କରୋନା ଭାଇରସର ନୂଆ ଭାରିଆଣ୍ଟର ନାଁ ରଖାଯାଇଛି ଓମିକ୍ରନ୍ । ଏଯାବତ କରୋନା ଭାଇରସର ୧୨ଟି ଭାଇରାଣ୍ଟ ସାମ୍ନାକୁ ଆସିସାରିଛି । ଅର୍ଥାତ ଓମିକ୍ରନ ହେଉଛି ୧୩ତମ ଭାରିଆଣ୍ଟ । କରୋନା ଭାଇରସର ୧୨ଟି ଭାରିଆଣ୍ଟର ନାମକରଣ ଗ୍ରୀକ୍ ଅକ୍ଷରକୁ ନେଇ ରଖାଯାଇଛି । ଯଦି ଆପଣ ଗ୍ରୀକ୍ ଅକ୍ଷରର କ୍ରମକୁ ଦେଖିବେ ତେବେ କରୋନାର ୧୨ ତମ ଭାରିଆଣ୍ଟ ‘ମୁ’ ଅଟେ, ଯାହା ପ୍ରଥମ ଥର ପାଇଁ ଆମେରିକାର କଲୋମ୍ବିଆରେ ଦେଖିବାକୁ ମିଳିଥିଲା । ତେବେ ଗ୍ରୀକ୍ ଅକ୍ଷର କ୍ରମ ଅନୁଯାୟୀ ‘ମୁ’ ପରେ ପରବର୍ତ୍ତୀ ଭାରିଆଣ୍ଟର ନାଁ ୧୩ ନମ୍ବରରେ ଥିବା ‘ନୁ’ (Nu) କିମ୍ବା ୧୪ ନମ୍ବରରେ ଥିବା ‘ଶୀ’ (Xi) ଅକ୍ଷରକୁ ନେଇ ରହିବା ଉଚିତ । କିନ୍ତୁ ବିଶ୍ୱ ସ୍ୱାସ୍ଥ୍ୟ ସଙ୍ଗଠନ ଦକ୍ଷିଣ ଆଫ୍ରିକାରେ ବାହାରିଥିବା ନୂଆ ଭାରିଆଣ୍ଟର ନାଁ ରଖିଛନ୍ତି ‘ଓମିକ୍ରନ‘ ଯାହା କି ଗ୍ରୀକ ଅକ୍ଷରରେ ୧୫ ନମ୍ବରରେ ଆସିଥାଏ । ତେବେ ନୂଆ ଭାରିଆଣ୍ଟର ନାମକରଣ କଲା ବେଳେ WHO କାହିଁକି ଦୁଇଟି ଅକ୍ଷରକୁ ବାଦ ଦେଲା ତାହା ଏବେ ସାଧାରଣରେ ପ୍ରଶ୍ନ ଉଠୁଛି । ତେବେ ପ୍ରଶ୍ନ ଉଠିବା ପରେ WHO ଏହାର ଏକ ସ୍ପଷ୍ଟ ଉତ୍ତର ରଖିଛି, ଯାହାକୁ ବିଶ୍ୱବ୍ୟାପୀ ସମାଲୋଚନା କରାଯାଉଛି ।
WHOର ଉତ୍ତର ଖୁବ ଯୁକ୍ତିଯୁକ୍ତ । କିନ୍ତୁ ଯେଉଁ କାରଣରୁ ସଂଗଠନ ଅକ୍ଷର ଗୁଡ଼ିକୁ ଚୟନ କରିଛି ତାକୁ ଲୋକେ ଉପହାସ କରୁଛନ୍ତି । କରୋନାର ୧୨ଟି ଯାକ ଭାରିଏଣ୍ଟ ଗ୍ରୀକ ଅକ୍ଷର ଉପରେ ଆଧାରିତ- ଆଲଫା, ବିଟା, ଗାମା, ଡେଲଟା, ଏପ୍ସିଲୋନ, ଜେଟା, ଏଟା, ଥେଟା, ଆୟୋଟା, କପ୍ପା, ଲେମଡା, ଏବଂ ମୁ । କିନ୍ତୁ ବିଶ୍ୱର ସ୍ୱାସ୍ଥ୍ୟ ଉପରେ ନଜର ରଖୁଥିବା WHO ପରବର୍ତ୍ତୀ ଭାରିଆଣ୍ଟର ନାଁ ୧୩ ନମ୍ବରରେ ଆସୁଥିବା ‘ନୁ’ କିମ୍ବା ୧୪ ନମ୍ବରରେ ଆସୁଥିବା ‘ଶୀ’ ବଦଳରେ ୧୫ ନମ୍ବର ଅକ୍ଷର ‘ଓମିକ୍ରନ’କୁ ବାଝିଛି ।
WHOର ପ୍ରବକ୍ତା ତାରିକ୍ ଜୋସାରୋବିକଙ୍କ କହିବା ଅନୁଯାୟୀ ‘ନୁ’ ଏବଂ ‘ଶୀ’ ଖୁବ କମନ ଅକ୍ଷର ଅଟେ । ଅନେକ ଦେଶରେ ଏହି ଅକ୍ଷରର ବ୍ୟବହାର ନାଁ ଆଗରେ କିମ୍ବା ପଛରେ ବ୍ୟବହାର ହୋଇଥାଏ । ନ୍ୟୁୟର୍କ ଟାଇମ୍ସର ଏକ ଆର୍ଟିକଲରେ ଲେଖାହୋଇଛି ଯେ, ଶୀ ଅକ୍ଷରର ବ୍ୟବହାର ଏଥିପାଇଁ କରାଗଲାନାହିଁ କାରଣ ଏହା ଚୀନ ରାଷ୍ଟ୍ରପତି ଶୀ ଜିନପିଙ୍ଗଙ୍କ ନାଁ ଆଗରେ ଆସୁଛି । WHO ର ନିୟମ ଅନୁଯାୟୀ ଭାଇରସ ନାଁ କୌଣସି ନାମ, ବ୍ୟକ୍ତି, ସଂସ୍ଥା, ସଂସ୍କୃତି, ସମାଜ, ଧର୍ମ, ବ୍ୟବସାୟ କିମ୍ବା ଦେଶ ନାମ ଉପରେ ରଖାଯାଇପାରିବନାହିଁ । ଯାହାଦ୍ୱାରା କାହାର ଭାବନାକୁ ଆଘାତ ପହଞ୍ଚିବ ନାହିଁ ।
‘ନୁ’ ଅକ୍ଷର କଥା କହିବାକୁ ଗଲେ ତାହା ଇଂରାଜୀ ଶବ୍ଦ ‘ନ୍ୟୁ’ ସହିତ ସମାନ ଲାଗୁଛି । ସେମାନଙ୍କର ଉଚ୍ଚାରଣ ମଧ୍ୟ ପ୍ରାୟ ସମାନ । ଉଚ୍ଚାରଣ ସମୟରେ କେହି ଯେଭଳି ଦ୍ୱନ୍ଦରେ ନପଡ଼ନ୍ତି ସେଥିପାଇଁ ଏହି ୧୩ ତମ ଗ୍ରୀକ୍ ଅକ୍ଷର କରୋନାର ନୂତନ ଭାରିଆଣ୍ଟର ନାମକରଣ ପାଇଁ ବ୍ୟବହୃତ ହୋଇନଥିଲା । କାରଣ ଲୋକମାନେ ‘ନୁ’ ଭାରିଏଣ୍ଟ ଏବଂ ‘ନ୍ୟୁ’ ଭାରିଏଣ୍ଟ ମଧ୍ୟରେ ଦ୍ୱନ୍ଦ୍ୱରେ ପଡ଼ିପାରନ୍ତି ।
WHO ପ୍ରାରମ୍ଭିକ ସମୟରେ ଏହି ପ୍ରଶ୍ନର ଉତ୍ତର ରଖିନଥିଲା ଯେ, ଦକ୍ଷିଣ ଆଫ୍ରିକାରୁ ବାହାରିଥିବା କରୋନା ଭାରିଏଣ୍ଟର ନାମ ଓମିକ୍ରନ କାହିଁକି ରଖାଯାଇଛି । କାହିଁକି କଲୋମ୍ବିଆରେ ପ୍ରଥମେ ଦେଖାଦେଇଥିବା ‘ମୁ’ ଭାରିଏଣ୍ଟ ପରେ ଦୁଇଟି ଗ୍ରୀକ ଅକ୍ଷରକୁ ବାଦ୍ ଦିଆଯାଇଛି । କିନ୍ତୁ ଯେତେବେଳେ ବିଶ୍ୱବ୍ୟାପୀ ଏହାକୁ ନେଇ ପ୍ରଶ୍ନ ଉଠିଲା ଏବଂ ସଙ୍ଗଠନକୁ ନିନ୍ଦା କରାଗଲା, ସେତେବେଳେ ଏହା ପଛରେ ଥିବା କାରଣ ଦୁନିଆ ସାମ୍ନାରେ ରଖାଗଲା । କିନ୍ତୁ ଏହା ପରେ ଏବେ ଲୋକ କହୁଛନ୍ତି ଯେ, WHO ଚୀନ ସରକାରକୁ ଭୟ କରୁଛି ।
ନ୍ୟୁୟର୍କ ଟାଇମ୍ସ ଲେଖିଛି ଯେ ଆମେରିକାର ରିପବ୍ଲିକାନ ସିନେଟର ଟେଡ କ୍ରୁଜ କହିଛନ୍ତି ଯେ ଚାଇନାର କମ୍ୟୁନିଷ୍ଟ ପାର୍ଟିକୁ WHO ଭୟ କରୁଛି। ସେ ପୂର୍ବରୁ ଏକ ବିଶ୍ୱ ବିପର୍ଯ୍ୟୟ ଲୁଚାଇବାକୁ ଚେଷ୍ଟା କରିଛନ୍ତି । ଭୁଲ୍ କରିବା ପରେ, ସେଗୁଡ଼ିକୁ ସଂଶୋଧନ କରିବା ପରିବର୍ତ୍ତେ ଘୋଡ଼ାଉଛି ।
୨୦୧୯ ମସିହାରେ, ଯେତେବେଳେ ଚାଇନାର ୱୁହାନରେ କରୋନା ଭୂତାଣୁର ପ୍ରଥମ ମାମଲା ସାମ୍ନାକୁ ଆସିଥିଲା ସେତେବେଳେ ବିଶ୍ୱର ଅନେକ ଦେଶ କରୋନା ଭାଇରସକୁ ଚାଇନାର ଭାଇରସ୍ ବୋଲି କହୁଥିଲେ । ଯେଉଁଥିରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ମଧ୍ୟ ସାମିଲ ଅଛନ୍ତି । ଯାହାକୁ ଚୀନ୍ ଦୃଢ଼ ବିରୋଧ କରିଥିଲା । ଚୀନ୍ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଜେଙ୍ଗ ଶୁଆଙ୍ଗ କହିଛନ୍ତି ଯେ କରୋନାଭାଇରସ୍ ସମଗ୍ର ବିଶ୍ୱ ପାଇଁ ଏକ ସମସ୍ୟା ଅଟେ । ଏହାକୁ କୌଣସି ଦେଶ ସହିତ ସଂଯୁକ୍ତ କରିବା ଉଚିତ ନୁହେଁ । ଏହା ବିଶ୍ୱରେ ଗୋଟିଏ ଦେଶ ପ୍ରତି ଭୟ ବିସ୍ତାର କରିବ ।
ଟେଲିଗ୍ରାଫର ବରିଷ୍ଠ ସମ୍ପାଦକ ପଲ୍ ନୁକୀ ଟ୍ୱିଟ୍ କରିଛନ୍ତି ଯେ ତାଙ୍କ, ଉତ୍ସ ତାଙ୍କୁ କହିଛି ଯେ WHO ଜାଣିଶୁଣି ‘ନୁ’ ଏବଂ ‘ଶୀ’ ଅକ୍ଷରଗୁଡ଼ିକୁ ଛାଡି ଦେଇଛି । ନୁ ଏବଂ ନ୍ୟୁ ମଧ୍ୟରେ ଦ୍ୱନ୍ଦ ହେତୁ ଏବଂ ଶୀ ଏଥିପାଇଁ କାରଣ ବିଶ୍ୱରେ କୌଣସି ସ୍ଥାନକୁ ପୁଣି ଥରେ ସମସ୍ୟା ଏବଂ ତାତ୍ସଲ୍ୟର ସମ୍ମୁଖୀନ ହେବାକୁ ପଡିବ ନାହିଁ ।
ସୂଚନା ଅନୁଯାୟୀ WHO କୋଭିଡ -19 ର ନୂତନ ଭାରିଆଣ୍ଟ ଓମିକ୍ରନ୍ କୁ ଭାରିଆଣ୍ଟ ଅଫ୍ କନ୍ସର୍ନ – VOC ବୋଲି କହିଛି । ଅର୍ଥାତ ବିଶ୍ୱର ଦେଶମାନେ ଏଥିପ୍ରତି ଯତ୍ନବାନ ହେବା ଉଚିତ୍ । ଏହା କୁହାଯାଉଛି ଯେ B.1.1.529 ଅର୍ଥାତ୍ ଓମିକ୍ରନ୍ ଭାରିଏଣ୍ଟ ୩୦ ଥର ମ୍ୟୁଟେଣ୍ଟ ହୋଇସାରିଛି ଅର୍ଥାତ ପରିବର୍ତ୍ତନ ହୋଇସାରିଛି । ଏହା ବିଶ୍ୱରେ ମହଜୁଦ ଅନେକ ଭ୍ୟାକସିନକୁ ଧୋକା ଦେଇପାରେ ।
