ବାପାମାଆଙ୍କ ପାଇଁ ଆସିଥିବା ଚିଠିକୁ ୮୦ ବର୍ଷ ପରେ ପାଇଲେ ଝିଅ

ନ୍ୟୁୟର୍କ: ୮୦ ବର୍ଷ ପରେ ମିଳିଲା ଚିଠି । ଏହା ପଢିବା ପରେ ଆପଣଙ୍କୁ ଟିକେ ଖଟ୍‌କା ଲାଗିପାରେ । ପୁଣି ଭାବୁଥିବେ ଦୀର୍ଘ ୮୦ ବର୍ଷ ପରେ ଚିଠି ମିଳିବା କ’ଣ ସମ୍ଭବ ? ହେଲେ ଘଟଣାଟି ସତ । ଆମେରିକାରୁ ଏମିତି ଏକ ଘଟଣା ସାମ୍ନାକୁ ଆସିଛି । ଏକ ଦମ୍ପତିଙ୍କ ନିକଟକୁ ଆସିଥିବା ଚିଠିକୁ ୮୦ ବର୍ଷ ପରେ ତାଙ୍କ ଝିଅ ପାଇଛନ୍ତି । ଯାହାକୁ ଦେଖି ସେ ନିଜେ ବି ଆଶ୍ଚର୍ଯ୍ୟ ହୋଇଯାଇଛନ୍ତି ।

ଚିଠିକୁ ଠିକ୍ ସ୍ଥାନରେ ପହଞ୍ଚାଇବାକୁ ଉତ୍ସାହିତ ହୋଇପଡ଼ିଥିଲେ ଡ଼ାକ କର୍ମଚାରୀ

ଆଜିକାଲି ଯୁଗରେ ଡାକଘରୁ ଚିଠି ଆସିବା ଏକ ସ୍ୱପ୍ନ । ଡ଼ିଜିଟାଲ ଦୁନିଆରେ ଚିଠି ଦିଆନିଆ ସମ୍ପୂର୍ଣ୍ଣ ବନ୍ଦ ହୋଇଯାଇଛି ବୋଲି କହିଲେ କିଛି ଭୁଲ୍ ହେବନାହିଁ । ହେଲେ ନିକଟରେ ଜଣେ ଯୁବତୀ ତାଙ୍କ ବାପାମାଆଙ୍କ ନିକଟକୁ ଆସିଥିବା ଏକ ଚିଠି ପ୍ରାୟ ୮୦ ବର୍ଷ ପରେ ପାଇଛନ୍ତି । ୧୯୪୩ ମସିହାରେ ଦମ୍ପତି ଲୁଇସ୍ ଓ ଲାବେନଙ୍କୁ ଲେଖା ଯାଇଥିବା ଏକ ଚିଠି ଡାକଘରୁ ମିଳିଥିଲା । ଚିଠିଟି ମିଳିବା ପରେ ଡାକଘର କର୍ମଚାରୀ ଖୁବ୍ ଆଶ୍ଚର୍ଯ୍ୟ ହୋଇ ଯାଇଥିଲେ । କାରଣ ଚିଠି ଥିଲା ୮୦ ବର୍ଷ ତଳର । ସେମାନେ ଉକ୍ତ ଚିଠିଟିକୁ ଉଚିତ୍ ସ୍ଥାନରେ ପହଞ୍ଚାଇବାକୁ ଉତ୍ସାହିତ ହୋଇପଡ଼ିଲେ । ତାପରେ ଡାକ କର୍ମୀମାନେ ଚିଠିଟିକୁ ନେଇ ଦମ୍ପତିଙ୍କ ଝିଅ ଜେନଟଙ୍କୁ ଦେଇଥିଲେ । ସେ ଯେତେବେଳେ ଚିଠିଟି ପଢ଼ିଲେ ତ ଅତ୍ୟନ୍ତ ଭାବପ୍ରବଣ ହୋଇଗଲେ । କାରଣ ସେ ଜାଣିବାକୁ ପାଇଲେ ଯେ ତାଙ୍କ ପୂର୍ବରୁ ତାଙ୍କ ବାପାମାଆଙ୍କର ଆଉ ଏକ ଝିଅର ମୃତ୍ୟୁ ହେଇଯାଇଛି । ତାଙ୍କ ପାଇଁ ଏହି କଥା ଏକଦମ ନୂଆ ଥିଲା । ସେ ଜାଣି ନଥିଲେ ଯେ ତାଙ୍କ ବାପାମାଆଙ୍କ ଜୀବନରେ ଏତେ ବଡ଼ ଏକ ଘଟଣା ଘଟିଯାଇଛି । ଚିଠିରେ କେହି ଜଣେ ସମ୍ପର୍କୀୟ କନ୍ୟା ବିୟୋଗ ହେତୁ ସେମାନଙ୍କୁ ସମବେଦନା ଜଣାଇଥିବା ଦେଖିବାକୁ ମିଳିଥିଲା