ନୂଆଦିଲ୍ଲୀ : ଜେଲରେ କମ୍, ପାରୋଲରେଅଧିକ । ପୁଣି ମିଳିଛି ଦୁଷ୍କର୍ମକାରୀ ବାବା ରାମ ରହିମଙ୍କୁ ୫୦ ଦିନର ପାରୋଲ । ଦୁଇ ମହିଳାଙ୍କୁ ବଳାତ୍କାର କରିବା ଅଭିଯୋଗରେ ହରିୟାଣାର ରୋହତକ ଜିଲ୍ଲାର ସୁନାରିଆ ଜେଲରେ ଆଜୀବନ କାରାଦଣ୍ଡ ଭୋଗୁଥିବା ଡେରା ସଚ୍ଚା ସୌଦା ମୁଖ୍ୟ ଗୁରୁମିତ ରାମ ରହିମକୁ ପୁଣି ମିଳିଛି ପାରୋଲ । ଗତ ୨୯ ଦିନ ପୂର୍ବରୁ ବାବା ରାମ ରହିମ ପାରୋଲ କାଟି ଜେଲକୁ ଫେରିଥିଲେ । ହେଲେ ଏବେ ପୁଣି ୫୦ ଦିନ ପାରୋଲ ଆବେଦନକୁ କୋର୍ଟ ମଞ୍ଜୁରୀ ପ୍ରଦାନ କରିଛନ୍ତି । ବାବା ରାମ ରହିମଙ୍କ ଏହା ହେଉଛି ଗତ ୨୪ ମାସରେ ସପ୍ତମ ପାରୋଲ ଏବଂ ଗତ ଚାରି ବର୍ଷରେ ନବମ ପାରୋଲ ।
ପାରୋଲରେ ଯାଇ ବରନାବା ଆଶ୍ରମରେ ରହିବେ ବାବା ରହିମ
ଏହି ୫୦ ଦିନର ପାରୋଲ ସମୟରେ ବାବା ରାମ ରହିମ ଉତ୍ତର ପ୍ରଦେଶର ବାଗବତରେ ଥିବା ବରନାବା ଆଶ୍ରମରେ ରହିବେ । ଆଜି ସେ ଜେଲରୁ ବାହାରିବେ ବୋଲି ଜଣାପଡିଛି । ଗତବର୍ଷ ନଭେମ୍ବର ୨୦୨୩ରେ ୨୧ ଦିନିଆ ପାରୋଲରେ ଯାଇଥିଲେ ବାବା ରହିମ । ମାଆଙ୍କ ଅସୁସ୍ଥତା ସହ ବିଭିନ୍ନ କାରଣ ଦର୍ଶାଇ ଏକାଧିକ ଥର ପାରୋଲରେ ଯାଉଛନ୍ତିି । ଗତବର୍ଷ ତାଙ୍କୁ ତିନି ଥର ପାରୋଲ ପ୍ରଦାନ କରାଯାଇଥିଲା । ବିଭିନ୍ନ ପ୍ରକାର କାରଣ ଦର୍ଶାଇ ସେ ବାରମ୍ବାର ପାରୋଲ ଆବେଦନ କରୁଛନ୍ତି । ଆଉ ସବୁଠୁ ବଡ଼ କଥା ତାଙ୍କୁ ଅନୁମତି ମଧ୍ୟ ମିଳିଯାଉଛି । ହରିଆଣା ଜେଲର ନିୟମ ମୁତାବକ ଆଜୀବନ ଜେଲ କାଟୁଥିବା କୌଣସି ବି କଏଦୀ ବର୍ଷରେ ୭୦ ଦିନ ପାରୋଲରେ ଯାଇପାରିବେ ।
ହରିୟାଣାର ସୁନାରିଆ ଜେଲରେ ଆଜୀବନ କାରାଦଣ୍ଡ ଭୋଗୁଛନ୍ତି
ସୂଚନାଯୋଗ୍ୟ, ଦୁଇଜଣ ମହିଳା ଶିଷ୍ୟାଙ୍କୁ ବଳାତ୍କାର ଏବଂ ଏକ ହତ୍ୟା ମାମଲାରେ ଗିରଫ ହୋଇଥିଲେ । ୨୦୧୭ ମସିହାରେ ବାବା ରହିମଙ୍କୁ ୨୦ ବର୍ଷ କାରାଦଣ୍ଡ ଶୁଣାଇଥିଲେ ଅଦାଲତ । ପରେ ୨୦୦୨ରେ ସାମ୍ବାଦିକ ରାମ ଚନ୍ଦେର ଛତ୍ରପତି ଏବଂ ଡେରା ମ୍ୟାନେଜର ରଞ୍ଜିତ ସିଂଙ୍କ ହତ୍ୟା ସମେତ ଅନ୍ୟ ଦୁଇଟି ହତ୍ୟା ମାମଲାରେ ଆଜୀବନ କାରାଦଣ୍ଡରେ ଦଣ୍ଡିତ କରାଯାଇଥିଲା ତାଙ୍କୁ । ଏବେ ସେ ହରିୟାଣାର ରୋହତକ ଜିଲ୍ଲାର ସୁନାରିଆ ଜେଲରେ ଆଜୀବନ କାରାଦଣ୍ଡ ଭୋଗୁଛନ୍ତି ।
