ଦେଶରେ ଏବେ ଟିକାର ଅଭାବକୁ ନେଇ ହୋହଲ୍ଲା ଚାଲିଛି । ବିରୋଧୀ ଦଳ କେନ୍ଦ୍ର ସରକାରଙ୍କୁ ତାଙ୍କ ଅପାରଗତା ପାଇଁ ପ୍ରତିଦିନ ସମାଲୋଚନା କରୁଛନ୍ତି । ଟିକାର ଅଭାବକୁ ନେଇ ବାକଯୁଦ୍ଧ ଚାଲିଛି । ଏହାରି ଭିତରେ ଗୋଟିଏ ଖବର ଆସିଛି ଯାହା କୋଭିସିଲ୍ଡ ଟିକା ନେଇଥିବା ଲୋକଙ୍କ ଚିନ୍ତା ବଢାଇ ଦେଇପାରେ । ଏହା ସହିତ ସରକାରଙ୍କ ନୀତିକୁ ନେଇ ମଧ୍ୟ ପ୍ରଶ୍ନ ଉଠିପାରେ । କୁହାଯାଉଛି ଯେ, କୋଭିସିଲ୍ଡକୁ ସିଙ୍ଗଲ ଡୋଜ୍ ଟିକା କରିବାକୁ ଚିନ୍ତା କରାଯାଉଛି । ଅର୍ଥାତ ଆଗକୁ କୋଭିସିଲ୍ଡର ଗୋଟିଏ ଡୋଜ୍ ହିଁ ଲୋକଙ୍କୁ ଦିଆଯିବ । ଏଠି ପ୍ରଶ୍ନ ଉଠୁଛି ଯେ କ’ଣ ପାଇଁ ? ଆଗରୁ ଯଦି କୁହାଯାଉଥିଲା କୋଭିସିଲ୍ଡ୍ ର ଦୁଇଟି ଡୋଜ୍ ହିଁ କରୋନା ସଂକ୍ରମଣରୁ ସୁରକ୍ଷା ଦେଇ ପାରିବ ତେବେ ଏବେ ଗୋଟିଏ ଡୋଜରେ କେମିତି ସେହି ଏକା ସୁରକ୍ଷା ମିଳିବ ? ପ୍ରକୃତ କଥା ହେଉଛି କୋଭିସିଲ଼୍ଡର ସିଙ୍ଗଲ ସଟ୍ ଉପରେ ବୈଜ୍ଞାନିକ ବିଚାର କରୁଛନ୍ତି । ଏହା ଜାଣିବାକୁ ଚେଷ୍ଟା କରାଯାଉଛି ଯେ, କୋଭିସିଲ୍ଡର ଗୋଟିଏ ସଟ୍ ବା ଡୋଜ୍ ଭାଇରସ ସହ ଲଢିବାକୁ ସକ୍ଷମ କି ନାହିଁ । ଏମିତି ବିଚାର କରିବାର ମୁଖ୍ୟ କାରଣ ହେଉଛି ଜନସନ୍ ଆଣ୍ଡ୍ ଜନସନ୍, ସ୍ପୁଟନିକ୍ ଲାଇଟ୍ ଓ କୋଭିସିଲ୍ଡ୍ ଗୋଟିଏ ପ୍ରକାରର ପ୍ରୋସେସରେ ତିଆରି ହୋଇଛନ୍ତି । ସ୍ପୁଟନିକ୍ ଲାଇଟ୍ ସିଙ୍ଗଲ ଡୋଜ୍ ବାଲା ଟିକା । ସ୍ପୁଟନିକ୍ ଲାଇଟର ଗୋଟିଏ ଡୋଜ୍ କରୋନା ଭାଇରସ ସହ ଲଢିବାକୁ ସକ୍ଷମ । ସେହିଭଳି ଜନସନ୍ ଆଣ୍ଡ୍ ଜନସନ୍ ମଧ୍ୟ ସିଙ୍ଗଲ ଡୋଜ୍ ଟିକା । ଯେହେତୁ କୋଭିସିଲ୍ଡକୁ ମଧ୍ୟ ଏହି ଦୁଇଟି ଟିକାର ପ୍ରୋସେସରେ ପ୍ରସ୍ତୁତ କରାଯାଇଛି ତେଣୁ କୋଭିସିଲ୍ଡକୁ ମଧ୍ୟ ଗୋଟିଏ ଥର ଦିଆଯାଇ ପାରେ ବୋଲି ଯୁକ୍ତି ହେଉଛି । ଏହାକୁ ନେଇ ଅଧିକ ଗବେଷଣା ହେଉଛି । ଯଦି କୋଭିସିଲ୍ଡର ସିଙ୍ଗଲ ଡୋଜ୍ ଟିକା କରୋନା ଭାଇରସ ସହ ଲଢିବାରେ ସକ୍ଷମ ହୁଏ ତେବେ ଆଗକୁ ଭାରତରେ ଏହାକୁ ଗୋଟିଏ ଡୋଜ୍ ଦିଆଯିବ ।
ଯଦି କୋଭିସିଲ୍ଡ ଟିକାର ସିଙ୍ଗଲ ଡୋଜ ବ୍ୟବହାରକୁ ଅନୁମୋଦନ ମିଳେ ତେବେ ଭାରତରେ ଟିକା ଅଭାବ ସମସ୍ୟା କିଛିମାତ୍ରାରେ କମିବ । କାରଣ ଦ୍ୱିତୀୟ ଡୋଜ ପାଇଁ ଯେତିକି ଟିକା ଲାଗୁଛି ସେଥିରେ ଅନ୍ୟମାନଙ୍କୁ ଟିକା ଦିଆଯାଇପାରିବ । ଏମିତିରେ କେନ୍ଦ୍ର ସରକାର ଆସନ୍ତା ଜୁଲାଇ ମାସ ବେଳକୁ ଦୈନିକ ଏକ କୋଟି ଟିକାକରଣର ଲକ୍ଷ୍ୟ ରଖିଛନ୍ତି । ତେବେ ଏମିତି ସମ୍ଭବ ହେବ ଯଦି ସରକାର ପ୍ରତିମାସରେ ୩୦ରୁ ୩୨ କୋଟି ଟିକା ଉତ୍ପାଦନ କରି ପାରିବେ । କୁହାଯାଉଛି ଯେ, ଆଗାମୀ ମାସରେ ସରକାର କୋଭିସିଲ୍ଡ ଓ କୋଭାକ୍ସିନର ୨୫ କୋଟି ଡୋଜ୍ ପାଇବେ । ଏହା ସହ ସରକାରଙ୍କ ନଜର ସ୍ପୁଟନିକ୍ ଭି ଉପରେ ମଧ୍ୟ ରହିଛି । ଫାଇଜର ଓ ଅନ୍ୟ ବିଦେଶୀ ଭ୍ୟାକସିନ ବ୍ୟବହାରକୁ ସରକାର ସବୁଜ ସଂକେତ ଦେଇ ପାରନ୍ତି । ସରକାରଙ୍କ ଯୋଜନା ହେଉଛି ଯେ, ପ୍ରତି ଟିକା କେନ୍ଦ୍ରରେ ଦୈନିକ ୧୦୦ରୁ ୧୫୦ ଜଣଙ୍କୁ ଯେପରି ଟିକା ଦିଆଯିବ ।
