କ୍ଷପଣାସ୍ତ୍ର ଭଳି ଆକାଶରୁ ଲଂଚ୍ ହେବ ଡ୍ରୋନ୍, ଆମେରିକା ସହିତ ଭାରତ କଲା ଚୁକ୍ତି

ଭାରତୀୟ ବାୟୁସେନା ଏବେ ଆକାଶରୁ କ୍ଷପଣାସ୍ତ୍ର ଭଳି ଡ୍ରୋନକୁ ମଧ୍ୟ ଲଂଚ୍ କରିପାରିବ । ଏହି ଡ୍ରୋନ୍ ମାନବ ବିହୀନ ହେବ । ଯାହାକୁ ବାୟୁସେନା ଆକାଶରୁ ହିଁ ଲଂଚ୍ କରିପାରିବ । ଭାରତୀୟ ବାୟୁସେନା ଏଥିପାଇଁ ପ୍ରସ୍ତୁତି ଆରମ୍ଭ କରିଛି । ଏଭଳି ଡ୍ରୋନ୍ ତିଆରି ପାଇଁ ଭାରତ ଓ ଆମେରିକା ମଧ୍ୟରେ ଚୁକ୍ତି ସ୍ୱାକ୍ଷରିତ ହୋଇଛି । ଦୁଇ ଦେଶ ଏଥିପାଇଁ ଦ୍ୱିପାକ୍ଷିକ ବୈଶୟିକ ଜ୍ଞାନ ଓ ବ୍ୟବସାୟିକ ଉଦ୍ୟମ (DDTI) ଅନ୍ତର୍ଗତରେ ୧୧ ମିଲିୟନ ଡଲାରର ପ୍ରାରମ୍ଭିକ ଖର୍ଚ୍ଚରେ ପ୍ରଟୋଟାଇପ୍ ଏଏଲୟୁଭି (AL UAV Prototype) ବିକାଶ ଦିଗରେ କାମ କରିବେ ।

ଏଏଲୟୁଏଭିକୁ ଆକାଶରୁ କରାଯାଇ ପାରିବ ଲଂଚ୍

ପିବିଏନଏସର ରିପୋର୍ଟ ଅନୁସାରେ ଏହି ଟେକ୍ନୋଲଜି ଦ୍ୱାରା ମିଶାଇଲ ଭଳି ଯୁଦ୍ଧ ବିମାନରେ ଡ୍ରୋନକୁ ଲଗାଯିବ । ଆଉ ଯେଉଁଭଳି ଭାବେ ଯୁଦ୍ଧବିମାନରୁ ମିଶାଇଲ ଲଂଚ୍ କରାଯାଇଥାଏ ସେମିତି ଡ୍ରୋନକୁ ଲଂଚ୍ କରାଯିବ । ଭାରତ ଓ ଆମେରିକା ଏୟାର-ଲଂଚ୍ କରାଯାଇଥିବା ଛୋଟ ଏରିୟଲ ସିଷ୍ଟମ ବା ଡ୍ରୋନ୍ ସ୍ୱାର୍ମ ଉପରେ ଚର୍ଚ୍ଚା କରୁଛନ୍ତି । ମାନବ ରହିତ ବିମାନରେ ଡ୍ରୋନ୍ ଆଦି ମଧ୍ୟ ସାମିଲ ଅଛନ୍ତି ।

ପୁରୁଣା ଚୁକ୍ତି

ଏହି ଚୁକ୍ତି ପ୍ରଥମ ଥର ପାଇଁ ୨୦୦୬ରେ ସ୍ୱାକ୍ଷରିତ ହୋଇଥିଲା । ତେବେ ୨୦୧୨ରେ ଏହା ଉପରେ କାମ ଆରମ୍ଭ ହୋଇଥିଲେ ମଧ୍ୟ କାମ ଆଗକୁ ବଢି ପାରିନଥିଲା । ତେଣୁ ଜାନୁଆରୀ ୨୦୧୫ରେ ପୁଣିଥରେ ଚୁକ୍ତିର ନବୀକରଣ ହୋଇଥିଲା । ଏବେ ପୁଣିଥରେ ଏହି ଚୁକ୍ତି ସ୍ୱାକ୍ଷରିତ ହୋଇଛି, ଯାହା ଦୁଇ ଦେଶ ମଧ୍ୟରେ ପ୍ରତିରକ୍ଷା ସମ୍ବନ୍ଧକୁ ଅଧିକ ମଜବୁତ କରିବ ।

ଡିଜାଇନ୍ ଓ ପରିକ୍ଷଣରେ ସାହାଯ୍ୟ କରିବେ ବାୟୁସେନା ଓ DRDO

ପ୍ରକଳ୍ପ ଚୁକ୍ତିରେ ଆମେରିକୀୟ ବାୟୁସେନାର ଏୟାରଫୋର୍ସ ରିସର୍ଚ୍ଚ ଲାବ୍ରୋଟରି (AFRL), ଭାରତୀୟ ବାୟୁସେନା ଓ ଡିଆରଡିଓ ମଧ୍ୟରେ ସହଯୋଗ କଥା କୁହଯାଇଛି । ଡ୍ରୋନର ଡିଜାଇନ୍ ଓ ପରିକ୍ଷଣ କରିବାରେ ଭାରତୀୟ ବାୟୁସେନା ଓ ଡିଆରଡିଓ ସହଯୋଗ କରିବେ । AFRL, ଡିଆରଡିଓ ଓ ଭାରତୀୟ ବାୟୁସେନା ଏହି ଚୁକ୍ତିକୁ କ୍ରିୟାନ୍ୱିତ କରିବାରେ ମୁଖ୍ୟ ଭୂମିକା ଗ୍ରହଣ କରିବେ ।