ନୂଆଦିଲ୍ଲୀ: ଭାରତୀୟ ପର୍ଯ୍ୟଟକଙ୍କ ପାଇଁ ଖୁସି ଖବର । ଏଣିକି ଇରାନ୍ ଯିବାକୁ ହେଲେ ଦରକାର ହେବ ନାହିଁ ଭିସା । ସାରା ବିଶ୍ୱରୁ ଅଧିକ ପର୍ଯ୍ୟଟକଙ୍କୁ ଆକୃଷ୍ଟ କରିବା ପାଇଁ ଇରାନ ଏହି ପଦକ୍ଷେପ ନେଇଛି । ପର୍ଯ୍ୟଟନକୁ ପ୍ରୋତ୍ସାହିତ କରିବା ଏବଂ ବିଶ୍ୱସ୍ତରୀୟ ଯୋଗାଯୋଗକୁ ବଢ଼ାଇବା ଉଦ୍ଦେଶ୍ୟରେ ଇରାନ୍ ଚଳିତ ବର୍ଷ ଫେବ୍ରୁଆରିରୁ ଭାରତୀୟ ନାଗରିକଙ୍କୁ ଭିସା ମୁକ୍ତ ପ୍ରବେଶ ସୁବିଧା ପ୍ରଦାନ କରିଛି । କେବଳ ଭାରତ ନୁହେଁ ଆଉ ଅନ୍ୟ ୨୭ଟି ଦେଶ ପାଇଁ ମଧ୍ୟ ଏହା ଘୋଷଣା କରାଯାଇଛି ।
ବିନା ଭିସାରେ ଇରାନ୍ରେ ମାତ୍ର ୧୫ ଦିନ ରହିପାରିବେ
ଇସ୍ଲାମିକ ରିପବ୍ଲିକ୍ ଅଫ୍ ଇରାନ୍ ସରକାରଙ୍କ ଅନୁମୋଦନ ଅନୁଯାୟୀ, ଏଥିଲାଗି କେତେକ ସର୍ତ୍ତ ରଖାଯାଇଛି । ଯାହାକୁ ଭାରତର ନାଗରିକଙ୍କ ପାଇଁ ଭିସା ରଦ୍ଦ କରାଯିବ । ସାଧାରଣ ପାସପୋର୍ଟ ଥିବା ବ୍ୟକ୍ତିମାନେ ପ୍ରତି ୬ ମାସରେ ଥରେ ବିନା ଭିସାରେ ଇରାନ୍ ଦେଶରେ ପ୍ରବେଶ କରିପାରିବେ । ଏଠାରେ ସର୍ବାଧିକ ୧୫ ଦିନ ରହିପାରିବେ । ଗୁରୁତ୍ୱପୂର୍ଣ୍ଣ କଥା ହେଉଛି, ୧୫ ଦିନର ଅବଧି ବୃଦ୍ଧି କରାଯାଇପାରିବ ନାହିଁ । ସେହିପରି ଭିସା ଉଚ୍ଛେଦ କେବଳ ପର୍ଯ୍ୟଟନ ଉଦ୍ଦେଶ୍ୟରେ ଇସ୍ଲାମିକ ରିପବ୍ଲିକ୍ ଅଫ୍ ଇରାନ୍ର ଅଞ୍ଚଳରେ ପ୍ରବେଶ କରୁଥିବା ବ୍ୟକ୍ତିବିଶେଷଙ୍କ କ୍ଷେତ୍ରରେ ଲାଗୁ ହେବ । ଯଦି ଭାରତୀୟ ନାଗରିକମାନେ ଅଧିକ ସମୟ ରହିବାକୁ ଚାହୁଁଛନ୍ତି କିମ୍ବା ୬ ମାସ ମଧ୍ୟରେ ଏକାଧିକ ପ୍ରବେଶ କରିବାକୁ ଚାହୁଁଛନ୍ତି କିମ୍ବା ଅନ୍ୟ ପ୍ରକାର ଭିସା ଆବଶ୍ୟକ କରନ୍ତି, ତେବେ ସେମାନଙ୍କୁ ଭାରତରେ ଇସ୍ଲାମିକ ରିପବ୍ଲିକ୍ ଅଫ୍ ଇରାନର ସମ୍ପୃକ୍ତ ପ୍ରତିନିଧିଙ୍କ ମାଧ୍ୟମରେ ଆବଶ୍ୟକ ଭିସା ହାସଲ କରିବାକୁ ପଡ଼ିବ । ଏହି ଅନୁମୋଦନରେ ଦର୍ଶାଯାଇଥିବା ଭିସା ଉଚ୍ଛେଦ ବିଶେଷ କରି ଭାରତୀୟ ନାଗରିକମାନଙ୍କ ପାଇଁ ଲାଗୁ ହେବ ଯେଉଁମାନେ କେବଳ ବାୟୁସୀମା ଦେଇ ଦେଶରେ ପ୍ରବେଶ କରନ୍ତି ।
ପୂର୍ବରୁ ୩୩ଟି ଦେଶର ନାଗରିକଙ୍କ ପାଇଁ ଭିସା ହଟାଇବାକୁ ଘୋଷଣା
ଡିସେମ୍ବର ୨୦୨୩ରେ ଇରାନ ୩୩ଟି ଦେଶର ନାଗରିକଙ୍କ ପାଇଁ ଭିସା ଆବଶ୍ୟକତା ହଟାଇବାକୁ ଘୋଷଣା କରିଥିଲା, ଯାହା ଏହାର କୂଟନୈତିକ ସମ୍ପର୍କରେ ସକାରାତ୍ମକ ଉନ୍ନତି ପ୍ରଦର୍ଶନ କରିଥିଲା । ନିକଟରେ ମାଲେସିଆ, ଶ୍ରୀଲଙ୍କା ଓ ଭିଏତନାମ ଭାରତରୁ ଆସୁଥିବା ପର୍ଯ୍ୟଟକଙ୍କ ପାଇଁ ଭିସା ଆବଶ୍ୟକତା ଛାଡ଼ କରିଛନ୍ତି । ଏହା ପୂର୍ବରୁ ଇରାନ ତୁର୍କି, ଆଜରବାଇଜାନ, ଓମାନ, ଚୀନ, ଆର୍ମେନିଆ, ଲେବନାନ ଓ ସିରିଆରୁ ଆସୁଥିବା ପର୍ଯ୍ୟଟକଙ୍କ ପାଇଁ ଭିସା ଛାଡ଼ କାର୍ଯ୍ୟକ୍ରମ ଥିଲା । ଇରାନର ନୂତନ ଭିସା ଛାଡ଼ କାର୍ଯ୍ୟକ୍ରମ ପାଇଁ ଅନୁମୋଦନ ପ୍ରାପ୍ତ ଦେଶଗୁଡ଼ିକ ହେଲା: ଭାରତ, ରୁଷିଆ, ୟୁନାଇଟେଡ୍ ଆରବ ଏମିରେଟ୍ସ, ବାହାରେନ, ସାଉଦି ଆରବ, କତାର, କୁଏତ, ଲେବନାନ, ଉଜବେକିସ୍ତାନ, କିର୍ଗିଜସ୍ତାନ, ତାଜିକିସ୍ତାନ, ଟ୍ୟୁନିସିଆ, ମୌରିଟାନିଆ, ତାଞ୍ଜାନିଆ, ଜିମ୍ବାୱେ, ମରିସସ, ସେସେଲ୍ସ, ଇଣ୍ଡୋନେସିଆ, ଦାରୁସଲାମ, ଜାପାନ, ସିଙ୍ଗାପୁର, କାମ୍ବୋଡିଆ, ମାଲେସିଆ, ଭିଏତନାମ, ବ୍ରାଜିଲ, ପେରୁ, କ୍ୟୁବା, ମେକ୍ସିକୋ, ଭେନେଜୁଏଲା, ବୋସ୍ନିଆ ଏବଂ ହର୍ଜେଗୋଭିନା, ସର୍ବିଆ, କ୍ରୋଏସିଆ ଏବଂ ବେଲାରୁସ୍ ।
