ବେଲୁଚ୍ ବିଦ୍ରୋହୀଙ୍କ ଆକ୍ରମଣରେ ହତାସ ପାକ୍ ସେନା, ଇମ୍ରାନ୍ ଦେଲେ ଦରମା ବୃଦ୍ଧି ଅଫର

ବଲୁଚିସ୍ତାନରେ ପାକ୍ ସେନା ଉପରେ ବିଦ୍ରୋହୀଙ୍କ ବଡ଼ଧରଣର ଆକ୍ରମଣ ସେନାର ମନୋବଳକୁ ଦୋହଲାଇ ଦେଇଛି । ପାକ୍ ସେନା ଭିତରେ ଏବେ ହତାସଭାବ ବୃଦ୍ଧି ପାଇଛି । ପାକିସ୍ତାନୀ ସୈନିକଙ୍କ ନିରାଶା ଓ ଡରକୁ ବୁଝିପାରି ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ସୈନିକଙ୍କ ଦରମା ବୃଦ୍ଧି କଥା କହିଛନ୍ତି । ଦରମା ବଢାଇ ସୈନିକଙ୍କ ମନୋବଳ ବୃଦ୍ଧି ପାଇଁ ଇମ୍ରାନ୍ ଉଦ୍ୟମ କରିଛନ୍ତି । ସୂଚନାଯୋଗ୍ୟ ଯେ, ଗତ ସପ୍ତାହରେ ନୌଶକିରେ ହୋଉଥିବା ଆକ୍ରମଣରେ ଫ୍ରଣ୍ଟିୟର କର୍ପସର ଜଣେ ଅଧିକାରୀଙ୍କ ସହିତ ୪ ଜଣ ସୈନିକ ପ୍ରାଣ ହରାଇଥିଲେ ।

ଫ୍ରଣ୍ଟିୟର କର୍ପସ୍ ଓ ରେଞ୍ଜର୍ସଙ୍କ ଦରମା ବୃଦ୍ଧି

ଇମ୍ରାନ୍ ଖାନ୍ ନୌଶକି ଆକ୍ରମଣ ପରେ ପାକ୍ ରେଂଜର୍ସ ସୈନିକଙ୍କ ଦରମାରେ ୧୫ ପ୍ରତିଶତ ବୃଦ୍ଧି କରିଛନ୍ତି । ନିଜ ଭାଷଣର ଆରମ୍ଭରେ ସେ ପାକ୍ ସୈନିକଙ୍କୁ ଜୋରଦାର ପ୍ରଶଂସା କରିଥିଲେ । ନିହତ ସୈନିକଙ୍କୁ ଶ୍ରଦ୍ଧାଞ୍ଜଳି ଦେଇଥିଲେ । ବଲୁଚିସ୍ତାନରେ ନିହତ ସୈନିକଙ୍କୁ ସେ ଲୋକଙ୍କ ରକ୍ଷକ ବୋଲି କହିଥିଲେ । ସେ କହିଥିଲେ ଯେ, ମୁଁ ଆଜି ନୌଶକିରେ ଏଥିପାଇଁ ଅଛି ଯେ, ପାକିସ୍ତାନର ସବୁ ସୈନିକ ଜାଣନ୍ତୁ ଦେଶ ତାଙ୍କ ସହିତ ଛିଡା ହୋଇଛି ।

ପାକ୍ ସେନାର ପ୍ରଶଂସା

ସେ ଆତଙ୍କବାଦ ବିରୋଧୀ ଯୁଦ୍ଧରେ ପାକ୍ ସେନାର ଭୂମିକାକୁ ପ୍ରଶଂସା କରିତିଲେ । ଇମ୍ରାନ୍ କହିଥିଲେ ଯେ, ପାକିସ୍ତାନୀ ସୈନିକ ଯେଉଁଭଳି ଯୁଦ୍ଧ ଲଢିଛନ୍ତି ତାହାର ଉଦାହରଣ ନାହିଁ । ସେ ଏହା ମଧ୍ୟ କହିଥିଲେ ଯେ, ଦୁନିଆର ଅନ୍ୟକୌଣସି ଦେଶର ସେନା ପାକ୍ ସେନାର ସମକକ୍ଷ ନୁହନ୍ତି ।

ବଲୁଚିସ୍ତାନ ରଣନୈତିକ କାରଣରୁ ପାକିସ୍ତାନ ପାଇଁ ଗୁରୁତ୍ୱପୂର୍ଣ୍ଣ

ବଲୁଚିସ୍ତାନ ରଣନୈତିକ ଦୃଷ୍ଟିକୋଣରୁ ପାକିସ୍ତାନ ପାଇଁ ଗୁରୁତ୍ୱ ରଖେ । ପାକିସ୍ତାନର ସବୁଠାରୁ ବଡ ପ୍ରଦେଶ ମଧ୍ୟରେ ଗଣିତ ହେଉଥଇବା ବଲୁଚିସ୍ତାନର ସୀମା ଆଫଗାନିସ୍ତାନ ଓ ଇରାନ ସହିତ ମିଶେ । ଅନ୍ୟପକ୍ଷରେ ବଲୁଚ ବିଦ୍ରୋହୀଙ୍କ ଲକ୍ଷ୍ୟ ସୀମା ମଧ୍ୟରେ କରାଚି ମଧ୍ୟ ଆସୁଛି । ଚିନ୍-ପାକିସ୍ତାନ ଇକୋନମିକ୍ କରିଡରର ବଡ଼ ଭାଗ ଏହି ପ୍ରଦେଶ ଦେଇ ଯାଇଥାଏ । ଗ୍ୱାଦର ବନ୍ଦର ମଧ୍ୟ ବଲୁଚିସ୍ତାନରେ ଅଛି । ତେବେ ଏହି ବନ୍ଦରକୁ ପାକିସ୍ତାନ ଚୀନ ହାତରେ ଅର୍ପଣ କରିଛି ।