ତାଙ୍କ ହାତରେ ତୂଳୀ ପଡ଼ିଲେ ସେ ଆଙ୍କି ଚାଲନ୍ତି ସାମ୍ୟବାଦର ଚିତ୍ର । ତାଙ୍କ କାନ୍ଭାସ୍ ସବୁବେଳେ ସାମ୍ୟବାଦର କଥା କହେ । କେତେବେଳେ ଦଳିତ, ନିଷ୍ପେସିତଙ୍କ କଥାକୁ ରଙ୍ଗତୂଳୀରେ ତୋଳନ୍ତି ତ ଆଉ କେତେବେଳେ ମଣିଷର ମନକଥାକୁ କାନ୍ଭାସରେ ପ୍ରସ୍ଫୁଟିତ କରନ୍ତି । କିନ୍ତୁ ତାଙ୍କର ଏହି କାନ୍ଭାସ ଓ ରଙ୍ଗ ତୂଳୀର ଯାତ୍ରା ଆଜିକାଲିର ନୁହେଁ । ଦୀର୍ଘ ୩୦ ବର୍ଷ ହେଲା କାନ୍ଭାସ୍ରେ ସମାଜବାଦ ଚିନ୍ତାଧାରାର ଦୃଶ୍ୟପଟ୍ଟକୁ ଅତି ସୁନ୍ଦରଭାବେ ଆଙ୍କିଛନ୍ତି । ପ୍ରଥମେ ସମାଜବାଦର କଥା ଚିତ୍ରରେ ଆଙ୍କୁ ଆଙ୍କୁ ଲେଖନୀ ଚାଳନା ମଧ୍ୟ ଆରମ୍ଭ କରିଦେଇଥିଲେ । ତାଙ୍କର ଏହି ସୃଜନଶୀଳତାକୁ ଦେଖିଲେ ସମାଜ ପରିବର୍ତନର କଳ୍ପନା ବାରିହୋଇପଡ଼େ । ଏଭଳି ସାଧନାରେ ନିମଗ୍ନ ଜଣେ ବ୍ୟକ୍ତି ହେଉଛନ୍ତି ରୂପକଳ୍ପ ଗୌରହରି ରାଉତ । ଭୁବନେଶ୍ୱର କେନ୍ଦ୍ରୀୟ ବିଦ୍ୟାଳୟ ୪ ନମ୍ବରରେ କଳା ଶିକ୍ଷକ ଭାବେ କାର୍ଯ୍ୟରତ ଗୌରହରି । ଉତ୍କଳ ବିଶ୍ୱବିଦ୍ୟାଳୟରୁ ଚିତ୍ରକଳାରୁ ସ୍ନାତକଡିଗ୍ରୀ, ଓଡ଼ିଆ ଭାଷା ସାହିତ୍ୟରେ ଡକ୍ଟରେଟ୍ ଡିଗ୍ରୀ ହାସଲ କରିଛନ୍ତି ସେ । ଏହାସହିତ ବିକେ ଆର୍ଟ କଲେଜରୁ ଚିତ୍ରକଳାରେ ଶିକ୍ଷାଲାଭ କରିଛନ୍ତି । ପ୍ରଥମେ ପେନ୍ରେ ଆରମ୍ଭ କରିଥିଲେ ଏହି ଚିତ୍ରକଳା । ଏହାପରେ ଧୀରେ ଧୀରେ ରଙ୍ଗ ଏବଂ ତୂଳୀରେ ଚିତ୍ର ଆଙ୍କିବାର ପ୍ରୟାସ କରିଥିଲେ ।
ସମାଜରେ ଦଳିତ, ଅସହାୟଙ୍କ ଉପରେ ହେଉଥିବା ନିର୍ଯାତନା ଆଇନର ବିପଦଗାମୀର କଥାକୁ ଚିତ୍ର ମାଧ୍ୟମରେ ସେ ପ୍ରତିଫଳିତ କରୁଛନ୍ତି । ଚିତ୍ର ହେଉ କି ସାହିତ୍ୟ ସାମ୍ୟବାଦ ଓ ସମାଜବାଦ ତାଙ୍କ ମୁଖ୍ୟ ବିଷୟବସ୍ତୁ । ସମାଜରେ ଘଟୁଥବା ବିଭିନ୍ନ ପ୍ରକାର ଅନ୍ୟାୟ, ଅନୀତି, ଦୁର୍ନୀତିକୁ ସେ ଗଭୀର ଭାବେ ଅନୁଧ୍ୟାନ କରନ୍ତି ଓ ସେ ସବୁକୁ ରୂପ ଦିଅନ୍ତି । ଚିତ୍ରରେ ତଥା ସାହିତ୍ୟରେ । ରଙ୍ଗତୂଳୀରେ ଚିତ୍ରିତ ତାଙ୍କର ପ୍ରତ୍ୟେକଟି ସୃଷ୍ଟି ଏକ ଶୋଷଣମୁକ୍ତ ବନ୍ଧନମୁକ୍ତ ସମାଜର କଥା କହେ । ଏହି ବିଷୟବସ୍ତୁକୁ ନେଇ ରଚିତ ତାଙ୍କର ଚତ୍ରକଳା ରାଜ୍ୟ ତଥା ଜାତୀୟସ୍ତର ଚିତ୍ରକଳା ପ୍ରଦର୍ଶନୀରେ ପ୍ରଶଂସା ସାଉଁଟିଛି । କେତେବେଳେ ମଣିଷକୁ ବନ୍ଧନ କରାଯିବାର ଚିତ୍ର ଆଉ କେତେବେଳେ ପାଦ ବନ୍ଧା ହୋଇଥିଲେ ବି ମନ ସ୍ୱାଧୀନତାର ସହ ବଂଚିବାର ଦୃଶ୍ୟକୁ ଅତି ସୁନ୍ଦର ଭାବେ ପ୍ରତିଫଳତିତ କରିଛନ୍ତି । ଏବେ ସୁଦ୍ଧା ୬୦ରୁ ଊର୍ଦ୍ଧ୍ୱ ସାମ୍ୟବାଦ ସମ୍ପର୍କିତ ଫଟୋଚିତ୍ର ପ୍ରଦର୍ଶିତ ହୋଇଛି । ଏ ସମ୍ପର୍କରେ ଗୌରହରି କୁହନ୍ତି ଚିତ୍ର ଆଙ୍କିବାରେ ସମସ୍ତଙ୍କର ଚିନ୍ତାଧାରା ଭିନ୍ନ ରହିଥାଏ । ସେହିପରି ମୁଁ ସାମ୍ୟବାଦକୁ ନେଇ ଚିତ୍ର ଆଙ୍କୁଛି ।
ଓଡ଼ିଶାରେ ସାମ୍ୟବାଦକୁ ନେଇ ଅନ୍ୟକେହି କାନ୍ଭାସ୍ ଆର୍ଟ କରୁନାହାନ୍ତି ବୋଲି ସେ କୁହନ୍ତି । ଏହି ଚିତ୍ରକଳା ପାଇଁ ଓଡ଼ିଶା ଲଳିତକଳା ଏକାଡେମୀ ପକ୍ଷରୁ ସମ୍ମାନ ପ୍ରଦାନ କରାଯିବା ସହ ସେ ଅନେକଥର ଜାତୀୟ ଏବଂ ଅନ୍ତର୍ଜାତୀୟସ୍ତରରେ ସମ୍ମାନ ପାଇଛନ୍ତି । ଅପରପକ୍ଷେ ଏ ପର୍ଯ୍ୟନ୍ତ ସାମ୍ୟବାଦ ଚିନ୍ତାଧାରାକୁ ନେଇ ତାଙ୍କର ୧୨ଟି ପୁସ୍ତକ ମଧ୍ୟ ପ୍ରକାଶ ପାଇସାରିଛି । ତାଙ୍କର ଏହି ଚିନ୍ତାଧାରା ସମାଜରେ ଏକ ବୈପ୍ଲବିକ ପରିବର୍ତନ ଆଣିବା ଉଦ୍ଦେଶ୍ୟରେ । ଏଥିପାଇଁ ସେ ଦୀର୍ଘ ୩୦ ବର୍ଷ ହେଲା ଚିତ୍ରକଳା ମାଧ୍ୟମରେ ଚେଷ୍ଟା ଜାରି ରଖିଛନ୍ତି ।
