ବାଂଲାଦେଶରେ ହିନ୍ଦୁଙ୍କ ବିରୋଧରେ ବଡ଼ଧରଣର ହିଂସା ଦୁନିଆକୁ ଇସଲାମିକ୍ ମୌଳବାଦକୁ ନୂଆ ନଜରରେ ଦେଖିବାକୁ ବାଧ୍ୟ କରିଛି । ମୁସଲିମ ଅତିବାଦୀଙ୍କ ପାଇଁ କେବଳ ଯେ, ବାଂଲାଦେଶର ହିନ୍ଦୁ ଚିନ୍ତାରେ ନାହାନ୍ତି ସେଠାକର ସରକାର ମଧ୍ୟ ଚିନ୍ତାରେ ପଡିଯାଇଛନ୍ତି । କାରଣ ହେଉଛି ବାଂଲାଦେଶ ଅର୍ଥନୈତିକ ଦୃଷ୍ଟିରୁ ପ୍ରଗତି କରୁଥିବା ବେଳେ ଇସଲାମିକ ଆତଙ୍କବାଦ ଏହାର ଭାବମୂର୍ତ୍ତିକୁ କ୍ଷୁର୍ଣ୍ଣ କରୁଛି । ବାଂଲାଦେଶ ସରକାର ଏବେ ଦେଶର ପ୍ରଥମ ସମ୍ବିଧାନକୁ ପୁଣିଥରେ ଲାଗୁ କରିବାକୁ ଚିନ୍ତା କରୁଛନ୍ତି । ଦେଶ ସ୍ୱାଧିନ ହେବା ପରେ ୧୯୭୨ରେ ବାଂଲାଦେଶ ପ୍ରଥମ ସମ୍ବିଧାନକୁ ଗ୍ରହଣ କରିଥିଲା । ଏହି ସମ୍ବିଧାନ ଅନୁସାରେ ବାଂଲାଦେଶ ଧର୍ମନିରପେକ୍ଷ ରାଷ୍ଟ୍ର ଥିଲା । କିନ୍ତୁ ବଂଗବନ୍ଧୁ ତଥା ବାଂଲାଦେଶର ସୃଷ୍ଚିକର୍ତ୍ତା ଶେଖ ମୁଜିବୁର ରହମାନଙ୍କ ହତ୍ୟା ପରେ ସବୁକିଛି ବଦଳି ଯାଇଥିଲା ।
ବଂଗବନ୍ଧୁଙ୍କ ହତ୍ୟା ପରେ ବଦଳି ଗଲା ଚିତ୍ର
୧୯୭୫ ମସିହାରେ ସାମରିକ ବିଦ୍ରୋହ ଜରିଆରେ ମୁଜିବୁର ରହମନଙ୍କୁ ତାଙ୍କ ପରିବାର ସହିତ ହତ୍ୟା କରାଯାଇଥିଲା । ବଂଚିଯାଇଥିଲେ ତାଙ୍କ ଝିଅ ତଥା ବର୍ତ୍ତମାନର ପ୍ରଧାନମନ୍ତ୍ରୀ ଶେଖ ହସିନା । ୧୯୭୫ରେ ଶେଖ ମୁଜିବୁରଙ୍କ ହତ୍ୟା ପରଠାରୁ ୧୯୯୦ ପର୍ଯ୍ୟନ୍ତ ବାଂଲାଦେଶରେ ସାମରିକ ଶାସନ ଜାରି ଥିଲା । ଏହି ସମୟରେ ସେନା ମୁସଲିମ୍ ମୌଳବାଦୀଙ୍କୁ ସମର୍ଥନ କରୁଥିଲା । ୧୯୭୫ ମସିହାରେ ଜମାତ-ଏ-ଇସଲାମି ଭଳି ଦଳ ଉପରୁ ସାମରିକ ସରକାର ପ୍ରତିବନ୍ଧକ ହଟାଇ ଦେଇଥିଲା । ଫଳରେ ପାକିସ୍ତାନ ସମର୍ଥକ ଜମାତ୍ ଭଳି ଦଳ ପାଇଁ ରାଜନୀତିରେ ସାମିଲ ହେବା ସହଜ ହୋଇଥିଲା । ୧୯୭୯ରେ ବାଂଲାଦେଶର ସମ୍ବିଧାନର ପ୍ରସ୍ତାବନାରୁ ଧର୍ମନିରପେକ୍ଷ ଶବ୍ଦକୁ ହଟାଇ ଦିଆଯାଇଥିଲା । ଏହାର ୯ ବର୍ଷ ପରେ ୧୯୮୮ରେ ଜେନରାଲ ଏରସାଦଙ୍କ ଶାସନ କାଳରେ ବାଂଲାଦେଶ ସମ୍ବିଧାନରେ ସଂଶୋଧନ କରାଯାଇ ଏହାକୁ ଇସଲାମିକ ରାଷ୍ଟ୍ର ଭାବେ ଘୋଷଣା କରାଯାଇଥିଲା ।
ସାମରିକ ଶାସନରେ ମୁସଲିମ୍ ମୌଳବାଦୀଙ୍କୁ ମିଳିଥିଲା ଖୋଲା ପଡିଆ
୧୯୮୮ର ସମ୍ବିଧାନ ସଂଶୋଧନ ପରେ ବାଂଲାଦେଶରେ ମଦ୍ରାସ ଛତୁ ଫୁଟିଲା ଭଳି ଖୋଲିଥିଲା । ୧୯୭୫ରେ ଯେଉଁଠି ମଦ୍ରାସାଙ୍କ ସଂଖ୍ୟା ଥିଲା ୧୮୩୦ ସେହି ସଂଖ୍ୟା ୧୯୯୦ ବେଳକୁ ୫ ହଜାର ୭୯୩ ହୋଇ ଯାଇଥିଲା । ଏବେ ବାଂଲାଦେଶରେ ଘରୋଇ ମଦ୍ରାସାଙ୍କ ସଂଖ୍ୟା କେତେ ତାହାର ସୂଚନା ଖୋଦ ସରକାରଙ୍କ ପାଖରେ ମଧ୍ୟ ନାହିଁ । ମଦ୍ରାସା ଗୁଡିକରେ ହିନ୍ଦୁଙ୍କ ବିରୋଧରେ ଘୃଣାର ପାଠ ପଢାଯାଏ ।
ମୁଳ ସମ୍ବିଧାନକୁ ପୁଣି ଲାଗୁ କରିବା ପ୍ରତିସ୍ରୁତି ଦେଇଥିଲେ ହାସିନା ସରକାର
୧୯୭୨ ମସିହାର ମୁଳ ସମ୍ବିଧାନକୁ ପୁଣିଥରେ ଲାଗୁ କରିବାକୁ ହାସିନା ସରକାର ପ୍ରତିସ୍ରୁତି ଦେଇ କ୍ଷମତାକୁ ଆସିଥିଲେ । ଏବେ ଦୁର୍ଗାପୂଜା ସମୟରେ ହିନ୍ଦୁଙ୍କ ବିରୋଧରେ ହୋଇଥିବା ହିଂସାର ଉଗ୍ରତାକୁ ଦେଖି ଏହାର ସୂଚନା ମନ୍ତ୍ରୀ ମଧ୍ୟ ମୁଳ ସମ୍ବିଧାନ ଲାଗୁ କରିବା କଥା କହିଲେଣି । କିନ୍ତୁ ଏହା ମଧ୍ୟ ସତ ଯେ, ହାସିନ ସରକାର ମଧ୍ୟ ମୁସଲିମ୍ ମୌଳବାଦୀଙ୍କ ଚାପରେ ଅଛନ୍ତି । ତେଣୁ ମୁସଲିମ୍ ମୌଳବାଦୀଙ୍କ ଚାପର କେମିତି ମୁକାବିଲା ହାସିନା ସରକାର କରିବ ତାହା ମଧ୍ୟ ଗୋଟିଏ ବଡ ପ୍ରଶ୍ନ । ତେବେ ଏସବୁ ଭିତରେ ହିନ୍ଦୁ ବାଂଲାଦେଶରେ ଅସୁରକ୍ଷିତ ହୋଇ ପଡିଛନ୍ତି । ୧୯୭୫ ମସିହାରେ ସେମାନଙ୍କ ସଂଖ୍ୟା ମୋଟ ଜନସଂଖ୍ୟାର ୨୫ ପ୍ରତିଶତ ଥିବା ବେଳେ ଏବେ ୮ ପ୍ରତିଶତକୁ ଖସି ଆସିଛି ।
