ନିରବଚ୍ଛିନ୍ନ ରୋଗୀ ସେବାରେ କାହ୍ନା

568

କରୋନାରେ ଯଦି ପରିବାରର କୌଣସି ବ୍ୟକ୍ତି ଆକ୍ରାନ୍ତ ହୁଅନ୍ତି ତେବେ ତାଙ୍କ ନିକଟକୁ ଯିବାକୁ ନିକଟତମ ପରିଜନ ଏବଂ ରକ୍ତ ସମ୍ପର୍କ ଲୋକେ ମଧ୍ୟ ଭୟ କରନ୍ତି । ରୋଗୀଙ୍କ ପାଖକୁ ଯାଉଥିବା ଡାକ୍ତର ଏବଂ ନର୍ସ ପିପିଇ କିଟ୍ ପିନ୍ଧି ସେମାନଙ୍କ ସେବା କରନ୍ତି । କୋଭିଡ୍ ରୋଗୀଙ୍କ ସେବା କରୁଥିବା ଅନେକ କରୋନା ଯୋଦ୍ଧା ବିଶେଷ କରି ଡାକ୍ତର ଓ ନର୍ସଙ୍କ ବିଷୟରେ ପ୍ରତିଦିନ କିଛି ନା କିଛି ବିଭିନ୍ନ ଗଣମାଧ୍ୟମରେ ଖବର ପ୍ରସାରିତ ହେଉଛି । କିନ୍ତୁ ଏମ୍‌କେସିଜି କୋଭିଡ୍ ହସ୍ପିଟାଲରେ ଏମିତି ଜଣେ ବ୍ୟକ୍ତି କୋଭିଡ୍ ରୋଗୀଙ୍କ ସେବାରେ ଲାଗି ପଡ଼ିଛନ୍ତି ଯାହାଙ୍କୁ ଅନେକ ଜାଣନ୍ତି ନାହିଁ । ସେ ଡାକ୍ତର କି ନର୍ସ ନୁହଁନ୍ତି, ସେ ହେଉଛନ୍ତି ଜଣେ ଝାଡ଼ୁଦାର । ନାଁ କାହ୍ମୁଚରଣ ନାୟକ (କାହ୍ନା) । ଘର ପୁରୁଣା ବ୍ରହ୍ମପୁର । କାହ୍ନା ଯଦି ହସ୍ପିଟାଲରେ ପହଂଚିବାରେ ସାମାନ୍ୟ ବିଳମ୍ବ ହୁଏ, ତେବେ ରୋଗୀଙ୍କଠାରୁ ଆରମ୍ଭ କରି ଡାକ୍ତର ଓ ନର୍ସ ପର୍ଯ୍ୟନ୍ତ ସମସ୍ତଙ୍କ ଡାକରା ପଡ଼େ । କାହ୍ନାଙ୍କ କାମ ହେଲା କୋଭିଡ୍ ହସ୍ପିଟାଲ ଡିଟିଏଚ୍‌-୧ ଏବଂ ୨ର ପାଇଖାନାଠାରୁ ଆରମ୍ଭ କରି ଚଟାଣ ପର୍ଯ୍ୟନ୍ତ ସମସ୍ତ ସଫେଇ କରିବା । ୨୦୨୦ରେ କରୋନାର ପ୍ରଥମ ଲହରରେ ମଧ୍ୟ ସେ ଏହି କାର୍ଯ୍ୟରେ ନିୟୋଜିତ ଥିଲେ । ୨୦୨୧ ଏପ୍ରିଲରୁ ବର୍ତମାନ ପର୍ଯ୍ୟନ୍ତ ସେ କୋଭିଡ୍ ହସ୍ପିଟାଲରେ କାର୍ଯ୍ୟ କରୁଛନ୍ତି । ଠିକାଦାରଙ୍କ ଅଧୀନରେ କାହ୍ନା ଏପରି କାର୍ଯ୍ୟରେ ନିୟୋଜିତ ଅଛନ୍ତି । ହସ୍ପିଟାଲ ପରିସର ସଫା ସୁତରା କରିବା ଡ୍ୟୁଟି କାହ୍ନାଙ୍କ ସହ ଅନ୍ୟ କିଛି ଲୋକ ମଧ୍ୟ କରନ୍ତି । କିନ୍ତୁ ସମସ୍ତଙ୍କ ମୁହଁରେ କାହ୍ନାଙ୍କ ନାଁ ହିଁ ରହିଥାଏ ଆଗରେ । କାହ୍ନା ସକାଳୁ ଘରୁ ବାହାରୁ ରାତି ହେଲେ ଘରକୁ ଫେରନ୍ତି । ଘରକୁ ଯିବା ପୂର୍ବରୁ ମେଡିକାଲରେ ନିଜେ ସଫାସୁତରା ହୁଅନ୍ତି ଏବଂ ଘରେ ପହଂଚିବା କ୍ଷଣି ଗରମ ପାଣିରେ ଗାଧୋଇ ଘର ଭିତରେ ପ୍ରବେଶ କରନ୍ତି ।  ଘରେ ସ୍ତ୍ରୀଙ୍କ ପାଖରେ ଦୁଇ ବର୍ଷର ପୁଅକୁ ଛାଡ଼ି ରୋଗୀ ସେବାରେ ଲାଗିପଡ଼ିଛନ୍ତି କାହ୍ନା । ତାଙ୍କ କହିବା ଅନୁଯାୟୀ, ସେ ଦୁଇ ବର୍ଷ ହେଲା ପୁଅକୁ ସ୍ନେହ ଦେଇପାରିନାହାନ୍ତି । ପ୍ରତିଦିନ ସେ କରୋନା ରୋଗୀଙ୍କ ସଂସ୍ପର୍ଶରେ ଆସୁଥିବାରୁ ସେ ପୁଅକୁ ଟିକିଏ ଧରି ବି ପାରୁ ନାହାନ୍ତି । ଏପରିକି ବିଶ୍ୱ ପିତୃତ୍ୱ ଦିବସ ଭଳି ଦିନରେ ବି ସେ ପୁଅକୁ ସ୍ନେହ ଦେଇପାରିନାହାନ୍ତି । କାହ୍ନାଙ୍କୁ କୋଭିଡ୍ ହସ୍ପିଟାଲରେ ଡ୍ୟୁଟି କରିବା ପାଇଁ କେହି ବାଧ୍ୟ କରି ନାହାନ୍ତି । ତାଙ୍କୁ ଆଦେଶ ମିଳିବା କ୍ଷଣୀ ସେ କାର୍ଯ୍ୟରେ ଲାଗି ପଡନ୍ତି । ଏନେଇ କାହ୍ନା କହନ୍ତି, ହସ୍ପିଟାଲରେ ଅନେକ ବୟସ୍କ ଲୋକ ଘରଛାଡି ଏକୁଟିଆ ରହିଥାନ୍ତି । ସେମାନଙ୍କୁ ଦେଖିଲେ ମୋତେ ବିକଳ ଲାଗେ । ସେମାନେ ଟଏଲେଟ୍ ଗଲା ସମୟେ ସମୟେ ଅଜାଣତରେ ଅପରିଷ୍କାର କରି ଆସିଯାଇଥାନ୍ତି । ଏଥିରେ ମୋତେ ତିଳେମାତ୍ର ଖରାପ ଲାଗେ ନାହିଁ । ଏହି କାର୍ଯ୍ୟକୁ ମୁଁ ଭଗବାନଙ୍କ ଆଦେଶ ଭାବି କରି ଚାଲିଛି । ଭଗବାନଙ୍କ କୃପାରୁ ଏହି ଦୁଇ ବର୍ଷରେ କରୋନା ମୋତେ କିମ୍ବା ମୋ ପରିବାରକୁ ଛୁଇଁପାରିନି । ଆଗକୁ ଏମିତି ବିନା ଦ୍ୱିଧାରେ ସେବା କାର୍ଯ୍ୟ ଜାରି ରଖିବାକୁ ଇଚ୍ଛା କରିଥିବା କହନ୍ତି କାହ୍ନା ।

କୌଣସି ରୋଗୀଙ୍କ ମୃତ୍ୟୁ ହେଲେ ମୋତେ ଦୁଃଖ ଲାଗେ । ଡାକ୍ତର ଓ ନର୍ସମାନେ ରୋଗୀଙ୍କ ବହୁତ ସେବା କରୁଥିବାବେଳେ ଆମେ ଭଳି କିଛି ଲୋକ କୋଭିଡ୍ ହସ୍ପିଟାଲ ପରିସର ଏବଂ ମେଡିକାଲ ଭିତର ଚକାଚକ କରି ରଖିଛୁ । ରୋଗୀ ଯେପରି ହସ୍ପିଟାଲ ଭିତରକୁ ଆସିଲେ ଘରଭଳି ସଫା ଅନୁଭବ କରିବ ସେନେଇ ଆମେ ସର୍ବଦା ସଜାଗ ରହିଛୁ ।

Leave A Reply

Your email address will not be published.

Close Bitnami banner
Bitnami