ସାରନାଥ ଅଶୋକ ସ୍ତମ୍ଭର ସିଂହ ଓ ସଂସଦ ସେଣ୍ଟ୍ରାଲ ଭିସ୍ତାରେ ଲାଗିଥିବା ସିଂହ ମଧ୍ୟରେ ପ୍ରଭେଦ କ’ଣ ?

ସଂସଦ ଭବନର ନୂଆ ଅଟ୍ଟାଳିକା ସେଣ୍ଟ୍ରାଲ ଭିସ୍ତାରେ ଲାଗିଥିବା ରାଷ୍ଟ୍ରୀୟ ପ୍ରତୀକ ଏବେ ଚର୍ଚ୍ଚାରେ ଅଛି । ଟିଏମସି ସାଂସଦ ମହୁଆ ମୋଇତ୍ର ଓ ଆପ୍ ସାଂସଦ ସଂଜୟ ସିଂହଙ୍କ ବୟାନ ପରେ ଏହି ବିବାଦ ବଢିବାରେ ଲାଗିଛି । ଉଭୟଙ୍କ ଅଭିଯୋଗ ଯେ, ମୋଦି ସରକାର ରାଷ୍ଟ୍ରୀୟ ପ୍ରତୀକକୁ ବଦଳାଇ ଦେଇଛନ୍ତି । ସାରନାଥର ସିଂହ ଓ ସାଂଚି ସ୍ଥୁପର ସିଂହଠାରୁ ସେଣ୍ଟ୍ରାଲ ଭିସ୍ତା ସିଂହ ଭିନ୍ନ ବୋଲି ଅଭିଯୋଗ ଉଠିଲାଣି । ଏମିତିରେ ଆସନ୍ତୁ ଜାଣିବା ସାରନାଥ ଓ ସେଣ୍ଟ୍ରାଲ ଭିସ୍ତା ସିଂହ ମଧ୍ୟରେ କ’ଣ ପ୍ରଭେଦ ରହିଛି ଓ ଅଶୋକ ଏଭଳି ସ୍ଥମ୍ଭ ପ୍ରତିଷ୍ଠା କରିବା ପଛରେ କ’ଣ ଥିଲା କାରଣ ?

ଅଶୋକ ସ୍ଥମ୍ଭର ସିଂହ

ଅଶୋକ ସ୍ଥମ୍ଭର ସିଂହକୁ ରାଷ୍ଟ୍ରୀୟ ପ୍ରତୀକ ଭାବେ ଜାନୁଆରୀ ୨୬ ୧୯୫୦ରେ ଗ୍ରହଣ କରାଯାଇଥିଲା । ଏହି ପ୍ରତୀକ ସରକାରୀ ଲେଟର ହେଡ୍ ସହିତ ମୁଦ୍ରାରେ ସ୍ଥାନ ପାଇଥାଏ । ଭାରତୀୟ ପାସପୋର୍ଟରେ ମଧ୍ୟ ଏହି ପ୍ରତୀକ ରହିଥାଏ । ଏହି ସ୍ଥମ୍ଭର ନିମ୍ନଭାଗରେ ଥିବା ଅଶୋକ ଚକ୍ର ମଧ୍ୟ ଭାରତୀୟ ଜାତୀୟ ପତାକାରେ ସ୍ଥାନ ପାଇଛି । ଏହି ପ୍ରତୀକ ସମ୍ରାଟ ଅଶୋକଙ୍କ ଯୁଦ୍ଧ ଓ ଶାନ୍ତି ନୀତିକୁ ପ୍ରଦର୍ଶିତ କରିଥାଏ ।

ଖ୍ରୀଷ୍ଟପୂର୍ବ ୩୦୪ରେ ଜନ୍ମିତ ଅଶୋକ ଖ୍ରୀଷ୍ଟପୂର୍ବ ୨୩୨ ପର୍ଯ୍ୟନ୍ତ ଶାସନ କରିଥିଲେ । ତାଙ୍କ ସାମ୍ରାଜ୍ୟ ଆଫଗାନିସ୍ତାନରୁ ବାଂଲାଦେଶ ଓ କାଶ୍ମୀରରୁ ଗୋଦାବରୀ ନଦୀ ପର୍ଯ୍ୟନ୍ତ ବିସ୍ତୃତ ଥିଲା । ନିଜ ସାମ୍ରାଜ୍ୟର ଶକ୍ତି ଓ ସମ୍ରାଟଙ୍କ ଉପସ୍ଥିତିକୁ ଜାହିର କରିବା ପାଇଁ ସେ ଏହି ସ୍ଥମ୍ଭର ପରିକଳ୍ପନା କରିଥିଲେ । ସ୍ଥମ୍ଭରେ ଥିବା ଚାରି ସିଂହଙ୍କ ଉପସ୍ଥିତି ଦ୍ୱାରା ଅଶୋକ କହିବାକୁ ଚାହୁଁଥିଲେ ଯେ, ତୁମ ସମ୍ରାଟଙ୍କର ନଜର ତୁମ ଉପରେ ରହିଛି । ଏହା ସହିତ ସେ ସାମନ୍ତ ରାଜାମାନଙ୍କୁ ମଧ୍ୟ ସନ୍ଦେଶ ଦେବାକୁ ଚାହୁଁଥିଲେ ଯେ, ସେମାନ ମୌର୍ଯ୍ୟ ସାମ୍ରାଜ୍ୟର କରଦ ରାଜା ଓ ସାମ୍ରାଜ୍ୟ ତଥା ସମ୍ରାଟଙ୍କ ନଜର ସେମାନଙ୍କ ଉପରେ ରହିଛି । କୌଣସି ପ୍ରକାରର ବିଦ୍ରୋହର କଳ୍ପନା ମଧ୍ୟ ଆଣିବା ଆତ୍ମଘାତକ ହେବ ।

ଅଶୋକ ସ୍ଥମ୍ଭର ଥିବା ଚାରୀ ସିଂହ ଏସୀୟ ସିଂହ ଅଟନ୍ତି । ଏହି ଚାରି ସିଂହ ହେଉଛନ୍ତି ଶକ୍ତି,ସାହାସ,ଆତ୍ମବିଶ୍ୱାସ ଓ ଗୌରବର ପ୍ରତିନିଧିତ୍ୱ କରନ୍ତି । ବିହାରର ବୈଶାଳୀ, ଲୋରିୟା ଓ ରାମପୁରବାରେ ମଧ୍ୟ ଅଶୋକଙ୍କ ସ୍ଥମ୍ଭ ରହିଛି । ତେବେ ଏହି ସ୍ଥମ୍ଭ ସବୁ ଅଶୋକ ବୌଦ୍ଧ ଧର୍ମ ଗ୍ରହଣ ପୂର୍ବର ଥିଲା । କିନ୍ତୁ କଳିଙ୍ଗ ଯୁଦ୍ଧ ପରେ ଅଶୋକ ବୌଦ୍ଧ ଧର୍ମ ଗ୍ରହଣ କରିଥିଲେ । ବୌଦ୍ଧ ଧର୍ମ ଗ୍ରହଣ ପରେ ସାରନାଥ ଓ ସାଂଚୀର ଅଶୋକ ସ୍ଥମ୍ଭ ନିର୍ମିତ ହୋଇଥିଲା । ଏହି ଦୁଇ ସ୍ଥାନର ସ୍ଥମ୍ଭରେ ଥିବା ସିଂହ ସୌମ୍ୟ ଥିଲେ ।

ଟିଏମସି ସାଂସଦଙ୍କ ଟ୍ୱିଟ୍ ପରେ ବିବାଦ

ଟିଏମସି ସାଂସଦ ମହୁଆ ମୋଇତ୍ରା ସାରନାଥ ଓ ସେଣ୍ଟ୍ରାଲ ଭିସ୍ତାରେ ଲାଗିଥିବା ସିଂହଙ୍କ ଚିତ୍ର ପୋଷ୍ଟ କରି ବିବାଦ ସୃଷ୍ଟି କରିଛନ୍ତି । ସେ ଟ୍ୱିଟ୍ କରି ଲେଖିଛନ୍ତି ଯେ, ସତ କହିବାକୁ ଗଲେ ସତ୍ୟମେବ ଜୟତେରୁ ସିଂହମେବ ଜୟତେ ପର୍ଯ୍ୟନ୍ତ ଆମେ ପହଂଚି ସାରିଲେଣି । ବହୁତ ଦିନ ଧରି ଆତ୍ମାରେ ଥିବା ସଂକ୍ରମଣ ବାହାରକୁ ଆସିଛି । ତାଙ୍କ ଟ୍ୱିଟ୍ ପରେ ସେଣ୍ଟ୍ରାଲ ଭିସ୍ତା ସିଂହ ମାମଲା ଗରମ ହୋଇଛି । ଦାବି କରାଯାଉଛି ଯେ, ସେଣ୍ଟ୍ରାଲ ଭିସ୍ତା ସିଂହର ମୁହଁ ଅଧିକ ଖୋଲା ଅଛି । ଏଥିରୁ ସ୍ପଷ୍ଟ ହେଉଛି ଯେ, ଏହା ଆକ୍ରାମକ ମୁଦ୍ରା । ଯାହାକି ଭାରତର ଶାନ୍ତିପ୍ରିୟ ଓ ସୌମ୍ୟ ଛବିର ବିଲକୁଲ ଓଲଟା । ଅନ୍ୟପକ୍ଷରେ ୧୩୦ କୋଟି ଦେଶବାସୀ ଦେଖନ୍ତୁ ଦେଶ ସହ କ’ଣ ହେଲାଣି ବୋଲି କହିଛନ୍ତି ସଂଜୟ ସିଂହ ।