ମୁମ୍ବାଇ: ବଲିଉଡ଼ର ଖ୍ୟାତନାମା ଅଭିନେତା ଅମିତାଭ ବଚ୍ଚନ ବୁଧବାର ୮୧ ବର୍ଷରେ ପଦାର୍ପଣ କରିଛନ୍ତି । ବିଗ୍ ବିଙ୍କ ଜନ୍ମ ଦିନ ପାଳନ କରିବା ପାଇଁ ମଙ୍ଗଳବାର ମଧ୍ୟ ରାତ୍ରିରେ ଅସଂଖ୍ୟ ପ୍ରଶଂସକ ତାଙ୍କ ବାସଭବନ ‘ଜଲ୍ସା’ ବାହାରେ ଭିଡ଼ ଜମାଇଥିଲେ । ପରେ ବିଗ୍ବିଙ୍କୁ ଶୁଭେଚ୍ଛା ଜଣାଇଥିଲେ ।
ବାହାରକୁ ଆସି ପ୍ରଶଂସକମାନଙ୍କୁ କୃତଜ୍ଞତା ଜଣାଇଲେ
ଅମିତାଭଙ୍କ ଜନ୍ମଦିନ ଅବସରରେ ତାଙ୍କର ଟିକେ ଝଲକ ପାଇବା ପାଇଁ ହଜାର ହଜାର ପ୍ରଶଂସକ ମଧ୍ୟରାତ୍ରିରେ ମୁମ୍ବାଇର ଜୁହୁସ୍ଥିତ ତାଙ୍କ ବାସଭବନ ଜଲସା ସମ୍ମୁଖରେ ଜମା ହୋଇଥିଲେ । ଘର ବାହାରେ ବହୁ ସଂଖ୍ୟାରେ ପ୍ରଶଂସକ ଥିବା ଦେଖି ଅମିତାଭ ବାଧ୍ୟ ହୋଇ ରାତି ୧୨ଟା ୧୦ରେ କିଛି ସମୟ ପାଇଁ ବାହାରକୁ ଆସିଥିଲେ । ହାତଯୋଡ଼ି ପ୍ରଶଂସକମାନଙ୍କୁ କୃତଜ୍ଞତା ଜଣାଇଥିଲେ । ଏଥିସହିତ କରମର୍ଦ୍ଦନ କରିଥିଲେ । ପରେ ହସି ହସି ସେମାନଙ୍କ ଆଡ଼କୁ ହାତ ହଲାଇଲେ । ଅନେକେ ପ୍ରଶଂସକ ତାଙ୍କ ଫଟୋ ଥିବା ‘ଟି-ସାର୍ଟ’ ପିନ୍ଧିଥିଲେ । ଆହୁରି କେତେ ଜଣ ବିଭିନ୍ନ ଫିଲ୍ମର ଚରିତ୍ରରେ ସଜ୍ଜେଇ ହୋଇ ଆସିଥିଲେ । ଆଉ କିଛି ଶୁଭେଚ୍ଛୁ ଗୀତ ଗାଇ ନାଚିଥିଲେ । ଅମିତାଭ କେତେଜଣଙ୍କ ସହିତ କରମର୍ଦ୍ଦନ ବି କରିଥିଲେ । ଏହି ସମୟରେ ଅମିତାଭ ‘ପେଷ୍ଟାଲ୍ ପିଙ୍କ୍’ ଓ ‘ମିଣ୍ଟ୍’ ରଙ୍ଗର ଛିଟ ଜ୍ୟାକେଟ୍, ଧୂସର ରଙ୍ଗର ଟ୍ରାକ୍ ପ୍ୟାଣ୍ଟ, ମୁଣ୍ଡରେ ବନ୍ଦନା ଟୋପି ଓ ଆଖିରେ ଚଷମା ପିନ୍ଧିଥିଲେ , ଯେଉଁଥିରେ ସେ ଖୁବ୍ ସୁନ୍ଦର ଦେଖାଯାଉଥିଲେ ।
୮୧ ବର୍ଷ ବୟସରେ ମଧ୍ୟ ଅମିତାଭ ବଚ୍ଚନ ଫିଲ୍ମ ଜଗତରେ ଅନ୍ୟତମ ସକ୍ରିୟ ସୁପରଷ୍ଟାର ଭାବେ ପରିଗଣିତ ହୁଅନ୍ତି । ଅମିତାଭଙ୍କର ଆଗକୁ କେତେଗୁଡ଼ିଏ ଫିଲ୍ମ ରିଲିଜ୍ ହେବାକୁ ଯାଉଛି ।
