ଭାରତୀୟ କ୍ରିକେଟ୍ ଟିମର ପୂର୍ବତନ କ୍ୟାପ୍ଟେନ୍ ବିରାଟ କୋହଲି ପୁଣିଥରେ ବିବାଦ ଭିତରକୁ ଆସିଛନ୍ତି । ୩୩ ବର୍ଷୀୟ ବିରାଟ କୋହଲିଙ୍କ ଗୋଟିଏ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି , ଯେଉଁଥିରେ ଜାତୀୟ ସଂଗୀତ ଚାଲୁଥିବା ବେଳେ ବିରାଟଙ୍କୁ ଚୁଇଂଗମ୍ ଚୋବାଉଥିବା ଦେଖିବାକୁ ମିଳିଛି ।
ରବିବାର ଦିନ ଭାରତ ଓ ଦ.ଆଫ୍ରିକା ମଧ୍ୟରେ ଖେଳାଯାଇଥିବା ତୃତୀୟ ଦିନିକିଆ ମ୍ୟାଚର ଏହି ଭିଡିଓ ବୋଲି ଦାବି କରାଯାଉଛି । ଏହି ଭିଡିଓକୁ ନେଇ କ୍ରିକେଟ୍ ପ୍ରେମୀ ବିରାଟଙ୍କୁ ସମାଲୋଚନା କରୁଛନ୍ତି । ଏହାସହିତ ବିସିସିଆଇ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରୁ ବୋଲି ଦାବି ହେଉଛି ।
ଭିଡିଓରେ ସ୍ପଷ୍ଟ ଭାବେ ଦେଖାଯାଉଛି ଯେ, ଭାରତୀୟ ଖେଳାଳୀ ମ୍ୟାଚ୍ ପୂର୍ବରୁ ଏକାଠି ଜାତୀୟ ସଂଗୀତ ଗାୟନ କରୁଥିବା ବେଳେ ବିରାଟ କିନ୍ତୁ ଚୁଇଂଗମ୍ ଚୋବାଉଥିଲେ । ଭିଡିଓରେ ବିରାଟଙ୍କୁ ଦୁଇଟି ଆଙ୍ଗଲରେ ଦେଖିବାକୁ ମିଳିଛି ।
କ୍ୟାରିୟରର ସବୁଠାରୁ କଠିନ ସମୟ ଦେଇ ଗତି କରୁଛନ୍ତି କୋହଲି
କୋହଲି ନିଜେ ସ୍ୱୀକାର ନକଲେ ମଧ୍ୟ ଏହା ସତ୍ୟ ଯେ, ଏବେ ସେ ନିଜ କ୍ୟାରିୟରର ସବୁଠାରୁ କଠିନ ସମୟ ଦେଇ ଗତି କରୁଛନ୍ତି । କ୍ରିକେଟର ତିନୋଟି ଫର୍ମାଟ ମଧ୍ୟରୁ ଦୁଇଟିର ଅଧିନାୟକତ୍ୱ ସେ ନିଜେ ଛାଡିଥିବା ବେଳେ ଗୋଟିଏରୁ ତାଙ୍କୁ ବିଦା କରାଯାଇଥିଲା । ନିକଟରେ କେପଟାଉନ୍ ଟେଷ୍ଟରେ ଡିଆରଏସର ଗୋଟିଏ ନିଷ୍ପତ୍ତି ତାଙ୍କ ମନମୁତାବକ ନହେବାରୁ ସେ ପ୍ରସାରକଙ୍କ ଉପରେ ନିଜ କ୍ରୋଧ ପ୍ରକାଶ କରିଥିଲେ । ଯାହାକୁ ନେଇ ତାଙ୍କୁ ସମାଲୋଚନାର ଶିକାର ହେବାକୁ ପଡିଥିଲା ।
