ପାକିସ୍ତାନୀ ସେନା ମୁଖ୍ୟ ଜେନରାଲ କମର ଜାଭେଦ ବାଜବାଙ୍କ ସହାୟତାରେ କ୍ଷମତାକୁ ଆସିଥିବା ପ୍ରଧାନମନ୍ତ୍ରୀ ଇମ୍ରାନ ଖାନଙ୍କୁ ତାଙ୍କ ଚାଲବାଜି ମହଙ୍ଗା ପଡିଛି ବୋଲି କୁହାଯାଉଛି । ଇମ୍ରାନ୍ ଖାନ୍ ଦେଶ ଉପରେ ଲମ୍ବା ଅବଧି ଶାସନ କରିବା ପାଇଁ ଜେନରାଲ ବାଜବାଙ୍କ ବିରୋଧରେ ଷଡ଼ଯନ୍ତ୍ର କରିଥିଲେ । ତେବେ ଏହି ଷଡ଼ଯନ୍ତ୍ର ତାଙ୍କୁ ମହଙ୍ଗା ପଡିଛି । ସେନା ମୁଖ୍ୟ ବାଜବା ଇମ୍ରାନଙ୍କ ଚାଲବାଜି ବୁଝିପାରି ତାଙ୍କୁ କ୍ଷମତାରୁ ହଟାଇବା ପାଇଁ ବିରୋଧୀ ଦଳଙ୍କୁ ନିଜ ସମର୍ଥନ ଦେଇଥିବା କୁହାଯାଉଛି ।
ଆଇଏସଆଇ ମୁଖ୍ୟଙ୍କୁ ନେଇ ଲଢେଇ
ଇମ୍ରାନ ଜେନରାଲ ବାଜବାଙ୍କ ସ୍ଥାନରେ ନିଜର ପ୍ରିୟ ପୂର୍ବତନ ଆଇଏସଆଇ ମୁଖ୍ୟ ଲେଫ୍ଟନାଣ୍ଟ୍ ଜେନରାଲ ଫୈଜ୍ ହମିଦଙ୍କୁ ଆଗାମୀ ସେନା ମୁଖ୍ୟ କରିବାକୁ ଚାହୁଁଥିଲେ । ଅନ୍ୟପକ୍ଷରେ ବାଜବା ନିଜ ପଦ ଛାଡିବାକୁ ଚାହୁଁନଥିଲେ । ତେଣୁ ସେ ଇମ୍ରାନଙ୍କ ଉପରେ କ୍ଷୁବ୍ଧ ଥିଲେ । କେବଳ ଏଇଥିପାଇଁ ବାଜବାଙ୍କ ଇଶାରାରେ ବିରୋଧୀ ଦଳ ଇମ୍ରାନଙ୍କ ବିରୋଧରେ ସଂସଦରେ ଅବିଶ୍ୱାସ ପ୍ରସ୍ତାବ ଆଣିଛନ୍ତି ।ତେବେ ଲେପ୍ଟେନାଣ୍ଟ୍ ଜେନରାଲ ଫୈଜ୍ ଇମ୍ରାନଙ୍କ ପାଇଁ ସାଂସଦଙ୍କୁ କିଣିବା ଲାଗି ଯୋଗାଡ କରିଥିଲେ । ତେବେ ଫୈଜଙ୍କ ଯିବା ପରେ ସେନା ଏଥିରୁ ଓହରି ଆସିଥିଲା । ଫଳରେ ଇମ୍ରାନ ସରକାର ସଂଖ୍ୟାଲଘୁ ହୋଇଯାଇଛି । ଏବେ ଇମ୍ରାନ ସରକାରର ପତନ ଅବଶ୍ୟମ୍ଭାବୀ ବୋଲି ରାଜନୈତିକ ପର୍ଯ୍ୟବେକ୍ଷକ କହୁଛନ୍ତି ।
ପାକିସ୍ତାନରେ ଏବେ ଇସଲାମିକ ଦେଶଙ୍କ ବୈଦେଶିକ ମନ୍ତ୍ରୀଙ୍କ ବୈଠକ ସମାପ୍ତ ହେବା ପରେ ଏବେ ସେଠାରେ ରାଜନୈତିକ ଗତିବିଧି ତୀବ୍ର ହୋଇଛି । ଇମ୍ରାନଙ୍କୁ ହଟାଇବା ପାଇଁ ବିରୋଧି ଅଣ୍ଟା ଭିଡିଥିବା ବେଳେ ଇମ୍ରାନ କହିସାରିଲେଣି ମୁଁ ଇସ୍ତଫା ଦେବି ନାହିଁ । ନିଜ ସରକାର ବଂଚାଇବା ପାଇଁ ସେ ସହଯୋଗୀଙ୍କୁ ମନାଇବା ଉଦ୍ୟମ ମଧ୍ୟ ଆରମ୍ଭ କଲେଣି । ଅନ୍ୟପକ୍ଷରେ ବିରୋଧୀଙ୍କ ଦାବି ଯେ, ଇମ୍ରାନଙ୍କ ସହଯୋଗୀ ମଧ୍ୟ ତାଙ୍କୁ ଛାଡି ସାରିଲେଣି । ସହଯୋଗୀଙ୍କ ସମର୍ଥନ ସେମାନଙ୍କ ପଟେ ଅଛି । ତେଣୁ ଇମ୍ରାନ ଯିବା ପକ୍କା । ବିରୋଧି ଏଭଳି କହିବା ପଛରେ ରହିଛି ସେନା ମୁଖ୍ୟଙ୍କ ପ୍ରତିଶ୍ରୁତି. ସେନା ମୁଖ୍ୟ ବାଜବା ଇମ୍ରାନଙ୍କୁ ହଟାଇବାକୁ ମନସ୍ଥିର କରି ସାରିଛନ୍ତି । ତେଣୁ ଇମ୍ରାନ୍ ଯିବେ ହିଁ ଯିବେ । କେବଳ କିଛି ସମୟର କଥା । କାରଣ ପାକିସ୍ତାନରେ ସେନା ହିଁ ସରକାର ଓ ଦେଶ ଚଳାଏ ।
ପା୍କିସ୍ତାନ ଇତିହାସରେ ଏଭଳି ଉଦାହରଣର ଅଭାବ ନାହିଁ ଯେତେବେଳେ ସେନା କହିବାରେ ପ୍ରଧାନମନ୍ତ୍ରୀ ଇସ୍ତଫା ଦେଇଛନ୍ତି । ତେଣୁ ଯଦି ଇମ୍ରାନ୍ କ୍ଷମତାରୁ ଯାନ୍ତି ତେବେ ଆଶ୍ଚର୍ଯ୍ୟ ହେବାର କିଛି ନାହିଁ । ଆଉ ଏହା ପ୍ରମାଣିତ ହେବ ଯେ, ଇମ୍ରାନଙ୍କ ନୟା ପାକିସ୍ତାନ ସେହି ପୁରୁଣା ପାକିସ୍ତାନ ଯେଉଁଠି ସେନା ହିଁ ସବୁକିଛି । ସେନା ହିଁ ସରକାର । ସେନା ହିଁ ଦେଶ ।
