୨୦୩୦ ବେଳକୁ ନଥିବ ସ୍ମାର୍ଟଫୋନ୍,ଆପଣଙ୍କ ମୁଣ୍ଡରେ ଥିବ କମ୍ପ୍ୟୁଟର

ଯଦି ଆପଣଙ୍କୁ ସ୍ମାର୍ଟ୍ ଫୋନ୍ ତ୍ୟାଗ କରିବାକୁ କୁହାଯାଏ ତେବେ ଆପଣ ଫୋନ୍ ଛାଡି ପାରିବେ କି ? ଉତ୍ତର ହେଉଛି ନା । କାମ ଓ ସମ୍ପର୍କ ସ୍ଥାପନା ପାଇଁ ସ୍ମାର୍ଟ୍ ଫୋନର ଭୂମିକା ଏମିତି ଯେ ଏହାବିନା ଜୀବନ ଅସମ୍ଭବ ଲାଗୁଛି । କାମ ହେଉକି ଓଟିଟିରେ ମନୋରଂଜନ,ସବୁଥିପାଇଁ ଆବଶ୍ୟକ ହେଉଛି ସ୍ମାର୍ଟ୍ ଫୋନ୍ । ତେବେ ଏମିତିରେ ଯଦି କେହି ଆପଣଙ୍କୁ କୁହେ ଯେ, ଆଉ ମାତ୍ର ୭ ବର୍ଷ ପରେ ସ୍ମାର୍ଟ୍ ଫୋନ୍ ବୋଲି କିଛି ନଥିବ ତେବେ କ’ଣ ରହିବ ଆପଣଙ୍କ ଉତ୍ତର ? ଆପଣ ନିଶ୍ଚୟ ଚକିତ ହେବେ । ଆଉ ଏହାକୁ ଗପ କହି ଏଡାଇଯିବାକୁ ଚାହିଁବେ । ତେବେ ସତ ହେଉଛି ଯେ, ହୁଏତ ଆଉ ବର୍ଷ ୭ଟାରେ ବଜାରରୁ ସ୍ମାର୍ଟ୍ ଫୋନ୍ ଉଭାନ ହୋଇଯାଇଥିବ । ତେବେ ସ୍ମାର୍ଟଫୋନର ସ୍ମାର୍ଟ୍ ଚିପ୍ ଆପଣଙ୍କ ମସ୍ତିଷ୍କରେ ଲାଗି ସାରିଥିବ ।

୨୦୩୦ ସ୍ମାର୍ଟ୍ ଫୋନ୍ ମୃତ୍ୟୁର ବର୍ଷ !

ନୋକିଆର ସିଇଓଙ୍କ ଅନୁସାରେ ୨୦୩୦ ବେଳକୁ ସ୍ମାର୍ଟ୍ ଫୋନ୍ ଅତିତର କଥା ହୋଇଯାଇଥିବ । ନୋକିଆ ସିଇଓ ପେକା ଲୁଣ୍ଡ୍ ମାର୍କଙ୍କ ଅନୁସାରେ ବର୍ଷ ୨୦୩୦ ବେଳକୁ ଆମ ଶରିର ଭିତରେ ଅନେକ ଡିଭାଇସକୁ ଇମପ୍ଲାଣ୍ଟ୍ କରାଯାଇଥିବ । ଅର୍ଥାତ ଶରିର ଭିତରେ ଲଗାଯାଇଥିବ । ଡାଭୋସରେ ୱାର୍ଲ୍ଡ ଇକୋନମିକ୍ ଫୋରମର ପ୍ୟାନେଲରେ ସେ କହିଛନ୍ତି ଯେ, ଆଗାମୀ ଶତାବ୍ଦୀରେ ସ୍ମାର୍ଟଫୋନର ଚିହ୍ନବର୍ଣ୍ଣ ଲୋପ ପାଇଯିବ । ଏହା ସହିତ ୬ଜିର କମର୍ଶିଆଲ ବ୍ୟବହାର ୨୦୩୦ ବେଳକୁ ଆରମ୍ଭ ହୋଇସାରିଥିବ ।

କ’ଣ ସ୍ମାର୍ଟ୍ ଫୋନର ସ୍ଥାନ ସ୍ମାର୍ଟ୍ ଗ୍ଲାସେସ କିମ୍ବା ଅନ୍ୟକୌଣସି ଡିଭାଇସ୍ ନେବେ ? ଏହି ପ୍ରଶ୍ନର ଉତ୍ତର ଦେଇ ଲୁଣ୍ଡମାର୍କ କହିଥିଲେ ଯେ, ୬ଜି ଆସିବା ପୂର୍ବରୁ ଏମିତି ହୋଇସାରିଥିବ । ସେ କହିଥିଲେ ଯେ, ସ୍ମାର୍ଟ୍ ଫୋନକୁ ଆଜି ଆମେ ଯେମିତି ଜାଣିଛୁ ସେତେବେଳେ ସେମିତି କମନ ଇଣ୍ଟରଫେସ୍ ହୋଇ ରହିନଥିବ । ଅନେକ ଜିନିଶକୁ ଆମ ଶରିର ମଧ୍ୟରେ ଫିଟ୍ କରାଯାଉଥିବ । ତେବେ ସେହି ଟେକ୍ନୋଲୋଜି ସବୁ କ’ଣ ହେବେ ଯାହା ସ୍ମାର୍ଟଫୋନର ସ୍ଥାନ ନେବେ ସେ ବାବଦରେ ଲୁଣ୍ଡମାର୍କ କିଛି କହିନଥିଲେ ।୨୦୩୦ ସୁଧା ୬ଜି ନେଟୱର୍କର ଟେକନିକାଲ ଆବଶ୍ୟକତା ମଧ୍ୟ ଅନେକାଂଶରେ ବଦଳିଯିବ । ଫଳରେ ବଡ଼ ସ୍ତରରେ କମ୍ପ୍ୟୁଟିଂ ପାୱାର ଓ ଫାଷ୍ଟର ନେଟୱର୍କ ସ୍ପିଡ୍ର ଆବଶ୍ୟକତା ପଡ଼ିବ । ଏହା ବର୍ତ୍ତମାନର ନେଟୱର୍କଠାରୁ ପ୍ରାୟ ଏକ ଶହ ଗୁଣ ବା ୧ ହଜାର ଗୁଣ ଅଧିକ ତୀବ୍ର ହେବ ।

କେମିତି ହେବ ଟେକ୍ନୋଲୋଜିର ଭବିଷ୍ୟ ?

ଏକ ଅନୁମାନ ଅନୁସାରେ ୨୦୫୦ ସୁଧା ଲୋକ ସ୍ମାର୍ଟଫୋନର ବ୍ୟବହାର ବନ୍ଦ କରିଦେବେ । ଏହା ବଦଳରେ ସେମାନଙ୍କ ମସ୍ତିଷ୍କ ସିଧାସଳଖ ଇଣ୍ଟରେନେଟ୍ ସହିତ ଯୋଡ଼ି ହେବ । ଆଡଭାନ୍ସଡ୍ ବ୍ରେନ୍ କମ୍ପ୍ୟୁଟର ଇଣ୍ଟରଫେସେଜ୍ ଜରିଆରେ ମାନବ ମସ୍ତିଷ୍କକୁ ଇଣ୍ଟରନେଟ୍ ସହିତ ଯୋଡା଼ଯିବ । ଯେତେବେଳେ କେହି କୌଣସି ସୂଚନା ଚାହିଁବ-ଯେମିତି କାହାକୁ ଫୋନ୍ କଲ କରିବା,ଲାଇଟ୍ ଅନ୍ କରିବା କିମ୍ବା ଖାଦ୍ୟ ଅର୍ଡର କରିବା ଆଦି ବାବଦରେ କେବଳ ଭାବିବା ମାତ୍ରକେ କାମ ହୋଇଯିବ । ନର୍ମାଲ ବ୍ରେନ୍ ଫଙ୍କସନ୍ ସହିତ ଏଆଇ ଅଲଗୋରିଦମ ରନ୍ କରିବ । ଏହା ଲୋକଙ୍କୁ ନୂଆ ସ୍କିଲ୍ ଶିଖିବାରେ ,ନିଜ୍ ଜୀବନକୁ ମ୍ୟାନେଜ୍ କରିବାରେ ଓ କଠିନ କାର୍ଯ୍ୟ କରିବାରେ ସାହାଯ୍ୟ କରିବ । ଜଣେ ବ୍ୟକ୍ତିର ମସ୍ତିଷ୍କ ହିଁ କ୍ଲାଉଡ୍ ପାଲଟିଯିବ ।