ଦୁନିଆର ଏକମାତ୍ର ସହର ଯେଉଁଠି ଚାଲେନା ମୋବାଇଲ କି ଟିଭି

ଆମେ ଡିଜିଟାଲ ଯୁଗରେ ବଂଚୁଛେ । ୪ ଜି ପରେ ଦୁନିଆ ୫ ଜି ଆଡକୁ ଅଗ୍ରସର ହେଉଛି । ଛୋଟରୁ ଛୋଟ କାମ ପାଇଁ ଡିଜିଟାଲ ମିଡିଆ ଉପରେ ନିର୍ଭରଶୀଳ ଦୁନିଆ । ଟିଭି ଓ ରେଡିଓକୁ ଛାଡନ୍ତୁ ଆଜିର ସମୟରେ ମୋବାଇଲ ହେଉଛି ସବୁଠାରୁ ଗୁରୁତ୍ୱପୂର୍ଣ୍ଣ ଡିଭାଇସ୍ । ଏହା ବିନା ଗୋଟିଏ ମିନିଟ୍ କାଟିବା ବି ଅସମ୍ଭବ ହୋଇପଡେ । ସ୍ମାର୍ଟ୍ ଫୋନ୍ ଉପରେ ଆମ ନିର୍ଭରଶୀଳତା ଦିନକୁ ଦିନ ବଢିବାରେ ଲାଗିଛି । ଏମିତିରେ ଯଦି ଆମେ ଆପଣଙ୍କୁ କହିବୁ ଯେ, ବିଶ୍ୱରେ ଏମିତି ଗୋଟିଏ ସହର ଅଛି ଯେଉଁଠାରେ ଲୋକ ମୋବାଇଲ ଫୋନ୍ ଓ ଟିଭି ଦେଖିବା ପାଇଁ ଆତୁର କିନ୍ତୁ ସେମାନଙ୍କୁ ଏଥିପାଇଁ ଅନୁମତି ନାହିଁ । ଏବେ ଆପଣ ଭାବୁଥିବେ ଯେ, ନିଶ୍ଚିତ ଭାବେ ଏହି ସହର ଉତ୍ତର କୋରିଆରେ ଥିବ । ଉତ୍ତର କୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍ ଏମିତି ଅଖାଡୁଆ ଆଦେଶ ଦେଇଥିବ । କିନ୍ତୁ ଆପଣ ଭୁଲ ଭାବିଛନ୍ତି । ଏହି ସହର ଉତ୍ତର କୋରିଆରେ ନାହିଁ । ଏହା ଦୁନିଆର ଏକ ନମ୍ବର ଦେଶ ଆମେରିକାରେ ଅଛି । ଆସନ୍ତୁ ଜାଣିବା ଆମେରିକାରେ ରହିଥିବା ଏହି ସହରର ଲୋକଙ୍କ ପାଇଁ ମୋବାଇଲ ଓ ଟିଭି କାହିଁକି ମନା ।

ଆମେରିକାର ଏହି ସହରରେ ମୋବାଇଲ ଧରିଲେ ଜେଲ୍ !

ଯେଉଁ ସହରର କଥା ଆମେ କହୁଛୁ ସେହି ସହର ଆମେରିକାରେ ରହିଛି । ଆମେରିକାର ଏହି ସହରରେ ମୋବାଇଲ, ଟିଭି ଓ ରେଡିଓ ବ୍ୟାନ୍ । କେହି ମଧ୍ୟ ଏହି ତିନୋଟି ଜିନିଶର ବ୍ୟବହାର କରିପାରିବେ ନାହିଁ । ଯଦି କୌଣସି ବ୍ୟକ୍ତି ଅମାନିଆ ହୋଇ ଏହି ତିନୋଟି ସାମଗ୍ରୀ ବ୍ୟବହାର କରି ଧରାପଡନ୍ତି ତେବେ ତାଙ୍କୁ ଜେଲ ଯିବାକୁ ପଡିଥାଏ । ଏହି ଅଜବ ସହରର ନାମ ହେଉଛି ଗ୍ରୀନ୍ ବ୍ୟାଙ୍କ୍ । ଆମେରିକାର ପଶ୍ଚିମ ଭର୍ଜିନିଆର ପୋକହଣ୍ଟସରେ ଏହି ସହରର ରହିଛି । ଏହି ସହରର ଲୋକସଂଖ୍ୟା ପ୍ରାୟ ୧୫୦ । କିନ୍ତୁ କାହାରି ପାଖରେ ମଧ୍ୟ ମୋବାଇଲ କିମ୍ବା ଟିଭି ନାହିଁ । ତେବେ ଏହାର ବିଶେଷ କାରଣ ରହିଛି । ଆସନ୍ତୁ ଜାଣିବା କାରଣ କ’ଣ ?

ଗୋଟିଏ ଟେଲିସ୍କୋପ୍ ପାଇଁ ସବୁ ପାଲା

ଗ୍ରୀନ୍ ବ୍ୟାଙ୍କ ସିଟିରେ କୌଣସି ପ୍ରକାରର ଇଲେକ୍ଟ୍ରୋନିକ୍ ସାମାନା ରଖିବା ମନା । ପ୍ରକୃତରେ ଏହି ସହରରେ ରହିଛି ଦୁନିଆର ସବୁଠାରୁ ବଡ ଷ୍ଟିୟରବୁଲ ରେଡିଓ ଟେଲିସ୍କୋପ୍ । ଏହାକୁ ଗ୍ରୀନ୍ ବ୍ୟାଙ୍କ ଟେଲିସ୍କୋପ୍ ନାମରେ ମଧ୍ୟ ଜଣା ଯାଇଥାଏ । ଏହି ଟେଲିସ୍କୋପ୍ ବହୁତ ବଡ଼ ଓ ପରିବହନ ଯୋଗ୍ୟ । ଏହାକୁ ଗୋଟିଏ ସ୍ଥାନରୁ ଆଉ ଗୋଟିଏ ସ୍ଥାନକୁ ନିଆ ଯାଇପାରେ । ଏହି ଟେଲିସ୍କୋପ୍ ଏତେ ବଡ଼ ଯେ, ଏହାର ଡିସ୍ ବା ଛତାରେ ଗୋଟିଏ ଫୁଟବଲ ପଡିଆ ସମାହିତ ହୋଇ ପାରିବ । ଏହି ଟେଲିସ୍କୋପ୍ ୪୮୫ ଫୁଟ ଲମ୍ବା ଓ ଏହାର ଓଜନ ୭୬ ସହ ମେଟ୍ରିକ୍ ଟନ୍ ।

ଏଥିପାଇଁ ଲାଗିଛି ବ୍ୟାନ୍

ଏହି ଟେଲିସ୍କୋପ୍ ଆମେରିକାର ଜାତୀୟ ରେଡିଓ ମହାକାଶୀୟ ବିଜ୍ଞାନର ପ୍ରୟୋଗଶାଳା । ୧୯୫୮ରେ ଏହାର ପ୍ରତିଷ୍ଠା ହୋଇଥିଲା । ବୈଜ୍ଞାନିକ ଏଠାରେ ସେହି ତରଙ୍ଗର ଅଧ୍ୟୟନ କରିଥାନ୍ତି ଯାହା ମହାକାଶରୁ ପୃଥିବୀକୁ ଆସିଥାଏ । ଏମିତିରେ ଏଠାରେ ଏଭଳି ଅନେକ ଟେଲିସ୍କୋପ୍ ଅଛି ଯାହା ବ୍ଲାକ୍ ହୋଲ୍ ବା କୃଷ୍ଣଗହ୍ୱରଠାରୁ ମାଧ୍ୟାକର୍ଶଣ ଶକ୍ତିର ଅଧ୍ୟୟନ କରିଥାନ୍ତି । ଏହା ଏତେ ବିରାଟ ଯେ, ଏହା ମହାକାଶରେ ୧୩ ଶହ ବିଲିୟନ ଆଲୋକ ବର୍ଷ ଦୂରରେ ଥିବା ସିଗନାଲକୁ ମଧ୍ୟ କ୍ୟାଚ୍ କରିପାରିଥାଏ । କିନ୍ତୁ ରେଡିଓ, ଟିଭି, ମୋବାଇଲ ଫୋନ୍ ଭଳି ଇଲେକ୍ଟ୍ରୋନିକ୍ ସାମଗ୍ରୀରୁ ବାହାରୁଥିବା ତରଙ୍ଗ ଅନ୍ତରୀକ୍ଷରୁ ଆସୁଥିବା ତରଙ୍ଗ ସଂକେତକୁ ପ୍ରଭାବିତ କରିଥାନ୍ତି । ତେଣୁ ଏହି ସହରରେ ଏସବୁ ସାମଗ୍ରୀ ଉପରେ ବ୍ୟାନ୍ ଲାଗିଛି ।