ଚୀନର ମୁକାବିଲା ପାଇଁ ୩ ଲକ୍ଷ କୋଟି ଟଙ୍କାର କ୍ଷେପଣାସ୍ତ୍ର କିଣୁଛି ଜାପାନ

ଚୀନର ବିସ୍ତାରବାଦୀ ନୀତିକୁ ନେଇ କେବଳ ଭାରତ ନୁହେଁ ଜାପାନ ଭଳି ଏହାର ଆଉ କିଛି ପଡ଼ୋଷୀ ରାଷ୍ଟ୍ର ମଧ୍ୟ ଚିନ୍ତିତ ଅଛନ୍ତି । ଯାହାର ପ୍ରଭାବରେ ଏହି ଦେଶ ସବୁ ନିଜକୁ ଶସସ୍ତ୍ର କରୁଛନ୍ତି । ଏହି କ୍ରମରେ ଜାପାନ ୭୦ ବର୍ଷର ଶାନ୍ତି ସମ୍ବିଧାନକୁ ତ୍ୟାଗ କରି ନିଜ ପ୍ରତିରକ୍ଷା ବଜେଟକୁ ବଢାଇବାକୁ ନିଷ୍ପତି ନେଇଛି । ଏହି କ୍ରମରେ ଜାପାନ ୩ ଲକ୍ଷ କୋଟିଟଙ୍କାର କ୍ଷେପଣାସ୍ତ୍ର କିଣିବାକୁ ନୀତିଗତ ନିଷ୍ପତି ନେଇଛି । ୧୯୩୦ ମସିହାରେ ଜାପାନ ଚୀନ୍ ଉପରେ ଆକ୍ରମଣ କରିବା ପରେ ପ୍ରଥମ ଥର ପାଇଁ ଜାପାନ କେବଳ ଚୀନକୁ ଦୃଷ୍ଟିରେ ରଖି ବଡ଼ଧରଣର ଅର୍ଥ ପ୍ରତିରକ୍ଷା ପାଇଁ ବ୍ୟୟ କରୁଛି । ଜାପାନ ୩ ଲକ୍ଷ କୋଟି ଟଙ୍କାରେ କେଉଁ କ୍ଷେପଣାସ୍ତ୍ର କିଣିବାକୁ ଯାଉଛି ତାହା ଜାଣିବା ପୂର୍ବରୁ ଆସନ୍ତୁ ଜାଣିବା କେମିତି ୧୯୩୦ରୁ ଚୀନ୍ ଓ ଜାପାନ ମଧ୍ୟରେ ସଂପର୍କ ଭଲ ନାହିଁ ।

ଚୀନ୍ ଓ ଜାପାନ ମଧ୍ୟରେ ୧୫ଶହ ବର୍ଷର ଶତୃତା

୨୦୦୬ ମସିହାରେ ଜାପାନର ତତ୍କାଳୀନ ଉପ ପ୍ରଧାନମନ୍ତ୍ରୀ ଭାରତ ଗସ୍ତରେ ଆସି କହିଥିଲେ ଯେ, ଚୀନ୍ ସହିତ ତାଙ୍କ ଦେଶର ଶତୃତା ୧୫ଶହ ବର୍ଷ ପୁରୁଣା । ଗତ ୧୫ଶହ ବର୍ଷ ଧରି ଜାପାନ ଓ ଚୀନ୍ ମଧ୍ୟରେ ସମ୍ପର୍କ ତିକ୍ତ ରହି ଆସିଛି । ଚୀନ୍ ଏକ ବଡ଼ ଦେଶ ହୋଇଥିବାରୁ ଜାପାନ ଉପରେ ଅଧିକାରର ଲକ୍ଷ୍ୟ ରଖେ । ଯାହାକୁ ନେଇ ଦୁଇ ଦେଶ ମଧ୍ୟରେ ଗତ ୧୫ଶହ ବର୍ଷ ଧରି ଶତୃତା ରହି ଆସିଛି । ତେବେ ୧୯୩୦ ମସିହାରେ ଏହି ଶତୃତା ଚରମରେ ପହଂଚିଥିଲା । ଚୀନରେ ଅସ୍ଥିରତା ଲାଗି ରହିଥିବା ବେଳେ ୧୯୩୧ ମସିହାରେ ଜାପାନର ଏକ ରେଳ ଲାଇନରେ ବିସ୍ଫୋରଣ ହୋଇଥିଲା । ଜାପାନ ଏଥିପାଇଁ ଚୀନ୍କୁ ଦାୟୀ କରି ମଂଚୁରିଆ ଉପରେ ଆକ୍ରମଣ କରିଥିଲା । ମଂଚୁରିଆ ଅଧିକାର କରି ଜାପାନ ସେତେବେଳର ଚୀନ ରାଜଧାନୀ ନାନଜିଙ୍ଗକୁ ନିଜ ଅକ୍ତିଆରକୁ ନେଇଥିଲା । ଜାପାନ ସେଠାରେ ନୃଶଂସ ଦମନଲୀଳା ଚଲାଇଥିଲା । ଯେଉଁଥିରେ ପାଖାପଖି ଅଢେଇରୁ ୩ ଲକ୍ଷ ଲୋକ ପ୍ରାଣ ହରାଇଥିଲେ । ଏହାପରେ ଦ୍ୱିତୀୟ ବିଶ୍ୱଯୁଦ୍ଧ ପର୍ଯ୍ୟନ୍ତ ଚୀନର ମଂଚୁରିଆ ଜାପାନ କବଜାରେ ରହିଥିଲା । ଦ୍ୱିତୀୟ ବିଶ୍ୱଯୁଦ୍ଧ ଶେଷ ସହିତ ମଂଚୁରିଆ ଜାପାନ କବଜାରୁ ମୁକ୍ତ ହୋଇଥିଲା । ଦ୍ୱିତୀୟ ବିଶ୍ୱଯୁଦ୍ଧ ପରେ ଜାପାନର ସେନାକୁ ଭାଙ୍ଗି ଦିଆଯାଇଥିଲା । ଜାପାନ ଏକ ଶାନ୍ତି ସମ୍ବିଧାନ ପ୍ରଣୟନ କରିଥିଲା । ଏହା ଅନୁସାରେ ଜାପାନ କେବେ କାହା ସହିତ ଯୁଦ୍ଧ କରିବ ନାହିଁ । ଏହା ବଦଳରେ ଆମେରିକା ଜାପାନକୁ ସୁରକ୍ଷାର ଗ୍ୟାରେଣ୍ଟି ଦେଇଥିଲା । ନୂଆ ଚୁକ୍ତି ଅନୁସାରେ ଜାପାନର ସାର୍ବଭୌମତ୍ୱ ରକ୍ଷା ଦାୟୀତ୍ୱ ଆମେରିକାର ଥିଲା । କିନ୍ତୁ ଏବେ ଜାପାନ ୧୯୫୬ର ସେହି କାଉଣ୍ଟର ଷ୍ଟ୍ରାଇକ୍ ଆଟାକ ନୀତିକୁ ତ୍ୟାଗ କରି ନିଜକୁ ଶସସ୍ତ୍ର କରିବାକୁ ଯାଉଛି । ଏହା ଅନୁସାରେ ଜାପାନ ଆଗାମୀ ୧୦ ବର୍ଷ ମଧ୍ୟରେ ନିଜକୁ ବାହ୍ୟ ଆକ୍ରମଣରୁ ରକ୍ଷା କରିବାର କ୍ଷମତା ହାସଲ କରିବ ।

ଯୁଦ୍ଧ ନକରିବା ନୀତିର ସମାପ୍ତି

୧୯୫୬ର ନୋ କାଉଣ୍ଟର ଷ୍ଟ୍ରାଇକ୍ ନୀତି ଅନୁସାରେ ଜାପାନ କୌଣସି ଦେଶ ସହିତ ଯୁଦ୍ଧ କରିବ ନାହିଁ । କିନ୍ତୁ ଏବେ ଏହା ନିଜକୁ ରକ୍ଷା କରିବା ପାଇଁ ଏହି ନୀତି ତ୍ୟାଗ କରୁଛି । ଜାପାନ ଅନୁସାରେ ଏହାର ପଡୋଷୀ ରାଷ୍ଟ୍ର ନିଜର କ୍ଷେପଣାସ୍ତ୍ର ଶକ୍ତି ବୃଦ୍ଧି କରୁଛନ୍ତି । ଏହି ପଡୋଷୀ ଦେଶଙ୍କ ମଧ୍ୟରେ ଅଛନ୍ତି ଜାପାନର ଦୁଇ ପରମ ଶତ୍ରୁ ଉତ୍ତର କୋରିଆ ଓ ଚୀନ୍ । ତେଣୁ ଜାପାନ ନିଜ ସୁରକ୍ଷା ପାଇଁ ଆମେରିକାଠାରୁ ୩ ଲକ୍ଷ କୋଟି ଡଲାର ବ୍ୟୟରେ ୫ଶହ ଟମ୍ ହକ୍ କ୍ଷେପଣାସ୍ତ୍ର କିଣିବ । ଜାପାନ ଏଥିପାଇଁ ନିଜ ପ୍ରତିରକ୍ଷା ବଜେଟରେ ୨ ପ୍ରତିଶତ ବୃଦ୍ଧି କରିଛି । ଯାହା ଫଳରେ ବଜେଟ୍ ୨୬ ଲକ୍ଷ କୋଟି ଟଙ୍କା ହେବ ।