥିଲେ । ସେମାନଙ୍କ କହିବା ଥିଲା ଯେ, ଯେହେତୁ ଏମାନେ ବାହାର ରାଜ୍ୟରୁ ଆସିଛନ୍ତି ତେଣୁ ସେମାନଙ୍କୁ ନା କାଶ୍ମୀରରେ ସ୍ଥାୟୀ ବାସିନ୍ଦାର ମାନ୍ୟତା ମିଳିବ ନା ନାଗରିକତା ନା ଚାକିରିରେ ସମାନ ଅବସର ।
୬୦ ବର୍ଷ ଧରି ଏହି ସମ୍ପ୍ରଦାୟର ଛାତ୍ରଛାତ୍ରୀଙ୍କୁ କାଶ୍ମୀର ସରକାର କୌଣସି ବୃ୍ତି ମଧ୍ୟ ଦେଉନଥିଲେ । ତେବେ ଏବେ ଲାଗୁଛି ଏହି ସମ୍ପ୍ରଦାୟ ପ୍ରତି ହୋଇଥିବା ଐତିହାସିକ ଭୁଲର ସୁଧାର ହେବ । ସେମାନେ ମଧ୍ୟ ସମ୍ମାନଜନକ ଜୀବିକା ସହିତ ସାମାଜିକ ସ୍ୱାଧିନତା ପାଇବେ ।
