ମାସାଧିକ ସମୟ ଧରି ଜାରିଥିବା ଋଷ ଓ ୟୁକ୍ରେନ୍ ଯୁଦ୍ଧ ଦୁନିଆକୁ ବ୍ୟସ୍ତ ବିବ୍ରତ କରିଥିବା ବେଳେ ଆମେରିକାର ଚିନ୍ତା ଭାରତକୁ ନେଇ । ଭାରତ ଓ ଋଷର ସମ୍ପର୍କ ଆମେରିକାକୁ ଚିନ୍ତାରେ ପକାଇଛି । ଭାରତ ଯେଉଁଭଳି ଭାବେ ଋଷକୁ ନେଇ ନିରବତା ଅବଲମ୍ବନ କରୁଛି ତାହା ୱାସିଂଟନକୁ ବିବ୍ରତ କରୁଛି । ଆଉ ଆମେରିକା ଏହାକୁ ଖୋଲାଖୋଲି ସ୍ୱୀକାର ମଧ୍ୟ କରିଛି । ଋଷ ପ୍ରତି ଭାରତର ନିରବ ସମର୍ଥନକୁ ନେଇ ଆମେରିକା ଅସୁଖି ଥିଲେ ମଧ୍ୟ ଆଶା କରୁଛି ଯେ, ଡେରିରେ ହେଉ ପଛେ ଏହା ଭାରତକୁ ନିଜ ପଟକୁ ଆଣିବାରେ ସଫଳ ହେବ । ହ୍ୱାଇଟ୍ ହାଉସ ସିକ୍ୟୁରିଟି କାଉନସିଲିଂରେ ଇଣ୍ଡୋ ପେସିଫିକ୍ ନିର୍ଦ୍ଦେଶକ ରୈପ୍ ହୁପର କହିଛନ୍ତି ଯେ, ଆମେ ଭାରତକୁ ନିଜ ପକ୍ଷକୁ ଆଣିବା ପାଇଁ ଉଦ୍ୟମ କରୁଛୁ ।
ଜାତିସଂଘ ସୁରକ୍ଷା ପରିଷଦରେ ଭାରତର ଆଭିମୁଖ୍ୟ
ୟୁକ୍ରେନ ଆକ୍ରମଣକୁ ନେଇ ଋଷ ବିରୋଧରେ ଜାତିସଂଘ ସୁରକ୍ଷା ପରିଷଦରେ ଆସିଥିବା ନିନ୍ଦାପ୍ରସ୍ତାବ ଉପରେ ଭୋଟିଂ କାଳରେ ଭାରତ ଅନୁପସ୍ଥିତ ଥିଲା । ଭାରତ ସହିତ ଚୀନ୍ ଓ ମିଳିତ ଆରବ ଏମିରତ୍ ମଧ୍ୟ ଭୋଟିଂ କାଳରେ ଅନୁପସ୍ଥିତ ଥିଲେ । ଭାରତର ଅନୁପସ୍ଥିତିକୁ ନେଇ ପ୍ରଶ୍ନ ଉଠିବା ପରେ ବୈଦେଶିକ ସଚିବ ହର୍ଷବର୍ଦ୍ଧନ ଶୁଙ୍ଗଳା କହିଥିଲେ ଯେ, ଆମେ ଜାତିସଂଘରେ ସାବଧାନତା ପୂର୍ବକ ଏଭଳି ଆଭିମୁଖ୍ୟ ପ୍ରଦର୍ଶନ କରୁ ଯାହା ବିଚାର ଉପରେ ଆଧାରିତ ହୋଇଥାଏ । ଆମେ ନିନ୍ଦା ପ୍ରସ୍ତାବ ଉପରେ ବିଚାର ନିଶ୍ଚିତ କରିବୁ କିନ୍ତୁ ନିଜ ହିତକୁ ଦେଖି ନିଷ୍ପତି ନେବୁ ।
ଭାରତକୁ ନିଜ ପଟକୁ ଆଣିବାକୁ ଉଦ୍ୟମ କରୁଛି ବାଇଡେନ୍ ପ୍ରଶାସନ
ଭାରତକୁ ନିଜ ପକ୍ଷକୁ ଆଣିବାକୁ ବାଇଡେନ୍ ପ୍ରଶାସନ ଉଦ୍ୟମ କରୁଛି । ଗତ ସପ୍ତାହରେ ବାଇଡେନ୍ ପ୍ରଶାସନର ବରିଷ୍ଠ କୂଟନୀତିଜ୍ଞ ଭିକ୍ଟୋରିଆ ନୁଲେଣ୍ଡ୍ ବୈଦେଶିକ ସଚିବ ହର୍ଷବର୍ଦ୍ଧନଙ୍କୁ ସାକ୍ଷାତ କରିଥିଲେ । ଦୁଇ ଜଣଙ୍କ ମଧ୍ୟରେ ୟୁକ୍ରେନ୍ ପ୍ରସଙ୍ଗକୁ ନେଇ ଆଲୋଚନା ହୋଇଥିଲା । ଜାତିସଂଘରେ ଭାରତର ଆଭିମୁଖ୍ୟକୁ ନେଇ ଚିନ୍ତାରେ ଥିବା ଆମେରିକା ଭାରତକୁ ମନାଇବା ପାଇଁ ଉଦ୍ୟମ କରି ଆସୁଛି ।
ଭାରତ-ଋଷ ପ୍ରତିରକ୍ଷା ସମ୍ପର୍କ ବଡ଼ କାରଣ
ଭାରତ ସାମରିକ ଉପକରଣ ପାଇଁ ଋଷ ଉପରେ ନିର୍ଭରଶୀଳ । ଭାରତ ବିଦେଶରୁ ଆମଦାନୀ କରୁଥିବା ଅସ୍ତ୍ରଶସ୍ତ୍ର ମଧ୍ୟରୁ ୮୫ ପ୍ରତିଶତ ଋଷରୁ ଆସିଥାଏ । ଏଭଳି ପରିସ୍ଥିତିରେ ଭାରତ ପକ୍ଷରେ ଋଷକୁ ବିରୋଧ କରିବା ସମ୍ଭବ ନୁହେଁ । ଯାହାକୁ ଆମେରିକା ମଧ୍ୟ ବୁଝୁଛି । ତେଣୁ ଆମେରିକା ଭାରତକୁ ଅସ୍ତ୍ର ଯୋଗାଇବା ଅଫର ଦେଉଛି । ଆମେରିକା ଭାରତକୁ ସବୁ ପ୍ରକାର ଅସ୍ତ୍ର ଓ ଉପକରଣ ଯୋଗାଇବାକୁ ପ୍ରତିଶ୍ରୁତି ଦେଇଛି । ଆମେରିକା ଭାରତକୁ କେଉଁଭଳି ଭାବେ ନିଜ ପଟେ ଚାହୁଁଛି ତାହା ଏଇଥିରୁ ଅନୁମାନିତ ଯେ, ଋଷ ଉପରେ ପ୍ରତିବନ୍ଧକ ଲାଗିଥିବା ବେଳେ ମଧ୍ୟ ଭାରତ ଶସ୍ତା ଦରରେ ଋଷଠାରୁ ତୈଳ ଆମଦାନୀ କରୁଛି । କିନ୍ତୁ ଆମେରିକା ଭାରତ ଉପରେ ପ୍ରତିବନ୍ଧକ ଲାଗୁ କରିବାକୁ ମନା କରିଦେଇଛି । ଭାରତ ଉପରେ ପ୍ରତିବନ୍ଧକ ଲଗାଇ ଭାରତକୁ ପ୍ରତିକ୍ରିୟାଶୀଳ କରିବାକୁ ଆମେରିକା ଚାହୁଁନାହିଁ ।
