ଟଙ୍କା ବଂଚିବା ପାଇଁ ନିହାତି ଆବଶ୍ୟକ । ଶିକ୍ଷାଠାରୁ ସ୍ୱାସ୍ଥ୍ୟ ସବୁ ପାଇଁ ଦରକାର ହୋଇଥାଏ ଟଙ୍କା । ଟଙ୍କା ଯଦି ପାଖରେ ଅଛି ତେବେ ଜୀବନର କିଛି ସମସ୍ୟାର ମୁକାବିଲା ପାଇଁ ମନରେ ସାହସ ଆସିପାରେ । ଆମେ ସମସ୍ତେ ଟଙ୍କା ସଂଚୟ କରିବାକୁ ଚାହୁଁ । ଆମେ ସମସ୍ତେ ଭବିଷ୍ୟତକୁ ସୁରକ୍ଷିତ କରିବାକୁ ଉଦ୍ୟମ କରୁ । କିନ୍ତୁ ସେହି ଏକା ସମୟରେ ପ୍ରାୟତଃ ଆମ ମନକୁ ଅର୍ଥ ସଂପର୍କିତ କିଛି ଭୟ କବଳିତ କରିଥାଏ । ଆଜି ଆମେ ସେହିଭଳି କିଛି ଚିନ୍ତା ଓ ତାର ନିରାକରଣ ବାବଦରେ ଆଲୋଚନା କରିବା ।
‘ମୁଁ ଚାକିରି ହରାଇବି’
ଯଦି ଆପଣ ନିଜ ଚାକିରିକୁ ନେଇ ଚିନ୍ତିତ ଅଛନ୍ତି ତେବେ ସମ୍ଭାବନା ଥାଇ ପାରେ ଯେ, ଆପଣ ଏସଂପର୍କରେ ନିଜ ବସଙ୍କଠାରୁ କିମ୍ବା ସହକର୍ମୀଙ୍କଠାରୁ ସୂଚନା ପାଇଛନ୍ତି ଅଥବା ଆପଣଙ୍କ ସେକ୍ଟରରେ ଛଟେଇ ଚାଲିଛି । ଏଭଳି ପରିସ୍ଥିତିରେ ଆପଣଙ୍କୁ ଏହି ଆଶଙ୍କାର ମୁକାବିଲା କରିବାକୁ ପଡିବ ।
ଏହାର ମୁକାବିଲା କେମିତି କରିବେ ?
ନିଜ ସହ ସଚ୍ଚୋଟ ହୁଅନ୍ତୁ । ଆପଣଙ୍କ ଆଶଙ୍କାର କାରଣ କଣ ,ପ୍ରଥମେ ତାକୁ ଖୋଜନ୍ତୁ । ଯଦି ଆପଣଙ୍କ ଖରାପ ପ୍ରଦର୍ଶନ ଏହାର ଗୋଟିଏ କାରଣ,ତେବେ ନିଜ ବସଙ୍କ ସହ କଥା ହୁଅନ୍ତୁ ଓ ନିଜ ପ୍ରଦର୍ଶନରେ ସୁଧାର ଆଣନ୍ତୁ । ନିଜ ସ୍କିଲ ବଢାଇବା ଉଦ୍ୟମ ଜାରି ରଖନ୍ତୁ । ଯଦି କାରଣ ଆପଣ ନିଜେ ନୁହନ୍ତି କିନ୍ତୁ ସେକ୍ଟରରେ ଚାଲିଥିବା ମାନ୍ଦାବସ୍ଥା ତେବେ ନିଜକୁ ମଲ୍ଟିଟାସ୍କିଂ କରନ୍ତୁ । କିମ୍ବା ଛଟେଇ ନୋଟିସ ମିଳିବା ପୂର୍ବରୁ ନିଜ ପାଇଁ ଚାକିରି ଖୋଜନ୍ତୁ । ଏଭଳି ପରିସ୍ଥିତି ପାଇଁ ଏମର୍ଜନସୀ ଫଣ୍ଡ୍ ତିଆରି କରନ୍ତୁ ।
‘ଷ୍ଟକ୍ ମାର୍କେଟରେ ବଡ କ୍ଷତି ହେବ’
ଏହା ଗୋଟିଏ ସାମାନ୍ୟ ଭୟ । ବିଶେଷକରି ନୁଆକରି ଶେୟାର ମାର୍କେଟରେ ନିବେଶ କରୁଥିବା ନିବେଶକାରୀଙ୍କ ଭିତରେ ଏହି ଭୟ ଅଧିକ ଥାଏ । ସେମାନଙ୍କ ମନରେ ସବୁବେଳେ ଭୟ ଥାଏ ଯେ, କାଳେ ଆମ ଟଙ୍କା ଡୁବିଯିବ ।
ଏମିତିରେ କଣ କରିବେ
ଯଦି ଆପଣଙ୍କୁ ନିବେଶର ତରିକା ଜଣା ନାହିଁ କିମ୍ବା ଆପଣ ଆଗରୁ ମାର୍କେଟରେ ନିବେଶ ହରାଇଛନ୍ତି ତେବେ ସବୁଠାରୁ ଭଲ ଉପାୟ ହେଉଛି ସିଧାସଳଖ ଶେୟାରରେ ଟଙ୍କା ନଲଗାଇ ମ୍ୟୁଚୁଆଲ ଫଣ୍ଡରେ ନିବେଶ କରନ୍ତୁ । କିନ୍ତୁ ଯଦି ଆପଣ ଶେୟାରରେ ଟ୍ରେଡିଂ କରିବାକୁ ଚାହୁଁଛନ୍ତି ତେବେ ବନ୍ଧୁ ଓ ସଂପର୍କୀୟଙ୍କ ଟିପ୍ସ ଉପରେ ବାଜି ଲଗାଇବାରୁ ବଂଚନ୍ତୁ । ସବୁବେଳେ ବିଶେଷଜ୍ଞଙ୍କ ପରାମର୍ଶ ନିଅନ୍ତୁ । ଆପଣଙ୍କ ପାଇଁ ସବୁଠୁ ଭଲ ହେବ ଲମ୍ବା ଅବଧିର ନିବେଶ ଓ ମାର୍କେଟର ଉତ୍ଥାନ ପତନ ଦ୍ୱାରା ପ୍ରଭାବିତ ନେହେବା ।
କରଜ ଜଲାରେ ଫଶିବା ଡର
ଉଧାର କରି କିଣିବାରୁ ଏହି ଡର ଜନ୍ମ ନେଇଥାଏ । ଉଧାର ଅଭ୍ୟାଶ ଦ୍ୱାରା ଅନେକ କରଜ ସୃଷ୍ଟି ହୋଇଥାଏ । ଏଥିଭିତରୁ କିଛି ବଡ ଇଏମଆଇ ସହ କିଛି ଲମ୍ବା ଅବଧିର ଲୋନ୍ ହୋଇଥାନ୍ତି । ତେଣୁ ଆପଣଙ୍କୁ କରଜ ଜାଲରୁ ନମୁକୁଳି ପାରିବା ଡର ସବୁବେଳେ ଭୟଭୀତ କରାଇଥାଏ ।
ଏହାର ମୁକାବିଲା କେମିତି କରିବେ
ଏହି ଡରରୁ ମୁକ୍ତି ପାଇବାର ସବୁଠୁ ଭଲ ଉପାୟ ହେଉଛି ସବୁବେଳେ ଏହା ସୁନିଶ୍ଚିତ କରନ୍ତୁ ଯେ, ଆପଣଙ୍କ କରଜ ଯେମିତି ଆପଣଙ୍କ ଆୟର 50 ପ୍ରତିଶତରୁ ଅଧିକ ହେବ ନାହିଁ । ଯଦି ଆପଣ ଆଗରୁ ବଡ ଲୋନ୍ ନେଇଛନ୍ତି ତେବେ ଆଉ ଲୋନ୍ ନିଅନ୍ତୁ ନାହିଁ । ବର୍ତ୍ତମାନ ଚାଲିଥିବା ଲୋନ୍ ଶୁଝିବା ପାଇଁ ଉଦ୍ୟମ କରନ୍ତୁ । କ୍ରେଡିଟ୍ କାର୍ଡ,ପର୍ସନାଲ ଲୋନ୍ ଶୁଝି ସାରିବା ପରେ ଅନ୍ୟ ଲୋନକୁ ଶୁଝିବା ଆରମ୍ଭ କରନ୍ତୁ ।
‘‘ରିଟାୟରମେଣ୍ଟ କାଳରେ ମୋ ପାଖରେ ପର୍ଯ୍ୟାପ୍ତ ଫଣ୍ଡ୍ ନଥିବ’’
ପ୍ରାୟ 51 ପ୍ରତିଶତ ଲୋକଙ୍କ ଆଶଙ୍କା ଯେ, ଅବସର ପରେ ସେମାନଙ୍କ ପାଖରେ ଚଳିବା ପାଇଁ ପର୍ଯ୍ୟାପ୍ତ ଅର୍ଥ ନଥିବ । ଏଚଏସବିସିର ଫ୍ୟୁଚର ଅଫ୍ ରିଟାୟରମେଣ୍ଟ ଷ୍ଟଡି କୁହେ ଯେ, 10 ଜଣରୁ 7 ଜଣ ଅବସରକାଳୀନ ଜୀବନ ପାଇଁ ନିଜ ପିଲାଙ୍କ ଉପରେ ଭରସା କରନ୍ତି । ଦେଶର 55 ପ୍ରତିଶତ ଚାକିରିଆ ଅବସର ପାଇଁ ଫଣ୍ଡ ତିଆରି କରୁଛନ୍ତି ।
ଏହାର ମୁକାବିଲା କେମିତି ?
ଯଦି ଆପଣଙ୍କୁ ଅବସରକାଳୀନ ଚିନ୍ତା ଡରାଉଛି ତେବେ ସଠିକ ବିକଳ୍ପରେ ନିବେଶ କରନ୍ତୁ । ଆର୍ଥିକ ପରାମର୍ଶଦାତ୍ତାଙ୍କ ପରାମର୍ଶ ନେଇ ଏଭଳି ପ୍ଲାନରେ ନିବେଶ କରନ୍ତୁ,ଯାହା ମୁଦ୍ରାସ୍ଥିତିକୁ ମାତ୍ ଦେଇ ଆପଣଙ୍କ ପାଇଁ ଭଲ ଫଣ୍ଡ୍ ସୃଷ୍ଟି କରିପାରିବ । ଏହା ସହ ନିଜ ବର୍ତ୍ତମାନ ଆୟକୁ ବଢାଇ ରିଟାୟରମେଣ୍ଟ୍ ପାଇଁ ସଂଚୟ କରନ୍ତୁ ।
‘ସ୍ୱାସ୍ଥ୍ୟ ଖରାପ ହେଲେ ମୁଁ କଣ କରିବି’
ମେଡିକାଲ ଏମରଜେନ୍ସିରେ ଆପଣଙ୍କ ସଂଚୟ ସରିଯିବାର ଡର ମଧ୍ୟ ଗୋଟିଏ ବଡ ଭୟ । ଗମ୍ଭୀର ରୋଗ ଓ ଦୁର୍ଘଟଣାର ଗୁରୁତର ଆଘାତାପ୍ରାପ୍ତ ହେବାରେ ଏଭଳି ହୋଇଥାଏ । ଅନେକ ମାମଲାରେ ବେସିକ୍ ହେଲ୍ଥ୍ ପଲିସି ପର୍ଯ୍ୟାପ୍ତ ହୋଇ ନଥାଏ । ଏମିତିରେ କଣ କରିବେ ?
ଏଥିରୁ ବଂଚିବାର ଭଲ ଉପାୟ ହେଉଛି ପର୍ଯ୍ୟାପ୍ତ ବୀମା ନେବା । ଆପଣ 5 ଲକ୍ଷର ଗୋଟିଏ ବେସିକ୍ ପ୍ଲାନ୍ କିଣି ପାରିବେ ଓ ଏହାପରେ 15 ଲକ୍ଷ ଟଙ୍କାର ଟପ୍ ଅପ୍ ନେଇ ପାରିବେ । ଏହା 20 ଲକ୍ଷ ଟଙ୍କାର ବଡ ହେଲ୍ଥ ଇନସ୍ୟୁରାନ୍ସଠାରୁ ଶସ୍ତା ପଡିବ । ଏହାସହ ଦୁର୍ଘଟଣା ଜନିତ ଅକ୍ଷମତା ଓ କ୍ରିଟିକାଲ ଇଲନେସ୍ ବୀମା ପ୍ଲାନ୍ ମଧ୍ୟ କିଣିବା ଠିକ୍ ରହିବ ।
