ଆଉ ଅଳ୍ପ କେଇଦିନ ପରେ ଆରମ୍ଭ ହେବ ଦଶହରା । ଏହା ସହିତ ଦେଶ ବ୍ୟାପି ଆରମ୍ଭ ହୋଇଯିବ ପାର୍ବଣ ସିଜିନ । କିନ୍ତୁ ଏଥର ପାର୍ବଣକୁ ଫିକା କରିବ ମହଙ୍ଗା ମାଡ । କାରଣ ପେଟ୍ରୋଲିୟମ ଜାତ ଦ୍ରବ୍ୟର ମୂଲ୍ୟବୃଦ୍ଧି କାରଣରୁ ଅନେକ ସାମଗ୍ରୀର ଦର ବୃଦ୍ଧି ଘଟିଛି । ରନ୍ଧନ ଗ୍ୟାସର ମୂଲ୍ୟ ପାଖାପାଖି ୧ ହଜାର ଟଙ୍କା ହୋଇଥିବା ବେଳେ ପରିବା ମୂଲ୍ୟ. ୫୦ ପାର କରିଗଲାଣି ।
ମହଙ୍ଗା ଏଲପିଜି
ପେଟ୍ରୋଲିୟମ କମ୍ପାନୀ ଘରୋଇ ରୋଷେଇ ଗ୍ୟାସ ସିଲିଣ୍ଡର ମୂଲ୍ୟରେ ୧୫ ଟଙ୍କା ବୃଦ୍ଧି କରିଛନ୍ତି । ଯାହା ଅକ୍ଟୋବର ୬ ତାରିଖରୁ ଲାଗୁ ହୋଇଛି । ଏହି ବୃଦ୍ଧି କାରଣରୁ ରନ୍ଧନ ଗ୍ୟାସ ମୂଲ୍ୟ ଓଡ଼ିଶାର ୯୨୬ ଟଙ୍କା ହୋଇଛି । ଆର ମାସ ବେଳକୁ ଯଦି ଏହା ୧ ହଜାର ଛୁଏଁ ତେବେ ଆଶ୍ଚର୍ଯ୍ୟ ହେବାର କିଛି ନାହିଁ ।
ଡିଜେଲ-ପେଟ୍ରୋଲ ଦାମବୃଦ୍ଧି
ଅଶୋଧିତ ତୈଳ ଦର ବୃଦ୍ଧି ସହିତ ଭାରତରେ ତୈଳ କମ୍ପାନୀ ପେଟ୍ରୋଲ ଓ ଡିଜେଲ ମୂଲ୍ୟ ବଢାଇ ଦେଇଛନ୍ତି । ଓଡ଼ିଶାର ଅନେକ ସ୍ଥାନରେ ପେଟ୍ରୋଲ ଲିଟର ପିଛା ୧୦୨ ଟଙ୍କାରେ ବିକ୍ରି ହେଉଛି । ଗତ ୮ ଦିନ ମଧ୍ୟରେ ପେଟ୍ରୋଲ ଲିଟର ପିଠା ୧.୭୫ ପଇସା ବଢିଛି । ଅନ୍ୟପକ୍ଷରେ ଡିଜେଲ ମୂଲ୍ୟ ୧୧ ଦିନ ମଧ୍ୟରେ ୨.୮୦ ପଇସା ମହଙ୍ଗା ହୋଇଛି ।
ବଢିଲା ଟମାଟ ଦାମ
ପାର୍ବଣ ସିଜନ ପୂର୍ବରୁ ଟମାଟ ମୂଲ୍ୟ ବଢିଛି । କିଛି ଦିନ ତଳେ ଯେଉଁ ଟମାଟକୁ ଚାଷୀ କମ ମୂଲ୍ୟ କାରଣରୁ ରାସ୍ତାରେ ଫୋପାଡୁଥିଲେ ଏବେ ତାହା କିଲୋ ପିଛା ୫୦ ଟଙ୍କାରେ ବିକ୍ରି ହେଉଛି । ଦିଲ୍ଲୀରେ ଟମାଟର ଖୁଚୁରା ମୂଲ୍ୟ କିଲୋ ପ୍ରତି ୬୦ ଟଙ୍କା ଥିବା ବେଳେ ଓଡ଼ିଶାରେ ମଧ୍ୟ ପାଖାପାଖି ସେହି ଏକା ଦର ରହିଛି ।
ଶୋରିଷ ତେଲ ଦର କନ୍ଦାଉଛି
ଲାଗୁଛି ଶୋରିଷ ତେଲ ଆମ ଆଦମୀ ପାଇଁ ଅପହଂଚ ହେବାକୁ ଯାଉଛି । ଶୋରିଷ ତେଲ ଏବେ ଲିଟର ପିଛା ୨ଶହ ଟଙ୍କାରେ ବିକ୍ରି ହେଉଛି । ଖାଇବା ତେଲର ଦରବୃଦ୍ଧି ରୋଷେଇ ବଜେଟକୁ ବିଗାଡି ଦେଇଛି । ଶୋରିଷ ତେଲ ସହିତ ରିଫାଇନ୍ ଅଏଲ ଓ ପାମ୍ ଅଏଲର ଦର ମଧ୍ୟ ବଢ଼ିଛି ।
