ଚାରିଆଡେ କରୋନା କାୟା ବିସ୍ତାର କରି ଚାଲିଛି । କରୋନା ଭାଇରସ୍ ସାରା ବିଶ୍ୱରେ ଆତଙ୍କ ଖେଳାଇ ଦେଇଛି । କରୋନା ସମୟରେ ମାସ୍କର ଘୋର ଅଭାବ, ମାସ୍କ କଳାବଜାରୀ ଯୋଗୁ ମାସ୍କଟିଏ ପାଇବା ପାଇଁ ସାଧାରଣ ଗରିବ ଲୋକମାନେ ଆତୁର ହେଉଛନ୍ତି । ମାତ୍ର ଏହି ସମୟରେ ଗରିବ, ମୂଲିଆ ଓ ଖଟିଖିଆଙ୍କୁ ମାଗଣାରେ ମାସ୍କ ଯୋଗାଇ ଦେବା ପାଇଁ ଆଗେଇ ଆସିଛନ୍ତି ଜଣେ ମହିଳା । ନିଜ ଜୀବିକାକୁ ପଛରେ ପକାଇ ବଜାରରୁ କପଡ଼ା କିଣି ସେଥିରେ ମାସ୍କ ତିଆରି କରି ଲୋକଙ୍କୁ ବାଂଟୁଛନ୍ତି । ଦିନେ ନୁହେଁ କି ଦୁଇ ଦିନ ନୁହେଁ ଦୀର୍ଘ ଦେଢ଼ ବର୍ଷ ହେବ ମାଗଣାରେ ଲୋକଙ୍କୁ ମାସ୍କ ବାଂଟୁଛନ୍ତି ଶାନ୍ତି ଓରଫ୍ ଶାନ୍ତିଲତା ବଳିଆରସିଂହ, ଯାହାକୁ ଏବେ କେହି କେହି ମାସ୍କ ମହିଳା ବୋଲି ବିବେଚନା କରିବା ଆରମ୍ଭ କଲେଣି ।
ଶାନ୍ତିଙ୍କ ଘର ପୁରୀ ଜିଲ୍ଲା କଣାସ ଅଂଚଳରେ । ଦୀର୍ଘ ୨୦ ବର୍ଷ ହେବ ସିଲେଇ କରି ପେଟ ପୋଷିବା ଆଶାରେ ଭୁବନେଶ୍ୱର ଆସିଥିଲେ । କଳ୍ପନା ଛକରେ ଦୋକାନଟିଏ ଭଡ଼ାରେ ନେଇ ସିଲେଇ କରି ପରିବାର ପ୍ରତିପୋଷଣା କରନ୍ତି ଶାନ୍ତି । କିନ୍ତୁ ମହାମାରୀ ଯୋଗୁ ଲକ୍ଡାଉନ୍ ଏବଂ ସଟ୍ଡାଉନ୍ ପାଇଁ ତାଙ୍କ ରୋଜଗାର ବନ୍ଦ ହୋଇଯାଇଛି । ନିଜେ ବହୁବିଧ ଅସୁବିଧା ମଧ୍ୟ ଦେଇ ଗତି କରୁଛନ୍ତି । ମାତ୍ର ନିଜର ଭିନ୍ନ ଚିନ୍ତାଧାରା ପାଇଁ ସେ ସମସ୍ତଙ୍କ ପାଇଁ ଉଦାହରଣ ସାଜିଛନ୍ତି । କରୋନାର ପ୍ରଥମ ଲହରରେ ମାସ୍କ ଏବଂ ସାଇଟାଇଜର ଅଭାବୀକୁ ଦେଖି ପ୍ରଥମେ ମାସ୍କ ତିଆରି କରି ବାଂଟିବା ଆରମ୍ଭ କରିଥିଲେ । ଗରିବ ଅସହାୟ ଲୋକଟିଏ ମାସ୍କଟିଏ କିଣି ନ ପାରିବା ଏବଂ ଅଧିକ ଦର ଦେଇ ମାସ୍କ କିଣିବା ତାଙ୍କ ମନକୁ ଆନ୍ଦୋଳିତ କରିଥିଲା । ଏଥିପାଇଁ ସେ ନିଜ ଖର୍ଚ୍ଚରେ ମାସ୍କ ତିଆରି କରି ବାଂଟିବା ଆରମ୍ଭ କରିଦେଇଥିଲେ । ବିଶେଷ କରି ରାଜଧାନୀର ବିଭିନ୍ନ ଛକମାନଙ୍କରେ କାମ ଅପେକ୍ଷାରେ ଥିବା ଶ୍ରମିକଙ୍କ ପାଇଁ ମାସ୍କ ତିଆରି କରି ଦେବା ପାଇଁ ନିଷ୍ପତି ନେଇଥିଲେ । ଏମିତିକି ଗତବର୍ଷ କରୋନା ସମୟରେ କଳ୍ପନା ଛକ ନିକଟରେ ନିଜର ଟେଲରିଂ ମେସିନ୍ ପକାଇ ସଙ୍ଗେ ସଙ୍ଗେ ମାସ୍କ ତିଆରି କରି ଲୋକଙ୍କୁ ବାଂଟିଥିଲେ । ଏହି ସମୟରେ ୫ ଦିନ ଧରି ସେ ୭ ହଜାରରୁ ଊର୍ଦ୍ଧ୍ୱ ମାସ୍କ ଲୋକଙ୍କୁ ଦେଇଥିଲେ । ଏବେ କରୋନାର ଦ୍ୱିତୀୟ ଲହର ଚାଲିଥିବାବେଳେ ନିଜର ରୋଜଗାର ବନ୍ଦ ହୋଇଯାଇଥିବାରୁ ଘରଭଡ଼ା ଦେଇ ନ ପାରିବାରୁ ଘରେ ଆଣି ୩ଟି ମେସିନ୍ ପକାଇଛନ୍ତି । କିନ୍ତୁ ତାଙ୍କର ଏହି ମହତ୍ କାର୍ଯ୍ୟରୁ ବିଚ୍ୟୁତ ହୋଇନାହାନ୍ତି । ଶାନ୍ତି କୌଣସି ପୁରୁଣା କିମ୍ବା ବଳକା କପଡ଼ାରେ ମାସ୍କ ତିଆରି କରନ୍ତି ନାହିଁ । ନିଜେ ନୂଆ କପଡ଼ା ଆଣି ସେଥିରେ ମାସ୍କ ସିଲାଉଛନ୍ତି । ଏବେ ବି ଚାଲିଛି ତାଙ୍କର ମାଗଣା ମାସ୍କ ବଂଟନ । ବସ୍ତି ହେଉ ଅବା କେଉଁ ରାସ୍ତାକଡ଼ ଲୋକଙ୍କୁ ମାସ୍କ ଦେଇ ଚାଲିଛନ୍ତି ସେ । ବର୍ତମାନ ସୁଦ୍ଧା ୧୮ ହଜାରରୁ ଊର୍ଦ୍ଧ୍ୱ ମାସ୍କ ବାଂଟି ସାରିଲେଣି । ଏଥିପାଇଁ ଅନେକ ସମୟରେ ଅନେକ ବ୍ୟକ୍ତି ସହାୟତା ଯୋଗାଇ ଦେଉଥିବା ସେ କହିଛନ୍ତି । ଏ ସମ୍ପର୍କରେ ଶାନ୍ତି କୁହନ୍ତି, କରୋନା ସମୟରେ ମାସ୍କ କଳା ବଜାରୀ ବଢ଼ିଲା । ସାଧାରଣ ଗରିବ ଲୋକଟି ଏତେ ଟଙ୍କା ଦେଇ ମାସ୍କ କିଣିବା ପାଇଁ ଅସମର୍ଥ ହେବା ଦୃଶ୍ୟ ମୁଁ ନିଜେ ଦେଖିଛି । ଅନେକ ଲୋକଙ୍କ ପାଖରେ ଟଙ୍କା ନ ଥିବାରୁ ମାସ୍କ କିଣି ପାରନ୍ତି ନାହିଁ । ଯାହାକି ମୋତେ ବହୁତ କଷ୍ଟ ଦେଇଥିଲା । ନିଜେ ଅସୁବିଧାରେ ଥିଲେ ସୁଦ୍ଧା କୌଣସି ଉପାୟରେ ଲୋକଙ୍କ ପାଇଁ ସହାୟତାର ହାତ ବଢ଼ାଇଥିବାରୁ ଖୁସି ଲାଗୁଛି ବୋଲି ଶାନ୍ତି କହିଛନ୍ତି।
