ପଶ୍ଚିମବଙ୍ଗ ବିଜେପିରେ ଏବେ ରିଭର୍ସ ମାଇଗ୍ରେସନର ପଦଧ୍ୱନୀ ଶୁଣିବାକୁ ମିଳୁଛି । କୁହାଯାଉଛି ୩୩ ଜଣ ବିଜେପି ବିଧାୟକ ଓ ତୃଣମୂଳରୁ ଆସି ଟିକେଟ୍ ନପାଇଥିବା ଆଉ କିଛି ନେତା ପୁଣି ପୁରୁଣା ଘରକୁ ଫେରିବେ । ଅପେକ୍ଷା କେବଳେ ଦିଦିଙ୍କ ସବୁଜ ସଂକେତକୁ । ତୃଣମୂଳକୁ ଫେରିବାକୁ ଅପେକ୍ଷା କରି ବସିଥିବା ନେତାଙ୍କ ତାଲିକାରେ ଅଛି ବିଜେପି ରାଷ୍ଟ୍ରୀୟ ଉପ ସଭାପତି ମୁକୁଲ ରାୟଙ୍କ ପୁଅ ଶୁଭ୍ରାଂଶୁ ରାୟଙ୍କ ନାମ ।
ପ୍ରଥମେ ଶୁଭ୍ରାଂଶୁଙ୍କ ଫେସବୁକ୍ ପୋଷ୍ଟ୍ ଏଭଳି ସଂକେତ ଦେଇଥିଲା । ଯେଉଁଥିରେ ଶୁଭ୍ରାଂଶୁ ଲେଖିଥିଲେ ଯେ, ବିଜେପି ନିର୍ବାଚିତ ସରକାର ଉପରେ ଆକ୍ରମଣ ନକରି ଆତ୍ମସମୀକ୍ଷା କରିବା ଉଚ୍ଚିତ । ଏହି ପୋଷ୍ଟକୁ ପରେ ସେ ଡିଲିଟ୍ କରି ଦେଇଥିଲେ । କିନ୍ତୁ ରାଜନୈତିକ ମହଲରେ ଯାହା ସଂକେତ ଯିବାର କଥା ଯାଇସାରିଥିଲା । ଏହାରି ଭିତରେ ମମତାଙ୍କ ଉତ୍ତରାଧିକାରୀ ବୋଲି କୁହାଯାଉଥିବା ପୁତୁରା ଅଭିଷେକ ବନାର୍ଜୀ ହସ୍ପିଟାଲକୁ ଯାଇ ଶୁଭ୍ରାଂଶୁଙ୍କ ମା’ଙ୍କ ସ୍ୱାସ୍ଥ୍ୟବସ୍ଥା ପଚାରି ବୁଝିଛନ୍ତି । ସୂଚନାଯୋଗ୍ୟ ଯେ, ଶୁଭ୍ରାଂଶୁଙ୍କ ମା’ କରୋନା ସଂକ୍ରମିତ । ଅଭିଷେକ ବାନାର୍ଜୀ ଓ ଶୁଭ୍ରାଂଶୁଙ୍କ ଭେଟଘାଟ୍ ଗୋଟିଏ କଥା କହୁଛି । ଆଉ ତା’ ହେଲା ଆଗକୁ ଶୁଭ୍ରାଂଶୁ ଯଦି ବିଜେପି ଛାଡି ତୃଣମୂଳରେ ପୁଣି ଯୋଗ ଦିଅନ୍ତି ସେଥିରେ ଆଶ୍ଚର୍ଯ୍ୟ ହେବାର କିଛି ନାହିଁ ।
ଶୁଭ୍ରାଂଶୁ ନିକଟରେ ଦେଇଥିବା କିଛି ବୟାନରୁ ମଧ୍ୟ ସ୍ପଷ୍ଟ ହେଉଛି ଯେ, ସେ ବିଜେପି ଛାଡି ପୁରୁଣା ଦଳକୁ ଫେରିବାକୁ ମନ ବଳାଇ ସାରିଛନ୍ତି । ଗୋଟିଏ ବୟାନରେ ସେ କହିଥିଲେ ଯେ, ପଶ୍ଚିମବଙ୍ଗ ବିଭାଜନ ରାଜନୀତିକୁ ଗ୍ରହଣ କରେନାହିଁ । ଏଭଳି ବୟାନ ବିଜେପି ତା’ର ବିରୋଧୀଙ୍କଠାରୁ ହିଁ ଆଶା କରିପାରେ । ନିର୍ବାଚନ ପ୍ରଚାର କାଳରେ ମୁଖ୍ୟମନ୍ତ୍ରୀ ମମତା ବାନାର୍ଜୀ ମଧ୍ୟ ସମାନ କଥା କହୁଥିଲେ । ଦ୍ୱିତୀୟ ବୟାନରେ ଶୁଭ୍ରାଂଶୁ କହିଥିଲେ ଯେ, ଅନେକ ସମୟରେ ପିଲାଙ୍କ କର୍ମର ଫଳ ପିତାମାତାଙ୍କୁ ଭୋଗ କରିବାକୁ ପଡିଥାଏ, ମୋତେ ଲାଗୁଛି ମୋ କର୍ମଫଳ ମୋ ଅଭିଭାବକ ଭୋଗ କରୁଛନ୍ତି । ଏମିତି କହି ଶୁଭ୍ରାଂଶୁ ବିଜେପିରେ ଯୋଗଦାନ ନିଷ୍ପତ୍ତି ଠିକ୍ ନଥିଲା ବୋଲି କହିବାକୁ ଚାହୁଁଛନ୍ତି କି ? ଏହା ମଧ୍ୟ ଏକ ବଡ଼ ପ୍ରଶ୍ନ
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫୋନ୍ କଲ ପାଇବା ପରେ ହୁଏତ ମୁକୁଲା ରାୟ ନିଜ ମନ ବଦଳାଇ ପାରନ୍ତି । ମୁକୁଲ ରାୟ ବିଜେପିରେ ଅସନ୍ତୁଷ୍ଠ ଥିବା କୁହାଯାଉଛି । ବିଜେପି ଯେଉଁଭଳି ଭାବେ ତାଙ୍କୁ ଉପେକ୍ଷା କରି ଶୁଭେନ୍ଦୁ ଅଧିକାରୀଙ୍କୁ ବିଧାନସଭାରେ ବିରୋଧି ଦଳ ନେତା କରିଲା ତାକୁ ନେଇ ସେ ଅସନ୍ତୁଷ୍ଠ ଅଛନ୍ତି । ଶୁଭେନ୍ଦୁଙ୍କର ନନ୍ଦିଗ୍ରାମ ଛାଡି ବାହାରେ କୌଣସି ପ୍ରଭାବ ନଥିଲା । କିନ୍ତୁ ମୁକୁଲ ବିଜେପିକୁ ୨୦୧୯ ଲୋକସଭା ନିର୍ବାଚନରେ ଏକ ଶକ୍ତିଭାବେ ଛିଡା କରାଇଥିଲେ । ଏହାସହିତ ବିଧାନସଭା ନିର୍ବାଚନରେ ଯେତିକି ବି ସିଟ୍ ବିଜେପି ପାଇଛି ତାହାର ଶ୍ରେୟ ମୁକୁଲଙ୍କୁ ଯିବ ବୋଲି ରାଜନୈତିକ ବିଶ୍ଲେଷକଙ୍କ ମତ ।
ନିର୍ବାଚନ ଫଳାଫଳ ଆସିବା ପରଠାରୁ ମୁକୁଲ ଆଇସୋଲେସନରେ ଅଛନ୍ତି । କାରଣ ସେ କରୋନା ସଂକ୍ରମିତ ହୋଇଥିଲେ । ଯାହା ତାଙ୍କ ପାଇଁ ଏକ ପ୍ରକାର ଭଲ ହୋଇଛି । କାରଣ ପୁଅର ବୟାନକୁ ନେଇ ତାଙ୍କୁ ଏବେ କିଛି ମଧ୍ୟ କୈଫତ ଦେବାକୁ ପଡୁନି । କିନ୍ତୁ କୋଭିଡ୍ ଆଇସୋଲେସନରୁ ବାହାରିବା ପରେ ମୁକୁଲ ରାଜନୈତିକ ଆଇସୋଲେସନରୁ ବାହାରି କ’ଣ କହିବେ ତା’ ଉପରେ ସଭିଙ୍କ ନଜର ରହିଛି । ହୁଏତ ମୁକୁଲ ରାଜନୈତିକ ବାଧ୍ୟବାଧକତା ଓ ମୋଦିଙ୍କ ବୁଝାଇବାରେ ବିଜେପିରେ ରହି ପାରନ୍ତି କିନ୍ତୁ ପୁଅ ଶୁଭ୍ରାଂଶୁ ବିଜେପି ବାହାରେ ଭବିଷ୍ୟତ ଖୋଜୁଛନ୍ତି ଏଥିରେ ସନ୍ଦେହ ନାହିଁ । ଯଦି ମୁକୁଲ ବିଜେପିରେ ରୁହନ୍ତି ଓ ପୁଅ ଟିଏମସିକୁ ଯାଆନ୍ତି ତେବେ ଏହା ମଧ୍ୟ ଆଉ ଗୋଟିଏ ରିଭର୍ସ ମାଇଗ୍ରାସେନ୍ ହେବ । ମନେପକାନ୍ତୁ ଜଶବନ୍ତ ସିହ୍ନାଙ୍କୁ । ଜଶବନ୍ତ ବିଜେପି ଛାଡି ଏବେ ତୃଣମୂଳର ରାଷ୍ଟ୍ରୀୟ ଉପାଧ୍ୟକ୍ଷ କିନ୍ତୁ ପୁଅ ଜୟନ୍ତ ସିହ୍ନା ମୋଦି ସରକାର ପାର୍ଟ ଟୁରେ ମନ୍ତ୍ରୀ ନହୋଇ ପାରଥିଲେ ବି ଦଳ ଛାଡି ନାହାନ୍ତି । ଯଦି ମୁକୁଲ ବିଜେପିରେ ରୁହନ୍ତି ଓ ପୁଅ ଟିଏମସିକୁ ଯାଆନ୍ତି ତେବେ ଏହା ସିହ୍ନା ପରିବାରର ଓଲଟା ହେବ ।
