ଆଫଗାନିସ୍ତାନ ଛା଼ଡିବା ପୂର୍ବରୁ ଆମେରିକାର ଶେଷ ସୈନିକ ତାଲିବାନ କମାଣ୍ଡରକୁ କ’ଣ କହିଥିଲେ ?

୨୦ ବର୍ଷ ପରେ ଆମେରିକା ମଙ୍ଗଳବାର ଦିନ ଆଫଗାନିସ୍ତାନ ଛାଡିଛି । ସୋମବାର-ମଙ୍ଗଳବାର ମଧ୍ୟରାତ୍ରୀରେ ଆମେରିକାର ବାକି ସୈନିକ ତିନୋଟି ବିମାନରେ କାବଲୁ ଛାଡି ଚାଲିଯାଇଥିଲେ । ଆଫଗାନିସ୍ତାନର ଭବିଷ୍ୟତ କ’ଣ ହେବ ତାକୁ ନେଇ ଆଲୋଚନା ଚାଲିଥିବା ବେଳେ ପେଣ୍ଟାଗନ ଏହା ଭିତରେ କାବୁଲ ଛାଡିଥିବା ଶେଷ ସୈନିକଙ୍କ ଫଟୋକୁ ଟ୍ୱିଟ୍ କରିଛି । ଆସନ୍ତୁ ଜାଣିବା ଆଫଗାନିସ୍ତାନ ମାଟିକୁ ସଭାଶେଷର ‘ବାଏ’ କହିଥିବା ସେହି ଶେଷ ସୈନିକ କିଏ ଓ ଆଫଗାନିସ୍ତାନରେ ତାଙ୍କ ଦାୟିତ୍ୱ କ’ଣ ଥିଲା ତଥା ସେ କାବୁଲ ଛାଡିବା ବେଳେ ତାଲିବାନ କମାଣ୍ଡରଙ୍କୁ କ’ଣ କହିଥିଲେ ।

ମେଜର ଜେନରାଲ କ୍ରିସ୍ ଡୋନହ୍ୟୁ ଥିଲେ ଶେଷ ସୈନିକ

ଆଫଗାନିସ୍ତାନ ଛାଡିଥିବା ଆମେରିକାର ଶେଷ ସୈନିକ ହେଉଛନ୍ତି କ୍ରିସ୍ ଡୋନହ୍ୟୁ । ସେ ହେଉଛନ୍ତି ଆମେରିକା ସେନାର 82nd ABNdiv କମାଣ୍ଡିଂ ଜେନରାଲ । ଏହି ଡିଭିଜନ୍ ୧୮ ଏୟାରବର୍ଣ୍ଣ କୋର ଅନ୍ତର୍ଗତରେ ଆସିଥାଏ । ପେଣ୍ଟାଗନ ଲେଖିଛି ଯେ, ଆଫଗାନିସ୍ତାନ ଛାଡିଥିବା ଶେଷ ଆମେରିକୀୟ ସୈନିକ ମେଜର ଜେନରାଲ କ୍ରିସ୍ ଡୋନହ୍ୟୁ । ମେଜର ଜେନରାଲ କ୍ରିସଙ୍କ ଆମେରିକାୟ ବାୟୁସେନାର ସି-୧୭ ବିମାନରେ ପ୍ରବେଶ ସହିତ ଆଫଗାନିସ୍ତାନରେ ଆମେରିକା ମିଶନର ପରିସମାପ୍ତି ଘଟିଛି ।

୩୧ ଅଗଷ୍ଟ ଥିଲା ଡେଡ୍ ଲାଇନ୍

ଆମେରିକା ୩୧ ଅଗଷ୍ଟ ସୁଧା ଆଫଗାନିସ୍ତାନ ଛାଡିବ ବୋଲି ଆଗରୁ ନିର୍ଧାରିତ ହୋଇଥିଲା । ତେବେ କାବୁଲ ପରିସ୍ଥିତିକୁ ଦୃଷ୍ଟିରେ ରଖି ସମୟ ସୀମକୁ ବଢାଇବା ଲାଗି ତାଲିବାନ ସହିତ ଆଲୋଚନା ହୋଇଥିଲା । କିନ୍ତୁ ତାଲିବାନ ଅଧିକ ସମୟ ଦେବାକୁ ମନା କରିଦେଇଥିଲା । ଏହାପରେ ଆମେରିକା ପାଖରେ ୩୧ ତାରିଖରେ ହିଁ ଆଫଗାନିସ୍ତାନ ଛାଡିବା ଛଡା ଅନ୍ୟ ଉପାୟ ନଥିଲା ।

୧୯୯୨ରେ ସେନାରେ ହୋଇଥିଲେ ସାମିଲ

କ୍ରିସ୍ ଡୋନହ୍ୟୁ ୧୯୯୨ରେ ଆମେରିକା ସେନାର କମିଶନ ପାଇଥିଲେ । ଆଫଗାନିସ୍ତାନରେ ସେ କମ୍ବାଇନ୍ଡ ଜଏଣ୍ଟ୍ ସ୍ପେଶାଲ ଅପରେସନ୍ସ ଟାସ୍କ ଫୋର୍ସର କମାଣ୍ଡର ଥିଲେ । ଆମେରିକା ସେନାରେ ସେ ଜଣେ ସମ୍ମନାସ୍ପଦ ଅଧିକାରୀ ଭାବେ ପରିଚିତ ।

କାବୁଲ ଛାଡିବା ପୂର୍ବରୁ ତାଲିବାନ କମାଣ୍ଡରକୁ କହିଥିଲେ ଏମିତି କଥା..

ଆମେରିକା ସେଣ୍ଟ୍ରାଲ କମାଣ୍ଡର କମାଣ୍ଡର ଜେନରାଲ ଫ୍ରାଙ୍କ୍ ମେକାଞ୍ଜିଙ୍କ ଅନୁସାରେ କାବୁଲରୁ ବାହାରିବା ସମୟରେ କ୍ରିସଙ୍କ ଶେଷ କାମ ଥିଲା ତାଲିବାନ କମାଣ୍ଡର ସହିତ ଆଲୋଚନା । ସେ ସେହି ତାଲିବାନ କମାଣ୍ଡର ସହିତ କଥା ହୋଇଥିଲେ ଯିଏ ଆମେରିକୀୟ ସୈନିକଙ୍କ ଫେରିବା ଉଡାଣକୁ ନେଇ କୋଅର୍ଡିନେଟ କରୁଥିଲେ । ତାଲିବାନ କମାଣ୍ଡରକୁ ସେ ଏହି ସୂଚନା ଦେଇଥିଲେ ଯେ, ଶେଷ ଆମେରିକୀୟ ସୈନିକଙ୍କ ନେଇ ବିମାନ ଉଡିବାକୁ ଯାଇଛି ।